ەلىمىزدە ەكسپو-2017 كورمەسىنە دايىندىق جۇمىستارى قىزۋ باستالىپ كەتتى. 2017 جىلعا بەلگىلەنگەن حالىقارالىق كورمەنى ۇيىمداستىرۋ ءۇشىن ارنايى ۇلتتىق كومپانيا قۇرىلىپ, ونىڭ باسشىلىعىنا تالعات ەرمەگياەۆ تاعايىندالدى. بۇل تۋرالى TengriNews.kz حابارلادى.
ەكسپو كورمەسىن وتكىزەتىن ورىن رەتىندە استانانىڭ تاڭدالۋى تەكتەن-تەك ەمەس. بۇل تۋرالى مەملەكەت باسشىسى نۇرسۇلتان نازارباەۆ ءوز سوزىندە: «بىرىنشىدەن, الەمنىڭ وسىنشاما ەلىنىڭ قازاقستاندى «ەڭ لايىقتى» دەپ تانۋىنىڭ ءوزى وتە ماڭىزدى. ەكىنشىدەن, 100-دەن استام ەل استانادا ءوز پاۆيلوندارىن سالۋ ءۇشىن كەلەدى. ءۇشىنشىدەن, «ەكسپو – 2017» كورمەسىنە ءبىز ۇسىنعان «بولاشاقتىڭ ەنەرگياسى» ۇرانى نەگىزىندە ەلوردامىزعا جاھانداعى مەملەكەتتەر ءوزدەرىنىڭ جاڭا تەحنولوگيالارىن جەتكىزەدى. ءىس جۇزىندە ءىىى يندۋستريالىق رەۆوليۋتسيا «جاسىل ەكونوميكادان» باستالماق. بۇل رەتتە قاي ەلدە «جاسىل ەكونوميكا» بولسا, سونىڭ قولىندا جاڭا تەحنولوگيالار بار. ال جاڭا تەحنولوگيالارسىز ەندى دامۋ جوق. ياعني «ەكسپو – 2017» قازاقستان ءۇشىن ەكونوميكالىق دامۋدىڭ ءتۇبەگەيلى جاڭا بەتىن اشۋداعى بەتبۇرىس بەكەتىنە اينالماق»,-دەگەن ەدى.
ءبىزدىڭ ەل 2017 جىلى وتەتىن كورمەنىڭ تاقىرىبىن ەنەرگيانىڭ بالامالى كوزدەرى مەن «جاسىل» ەكونوميكا ماسەلەلەرىنە ارناپ وتىر. وسى جوبا تازا ەكولوگيالىق تەحنولوگيا مەن جاڭعىرتىلعان ەنەرگەتيكاعا ارنالعان. يندۋستريالىق-يننوۆاتسيالىق دامۋدى جەدەلدەتۋ جونىندەگى مەملەكەتتىك باعدارلاما شەڭبەرىندە ەلىمىز 2015-2020 جىلدار ارالىعىندا ءجىو ەنەرگيا شىعىنىن تيىسىنشە 25 پايىزدان 10 پايىزعا كەمىتۋدى جوسپارلادى. ونىڭ العى شارتى رەتىندە كۇن باتارەيالارىن ءوندىرەتىن زاۋىت اشىلدى.
جاسىراتىنى جوق, قازىرگى كەزدە الەم ەلدەرىندە ەنەرگيا كوزىنىڭ تاپشىلىعى بايقالۋدا. سول سەبەپتى دۇنيەجۇزى ەنەرگيانى كۇن, جەل سياقتى تابيعي كوزدەردەن الۋعا كوشە باستادى. ال بولاشاقتا ءبۇكىل الەم «جاسىل» تەحنولوگيامەن العا جىلجىپ, ەنەرگيا كوزىن ۇنەمدەۋگە نەگىز قالايتىنى داۋسىز. وسى تۇرعىدان العاندا, ءبىزدىڭ ەل تاڭداعان «بولاشاقتىڭ ەنەرگياسى» الەمدىك ەكونوميكالىق دامۋدىڭ باستى كىلتىنە اينالماق. دەگەنمەن, حالىقارالىق كورمەلەر بيۋروسىنىڭ تالاپتارى دا جوعارى. ماسەلەن, كورمە وتكىزۋگە بەلگىلەنگەن 3اي ىشىندە استانا قالاسى الەمنىڭ 100 مەملەكەتىنەن 5 ميلليونعا جۋىق ادامدى قابىلداۋعا مۇمكىندىگى بولۋى ءتيىس. بۇل جۇمىستاردىڭ الدىن الۋ ءۇشىن بىزگە ناقتى جوسپارلى ءىس قاجەت...
بۇگىندە كوپشىلىكتى كورمەدەن كەيىن ەكسپو-2017 الاڭى قالاي پايدالانىلادى دەگەن سۇراق تا مازالاپ ءجۇر. وسىعان پاريجدە وتكەن حالىقارالىق كورمەلەر بيۋروسى باس اسسامبلەياسى 153-ءشى سەسسياسى كەزىندە «استانا ەكسپو-2017» ۇق» اق باسقارما توراعاسى تالعات ەرمەگياەۆ قىسقاشا تۇسىنىكتەمە بەردى. ونىڭ ايتۋىنشا, اتالمىش اۋماق ءومىر ءسۇرۋدىڭ جاڭا تازا ەكولوگيالىق ۇلگىسىنە, تاۋلىك بويى قاربالاس بولاتىن «ەشقاشان قالعىمايتىن» اۋدانعا اينالادى. دامۋدىڭ مۇنداي ۇلگىسى جاستارعا, ستۋدەنتتەرگە, جاس عالىمدارعا, كاسىپكەرلەر مەن جاس وتباسىلارعا باعدارلانادى. ول ەلىمىزدىڭ جەتەكشى جوعارى وقۋ ورىندارىنىڭ ءبىرى - نازارباەۆ ۋنيۆەرسيتەتىنىڭ جانىندا ورنالاسۋىمەن ەرەكشەلەنەدى.
ەكسپو كورمە كەشەنىنىڭ سىرت جاعىنان عىلىمي-تەحنولوگيالىق پارك ورىن السا, ۋنيۆەرسيتەت كەشەنى مەن عىلىمي-تەحنولوگيالىق پاركتىڭ اراسىندا جاسىل جەلەكپەن كومكەرىلگەن كەڭ اللەيا اشىلادى. ونىڭ جان-جاعىنا ساۋدا ورتالىعى, سپورت پەن ويىن-ساۋىق ساياباعى ورنالاسادى. ال ورىنبور كوشەسىندە قۇرىلىسى قولعا الىناتىن تۇرعىن اۋداندار ايماعى ەكسپو كورمە كەشەنىنەن شىعىسقا قاراي كەڭەيتىلەدى.
دانيار تۇيمەباي.
