كەشە قۋانىشتى حابار جەتتى. 14 جاستاعى قازاقستاندىق مانەرلەپ سىرعاناۋشى ەليزابەت تۇرسىنباەۆا 2014 جىلعى اقپان ايىندا سوچيدە وتەتىن XXII قىسقى وليمپيا ويىندارىنىڭ كورسەتىلىم سىناعىنا قاتىساتىن بولىپتى.
ءبىز ليزا تۋرالى العاش رەت بۇدان 2 جىلعا جۋىق ۋاقىت بۇرىن, 2011 جىلعى جەلتوقسان ايىندا, ول گەرمانيانىڭ دورتمۋند قالاسىندا جاسوسپىرىمدەر اراسىندا بولىپ وتكەن حالىقارالىق تۋرنيردە قولا جۇلدە جەڭىپ العان كەزدە جازعانبىز.
كەشە قۋانىشتى حابار جەتتى. 14 جاستاعى قازاقستاندىق مانەرلەپ سىرعاناۋشى ەليزابەت تۇرسىنباەۆا 2014 جىلعى اقپان ايىندا سوچيدە وتەتىن XXII قىسقى وليمپيا ويىندارىنىڭ كورسەتىلىم سىناعىنا قاتىساتىن بولىپتى.
ءبىز ليزا تۋرالى العاش رەت بۇدان 2 جىلعا جۋىق ۋاقىت بۇرىن, 2011 جىلعى جەلتوقسان ايىندا, ول گەرمانيانىڭ دورتمۋند قالاسىندا جاسوسپىرىمدەر اراسىندا بولىپ وتكەن حالىقارالىق تۋرنيردە قولا جۇلدە جەڭىپ العان كەزدە جازعانبىز. سول جولى 11 جاسار قىزدىڭ قىزىلوردا وبلىسىنداعى ارال قالاسىنىڭ تۋماسى ەكەنىن دە بايانداعان ەدىك. ليزا بالا جاسىنان سپورتقا, سونىڭ ىشىندە مانەرلەپ سىرعاناۋعا قىزىعىپ ءوسىپتى. قىزىنىڭ وسىنداي ىنتاسىن بىلگەن اكەسى بايتاق تۇرسىنباەۆ ماسكەۋ قالاسىنا كوشىپ بارادى. ونىڭ ليزادان جاسى ۇلكەن تيمۋر اتتى ۇلى دا بار ەكەن. قازىر ءتورت ادامنان تۇراتىن وتباسى رەسەي استاناسىندا تۇرىپ جاتىر.
«مەنىڭ قىزىم 14-كە ەندى عانا تولاتىن بولعاندىقتان, وليمپيا ويىندارىنىڭ مانەرلەپ سىرعاناۋدان ەرەسەكتەر اراسىندا وتەتىن نەگىزگى جارىسىنا جىبەرىلگەن جوق. سوندىقتان ول مۇندا تەك كورسەتىلىم سىناعىنا قاتىسادى», – دەپ ءتۇسىندىردى ەليزابەتتىڭ ءارى مەنەدجەرى بولىپ تابىلاتىن اكەسى بايتاق.
ونىڭ ايتۋىنا قاراعاندا, ليزا قازىر الداعى جەلتوقسان ايىنىڭ 5-ءى مەن 8-ءى ارالىعىندا جاپونيادا وتەتىن ءجاسوسپىرىمدەردىڭ الەمدىك گران-ءپريىنىڭ فينالىنا دايىندالىپ جاتقان كورىنەدى. ەسكە سالا كەتەيىك, ول وسى گران-ءپريدىڭ تاياۋدا مينسكىدە وتكەن كەزەكتى كەزەڭىندە ەكىنشى ورىننان كورىنگەن ەدى.
ەليزابەت تۇرسىنباەۆا – جاسوسپىرىمدەردىڭ 2013-2014 جىلدارعى ماۋسىمعا ارنالعان الەمدىك گران-ءپريىنىڭ 5 كەزەڭىنىڭ قورىتىندىسى بويىنشا العاشقى ۇشتىكتىڭ قۇرامىنا ەندى. ول سونداي-اق رەسەي ۇزدىك جاسوسپىرىمدەرىنىڭ «توپ-5» شەڭبەرىنەن دە ورىن العان. بۇعان دەيىن, ياعني 2010, 2011 جانە 2012 جىلدارى قازاقستاننىڭ چەمپيونى اتانىپ ۇلگەرگەن ايدىندى ارالدىڭ اقبوتاسى بيىلعى 2013 جىلى ماسكەۋ قالاسىنىڭ بىرىنشىلىگىندە دە الدىنا جان سالماپتى.
ءبىر عاجابى, تالانتتى قىز تەك مانەرلەپ سىرعاناۋمەن عانا شەكتەلىپ قالماعان ەكەن. ول بوس ۋاقىتىندا, سونداي-اق, سكريپكامەن جانە فورتەپيانومەن شۇعىلداناتىن بولىپ شىقتى. جاقىندا مۋزىكالىق مەكتەپتىڭ سكريپكا سىنىبىن ءتامامداپ شىقپاقشى. دەگەنمەن, ول ءوزىنىڭ نەگىزگى ارماندارىن سپورتپەن بايلانىستىرا قاراستىرادى. ليزا مانەرلەپ سىرعاناۋدان وليمپيا ويىندارى مەن الەم چەمپيونى بولۋدى ارماندايدى.
ايتا كەتۋ كەرەك, ۇستىمىزدەگى جىلى «سامۇرىق-قازىنا» اكتسيونەرلىك قوعامىنىڭ دەمەۋشىلىك ەتۋىمەن ليزاعا بىرقاتار جارىستارعا قاتىسۋ مۇمكىندىگى جاسالدى. ال جىلدىڭ سوڭىنان باستاپ ونى كانادا جاتتىقتىرۋشىسى براين ورسەر دايارلاي باستايتىن بولادى.
سەرىك ءپىرنازار,
«ەگەمەن قازاقستان».
