"ۆەستنيك كاۆكازا" گازەتى 2021 جىلدان باستاپ قازاقستاندا "اڭساعان ءسابي" ارناۋلى باعدارلاماسى ىسكە قوسىلاتىنىن حابارلاعان. سونداي-اق قازاقستان پرەزيدەنتىنىڭ ۇكىمەتكە "ەكو" باعدارلاماسىمەن كۆوتانى 7 ەسە كوبەيتۋدى تاپسىرعانىن جازادى.
"ەلىمىزدە وكىنىشكە قاراي, ءاربىر التىنشى وتباسى بالا ءسۇيۋ باقىتىنان ايىرىلعان. الەۋمەتتىك ساۋال سالۋ قازاقستاندىقتاردىڭ شامامەن 20 پايىزى "بۇل اجىراسۋعا ۇلكەن سەبەپ" سانايتىندىعىن كورسەتتى", - دەلىنگەن باسىلىم حابارلاماسىندا.
Reuters حالىقارالىق اگەنتتىگى قاسىم-جومارت توقاەۆ شەنەۋنىكتەردى 25 پايىزعا قىسقارتۋدى تاپسىرعانىن, مەملەكەتتىك قىزمەتتىڭ جۇيەسى قايتا قارالاتىنىن جازدى. "پاندەميا مەن مەملەكەتتىك ورگانداعى كوپتەگەن قىزمەتكەردى قاشىقتان جۇمىس ىستەۋ رەجيمىنە اۋىستىرۋ مەماپپاراتتى قىسقارتۋ كەرەك ەكەنىن كورسەتتى. مەملەكەتتىك اپپارات پەن كۆازيمەملەكەتتىك سەكتورىن قىسقارتۋ مەرزىمىن جىلدامداتۋدى تاپسىرامىن. بيىل ولاردىڭ سانىن 10 پايىزعا قىسقارتۋ قاجەت. كەلەسى جىلى تاعى 15 پايىزعا قىسقارتۋ كەرەك. وسىلايشا, شەنەۋنىكتەردى 25 پايىزعا قىسقارتۋ تاپسىرماسىن 2021 جىلى شەشىپ بولامىز. ناتيجە مەن تسيفرلاندىرۋعا بايلانىستى تاعى دا قىسقارتۋ ماسەلەسىن قارايمىز. ۇنەمدەلگەن قاراجات ارقىلى قالعان قىزمەتكەرلەردىڭ جالاقىسى ارتتىرىلادى",- دەپ حابارلادى اگەنتتىك.
