"Nur Otan" پرايمەريزىنە ادامدار نە ءۇشىن قاتىسىپ جاتىر؟

پارتيا توراعاسىنىڭ ءبىرىنشى ورىنباسارى باۋىرجان بايبەك، بۇل – ەلباسىنىڭ باستاماسىمەن قولعا الىنعان "سەنىم. ديالوگ. بولاشاققا نىق قادام" پارتيا جۇمىسىن "قايتا جانداندىرۋ" باعدارلاماسىنىڭ قورىتىندى كەزەڭدەرىنىڭ ءبىرى ەكەنىن ايتقان بولاتىن. پرايمەريزدىڭ نەگىزگى ماقساتى – الداعى ءماجىلىس پەن بارلىق دەڭگەيدەگى ءماسليحات سايلاۋلارىنا پارتيالىق تىزىمدەردى قالىپتاستىرۋ ءۇشىن باسەكەلەس كۇرەس نەگىزىندە جاڭا كوشباسشىلاردى ايقىنداۋ.

پارتيا ءباسپاسوز قىزمەتىنىڭ حابارلاۋىنشا، ءبىر اپتا ىشىندە پرايمەريزگە قاتىسۋعا 7000-عا جۋىق ادام ءوتىنىش بەرگەن. ولاردىڭ 34%-ى – ايەلدەر، ونىڭ ىشىندە 100-ءى – كوپبالالى انا، 24%-ى – 35 جاسقا دەيىنگى جاستار. سونداي-اق 51-ءى – ەرەكشە قاجەتتىلىگى بار ازامات. باستاۋىش پارتيا ۇيىمدارى ارقىلى 2419 ادام ۇسىنىلسا، 4496 كانديدات – ءوزىن-ءوزى ۇسىنعاندار.

سولاردىڭ ءبىرى - "تەمەكى تۇتىنىنەن ازات قازاقستان ءۇشىن" قوعامدىق قوزعالىسىنىڭ باسشىسى ءجاميلا سادىقوۆا. الەۋمەتتىك جەلىلەردەگى پاراقشاسىندا ول ءوزىنىڭ دەنساۋلىق ساقتاۋ سالاسىنداعى ءبىلىمىن ازاماتتاردىڭ ءومىر ءسۇرۋ ساپاسىن جاقسارتۋعا پايدالانۋ ءۇشىن پرايمەريزگە قاتىساتىنىن ايتتى.

"ايتارىم عانا ەمەس، اتقارسام دەگەن ىستەرىم دە جەتەرلىك. ءوز ەلىمدە دەكلاراتيۆتى ەمەس، ناقتى، ساپالى وزگەرىستەر جاساعىم كەلەدى. قازاقستاندىقتاردىڭ دەنساۋلىعىن ساقتاۋ ءۇشىن تەمەكىگە قارسى باستامالار مەن شارالاردى قولعا العانىم سياقتى بار كۇش-جىگەرىمدى سالىپ جۇمىس ىستەۋگە، ءوز ۇلەسىمدى قوسۋعا دايىنمىن"، - دەپ جازدى ءجاميلا سادىقوۆا.

ال الماتىلىق كاسىپكەر، قوعام بەلسەندىسى كونستانتين اۆەرشين سىبايلاس جەمقورلىق ماسەلەسىنە الاڭداۋشىلىق ءبىلدىردى. ونىڭ پىكىرىنشە، سىبايلاس جەمقورلىق – دەنساۋلىق ساقتاۋ نەمەسە ءبىلىم بەرۋ جۇيەسىندەگى كەز كەلگەن ولقىلىقتىڭ نەگىزگى سەبەبى. سونىمەن قاتار، ول پرايمەريز – قاتاڭ باسەكەلەستىك نەگىزدە ەڭ مىقتى كانديداتتاردى ىرىكتەۋگە جاعداي جاسايتىن ەرەكشە مۇمكىندىك ەكەنىن اتاپ ءوتتى.

"باستاۋىش پارتيا ۇيىمىنىڭ اتىنان تۇسەسىڭ بە، الدە ءوز-ءوزىڭدى ۇسىناسىڭ با، ول جاعى ماڭىزدى ەمەس. ءدال قازىر ەڭ باستىسى – ءوز قابىلەتىڭدى، اتقارا الاتىن ءىسىڭدى كورسەتۋ. "Nur Otan" پارتياسىن قايتا جانداندىرۋ ءجۇرىپ جاتىر. بۇل جاي عانا ايتىپ قويا سالۋ ەمەس، پرايمەريزگە جۇمىس ىستەۋگە جانە وزگەرىس جاساۋعا دايىن ادامدار قاتىسادى"،-دەپ ءتۇيدى كونستانتين اۆەرشين.

