"Nur Otan" پرايمەريزدىڭ العاشقى 10 كۇندىك قورىتىندىسىن شىعاردى

پارتياىشىلىك سايلاۋعا قاراپايىم پارتيا مۇشەلەرى عانا ەمەس، بەلگىلى قوعام بەلسەندىلەرى، اتاقتى سپورتشىلار، مادەنيەت قايراتكەرلەرى جانە ت. ب. قىزىعۋشىلىق تانىتۋدا.

سولاردىڭ ءبىرى – شاحماتشى جانسايا ابدىمالىك. ول الماتى قالالىق ءماسليحاتىنا سايلاۋ ءۇشىن پارتيالىق تىزىمگە كانديدات بولۋ قۇقىعىن يەلەنۋ ماقساتىندا دوداعا ءتۇسۋدى جوسپارلاپ وتىر.

"Nur Otan" پارتياسى قايتا جانداندىرۋ تۋرالى ايتۋدا. ەلدەگى رەفورمالار ماقساتشىل جانە ءورشىل جاستاردىڭ قاتىسۋىمەن جاسالۋى كەرەك دەپ ەسەپتەيمىن"، - دەپ جازدى ول Instagram-داعى ءوزىنىڭ پاراقشاسىندا.

قوعام بەلسەندىسى، "پاندۋس-وك" جشس-ءنىڭ باسشىسى شاحان جولداسباەۆ ەرەكشە قاجەتتىلىكتەرى بار ادامدارعا قالالىق ورتانى ىڭعايلى ەتۋ ماسەلەسىنە الاڭداۋلى.

"قاراپايىم دۇنيەلەردىڭ وزىنە قول جەتكىزە الماي وتىرعاندا، ودان وزگەسى تۋرالى ايتۋدىڭ ءوزى ارتىق. شىندىعىندا، ءبىز سياقتى جاندارعا قاجەتتىنىڭ ءبارى جازىلىپ، نۇسقاۋلىق بەرىلىپ قويىلعان، تەك ولار ورىندالمايدى. ءماسليحاتتا ءار سالا بويىنشا وسى باعىت ءۇشىن كۇرەسىپ، شەنەۋنىكتەرگە بوساڭسۋعا جول بەرمەيتىن ادام قاجەت. ءوزىمنىڭ 10 جىلعا جۋىق قوعامدىق جۇمىستارىما، ۇلكەن ىقىلاس پەن تاجىريبەمە سۇيەنە وتىرىپ، ەرەكشە قاجەتتىلىكتەرى بار ازاماتتاردى تولعاندىراتىن كوپتەگەن الەۋمەتتىك ماسەلەلەردى شەشۋگە ءوز ۇلەسىمدى قوسقىم كەلەدى"، - دەدى شاحان جولداسباەۆ.

اقتوبە وبلىستىق دراما تەاترىنىڭ ديرەكتورى، بەلگىلى اكتەر ولجاس يبراەۆ اۋىل جاستارىنا قولداۋ كورسەتۋمەن اينالىسپاق.

"اۋىلدا تۋىپ-ءوستىم، سوندىقتان مەنىڭ باستى ماقساتىم – اۋىلدان شىققان جاستارعا جۇيەلى تۇردە قولداۋ كورسەتۋ، اۋىل مەن قالا تۇرعىندارىنىڭ ءوز قابىلەتتەرىن ىسكە اسىرۋداعى مۇمكىندىكتەرىن تەڭەستىرۋگە كۇش سالۋ"، - دەدى كانديدات.

اقمولا وبلىسىنىڭ فەرمەرى ازامات قابجانوۆ تا تۋعان ولكەنىڭ وزەكتى ماسەلەلەرىن شەشۋگە نيەتتى. جارقايىڭ اۋدانىنا قاراستى كوستىچەۆو اۋىلدىق وكرۋگىندە ءوز بيزنەسىن جولعا قويعان ول 20-دان استام ادامدى جۇمىسپەن قامتىپ وتىر. سونىمەن قاتار، اۋىلعا كەلىپ جۇمىس ىستەگىسى كەلەتىن جاس وتباسىلار ءۇشىن باسپانا جانە بالالارعا ارنالعان سپورت ورتالىعىن سالۋ دا جوسپارىندا بار.

"جاڭا جۇمىس ورىندارىن اشۋ، اۋىل جاستارىنا بيزنەس باستاۋدى ۇيرەتۋ، اۋىل شارۋاشىلىعى كاسىپورىندارىن ماماندارمەن قامتاماسىز ەتۋ، سپورتتى جانە سالاۋاتتى ءومىر سالتىن دارىپتەۋ"، – دەگەن 29 جاستاعى كاسىپكەر وسىنداي ماسەلەلەردى كوتەرمەك.

تۇركىستان وبلىسىنان كەلگەن جۇماگۇل كۇزدەنباەۆا كوپبالالى وتباسىلاردىڭ ماسەلەسىن كوتەرمەكشى. وتىرار اۋدانىنىڭ ءشاۋىلدىر اۋىلىندا تۇراتىن كوپبالالى انا "بيزنەس باستاۋ" باعدارلاماسى بويىنشا گرانت جەڭىپ الىپ، سۇلۋلىق سالونىن اشتى. بۇگىندە ول 7 ادامدى جۇمىسپەن قامتىپ وتىر.

"ويلانا كەلە "Nur Otan" پارتياسىنىڭ پرايمەريزىنە قاتىسۋدى ءجون كوردىم. قۇجاتتارىمدى وتكىزدىم. بۇل – ءار ازامات ءۇشىن قوعامدىق-ساياسي ومىرگە ارالاسۋعا ۇلكەن مۇمكىندىك. پرايمەريزدەن ءوتىپ، دەپۋتات بولسام كوپبالالى انالاردىڭ قۇقىعىن قورعاپ، ولارعا قولدان كەلگەنشە جاعداي جاساعىم كەلەدى. ءوز زامانداستارىمنىڭ، ارداقتى انالاردىڭ پروبلەمالارىن جاقسى بىلەمىن"، – دەيدى جۇماگۇل كۇزەنباەۆا.

ەسكە سالا كەتەيىك، "Nur Otan" پرايمەريزىنە كانديداتتاردى ۇسىنۋ جانە تىركەۋ 28 تامىزدا اياقتالادى. وعان قاتىسۋ ءۇشىن ءوتىنىشتى https://primaries.kz/ سايتىندا "پرايمەريز" اقپاراتتىق جۇيەسى ارقىلى ونلاين جولداۋعا نەمەسە اۋماقتىق ۇيىمداستىرۋ كوميتەتتەرىنە جەكە ءوتىنىش بەرۋگە بولادى.

پارتيا قۇندىلىقتارىن ۇستاناتىن جانە سايلاۋ قۇقىعى بار كەز كەلگەن ازامات ۇمىتكەر بولا الادى. ول ءۇشىن پرايمەريزگە قاتىسۋشىلاردى تىركەۋ مەرزىمى اياقتالعانعا دەيىن "Nur Otan"-نىڭ قاتارىنا قوسىلۋ كەرەك.

پرايمەريز وتكىزۋ ماسەلەلەرى بويىنشا ارنايى 8 (800) 080 4441 جەدەل جەلى ىسكە قوسىلدى.

قازاقستانداعى جانە الەمدەگى سوڭعى جاڭالىقتاردى ءبىرىنشى بولىپ وقۋ ءۇشىن Telegram جەلىسىندە بىزگە جازىلىڭىز.