اقش 2014 جىلدىڭ شىلدە ايىندا ماناس اۋە بازاسىن قىرعىزستان ۇكىمەتىنە قايتارىپ بەرەتىن بولدى. بۇل تۋرالى يتار-تاسس حابارلادى.
اقش قارۋلى كۇشتەرى كولىك كومانداسىنىڭ باسشىسى ۋيليام فرەيزەردىڭ ايتۋى بويىنشا, اقش قورعانىس مينيسترلىگى ماناس حالىقارالىق اۋەجايىنداعى ترانزيتتىك تاسىمالداۋ ورتالىعىنان كوشۋ پروتسەسىن باستادى جانە 2014 جىلدىڭ شىلدە ايىندا بارلىق نىساندار مەن الاڭداردى قىرعىزستان ۇكىمەتىنە تاپسىرىپ ءبىتۋدى كوزدەپ وتىر. «ءبىز قىرعىزستان ۇكىمەتىنىڭ ماناس اۋە بازاسىنا قاتىستى ىسكەرلىك كەلىسىم شارتتى توقتاتۋ جونىندەگى شەشىمىن سىيلايمىز. بىشكەكتىڭ اقش قارۋلى كۇشتەرىنە كورسەتكەن قولداۋىن جوعارى باعالايمىز», – دەدى ول.
پەنتاگون وسى ايدا اقش-تىڭ ماناس بازاسىنداعى وپەراتسيالارىن توقتاتاتىنى جونىندە حابارلاعان ەدى. سول كەزدە اقش اسكەري باسقارماسىنىڭ رەسمي وكىلى پودپولكوۆنيك كەتي ۋيلكينسون اقش كۇشتەرىنىڭ ماناس بازاسىنان كەتۋىنە بايلانىستى, اۋعانستانداعى اسكەري وپەراتسيالار ەندى قارا تەڭىزدە ورنالاسقان, رۋمىنيانىڭ كونستانتسا قالاسى ماڭىنداعى ميحايل كوگەلنيچانۋ اتىنداعى اۋەجايىنان جۇرگىزىلەتىنىن مالىمدەدى.
ايدار ورىسباەۆ.