ەرەكشە قاجەتتىلىگى بار ادامدار ءۇشىن قالالىق ورتانى ىڭعايلى ەتۋ ماسەلەلەرىن ۆولەيبولدان قازاقستان پاراليمپيادالىق جاستار قۇراماسىنىڭ كاپيتانى سەرىك ەسماتوۆ كوتەرمەك.

"مەن مۇمكىندىگى شەكتەۋلى اداممىن، سوندىقتان ءوزىم سياقتى جانداردىڭ قانداي قيىندىقتارمەن ۇشىراساتىنىن جاقسى بىلەمىن. وسى تۇرعىدان تەك تۋعان قالامداعى ەمەس، بۇكىل قازاقستانداعى جاعدايدى جاقسارتسام دەگەن جوسپارىم بار"، - دەدى سپورتشى.

ەرىكتىلەر ليگاسىنىڭ باسشىسى ايسۇلۋ ەرنيازوۆا وكىلدىك ورگانداردا جاستاردىڭ مۇددەسىن بىلدىرۋگە تالپىنىپ وتىر. ايسۇلۋدىڭ ايتۋىنشا، پارتيانىڭ جاستارعا سەنىم ارتۋى، ولارعا جاۋاپكەرشىلىك جۇكتەيدى.

"پرايمەريز – ەڭ الدىمەن جاڭا تاريحتى جاسايتىن جىگەرلى تۇلعالار مەن جاڭا تولقىن. مەن مۇنى پارتيانىڭ تاكتيكالىق جانە ستراتەگيالىق دۇرىس شەشىمى دەپ ەسەپتەيمىن. كۇرەس وتە قىزىقتى باسەكەلەستىك جاعدايدا وتەدى. جاس بۋىننىڭ مۇددەسىن كوزدەي وتىرىپ، مەملەكەتتىك جاستار ساياساتىن باستى نازاردا ۇستايمىن. قانداي وزگەرىستەردىڭ جاستارعا كەرەگىن جانە قانداي ماسەلەلەردىڭ الاڭداتاتىنىن جاقسى بىلەمىن"، - دەدى كانديدات.

ال جالعىزباستى انالاردى قولداۋ ماسەلەسىن پاۆلوداردان كەلگەن ءجاميلا ەرنازاروۆا قولعا الماق.

"پرايمەريزگە قاتىسۋداعى ماقساتىم – پاۆلودارلىق وتباسىلارعا، ەڭ الدىمەن كامەلەتكە تولماعان بالالارى بار جالعىزباستى انالارعا ودان ءارى جۇيەلى قولداۋ كورسەتۋ"، - دەدى ول.

تانىمال شوۋمەن تۇرسىنبەك قاباتوۆ تا پرايمەريزگە قىزىعۋشىلىق تانىتىپ وتىر. ول Instagram جەلىسىندەگى وقىرماندارىنا پارتياىشىلىك ىرىكتەۋگە قاتىسقانىم ءجون بە دەگەن وي تاستاپ، ولاردىڭ پىكىرلەرىن سۇرادى. ايتا كەتۋ كەرەك، تۇرسىنبەك قاباتوۆ وتكەن جىلدىڭ قاراشا ايىنان بەرى "Nur Otan" پارتياسىنىڭ مۇشەسى. ونىڭ باستاماسىن كوپشىلىك قولدادى.

بيلەۋشى پارتيانىڭ ءباسپاسوز قىزمەتى تاراتقان اقپاراتقا سايكەس، پرايمەريزگە قاتىسۋ ءۇشىن ءوتىنىشتى https://primaries.kz/ سايتىندا "پرايمەريز" اقپاراتتىق جۇيەسى ارقىلى ونلاين جولداۋعا نەمەسە اۋماقتىق ۇيىمداستىرۋ كوميتەتتەرىنە جەكە ءوتىنىش بەرۋگە بولادى. كانديداتتاردى ۇسىنۋ جانە تىركەۋ 28 تامىزعا (قوسا ەسەپتەگەندە) دەيىن جالعاسادى.

پارتيا قۇندىلىقتارىن ۇستاناتىن جانە سايلاۋ قۇقىعى بار كەز كەلگەن ازامات ۇمىتكەر بولا الادى. ول ءۇشىن پرايمەريزگە قاتىسۋشىلاردى تىركەۋ مەرزىمى اياقتالعانعا دەيىن "Nur Otan"-نىڭ قاتارىنا قوسىلۋ كەرەك.

پرايمەريز وتكىزۋ، سونداي-اق كانديداتتارعا ۇيىمداستىرۋشىلىق جانە قۇقىقتىق قولداۋ ماسەلەلەرى بويىنشا "Nur Otan" پارتياسى 8 (800) 080 4441 ارنايى جەدەل جەلىنى ىسكە قوستى.

قازاقستانداعى جانە الەمدەگى سوڭعى جاڭالىقتاردى ءبىرىنشى بولىپ وقۋ ءۇشىن Telegram جەلىسىندە بىزگە جازىلىڭىز.