ءداستۇرلى كونفەرەنتسيا پاندەميا جىلىندا العاش رەت ونلاين فورماتتا ۇيىمداستىرىلىپ, ناتيجەسىندە العاش رەت NIS جۇيەسىندەگى بارلىق ۇستازدار قاتىسۋعا مۇمكىندىك الدى. ءبىلىم بەرۋدىڭ جاڭا مىندەتتەرى مەن تىڭ ماسەلەلەرىنە جالپى 3500 قاتىسۋشى قوسىلدى: زياتكەرلىك مەكتەپتەردىڭ پەداگوگتارى, اتا-انالار كوميتەتىنىڭ, ءبىلىم جانە عىلىم مينيسترلىگى مەن ءبىلىم بەرۋ دەپارتامەنتتەرىنىڭ, سەرىكتەس ۇيىمداردىڭ وكىلدەرى.
"نازارباەۆ زياتكەرلىك مەكتەپتەرى" دببۇ باسقارما ءتورايىمى كۇلاش شامشيدينوۆانىڭ باستى بايانداماسى قازىرگى ءبىلىم بەرۋدىڭ جاڭا جاعدايلارى مەن جاڭا مۇمكىندىكتەرىنە باعىتتالدى. سونىمەن قاتار, پلەنارلىق وتىرىستا ءبىلىم بەرۋ باعدارلامالارى ورتالىعى ديرەكتورىنىڭ ورىنباسارى زۋحرا شەگەنوۆا مەن پەداگوگيكالىق ولشەۋلەر ورتالىعىنىڭ ديرەكتورى ايدانا شيليبەكوۆانىڭ قاشىقتان وقىتۋ جاعدايىندا فۋنكتسيوندالدىق ساۋاتتىلىق پەن باعالاۋعا جۇيەسىن دامىتۋعا باسا نازار اۋدارىلعان باياندامالارى تىڭدالدى. دببۇ قامقورشىلىق كەڭەسىنىڭ مۇشەسى پيتەر مەحيستونىڭ "بىرگە وقىتامىز" تاقىرىبىنداعى بايانداماسى كونفەرەنتسياعا قاتىسۋشىلاردىڭ ۇلكەن قىزىعۋشىلىعىن تۋدىردى.
"قاشىقتان وقىتۋ – جاڭا قالىپتىلىق" تاقىرىپتىق الاڭىندا كۇن تارتىبىندەگى باسىم باعىتتار تالقىلاندى: زەرتتەۋشىلىك جانە ادىستەمەلىك قولداۋ, مەديتسينالىق-سانيتاريالىق جانە پسيحولوگيالىق سۇيەمەلدەۋ, توپتىق ءوزارا ارەكەتتەسۋ, قاشىقتان وقىتۋ جاعدايىنداعى بيوحاكينگ. العاشقى ونلاين تامىز كونفەرەنتسياسىندا قاتىسۋشىلاردىڭ پەداگوگتىڭ تسيفرلىق ەتيكەتىن ۇجىمدىق تالداۋى زاڭدى بولدى.
وتكەن جىلى العاش رەت ەنگىزىلگەن "ۇزدىك تاجىريبەلەر پانوراماسى" ءوز اتاۋىن تولىقتاي اقتاي ءبىلدى, بيىل دا ونلاين كورمەدە زياتكەرلىك مەكتەپتەردىڭ تاجىريبەسىنەن الىنعان ۇزدىك كەيستەر كورىنىس تاپتى.
تامىز كونفەرەنتسياسىنىڭ التى تاقىرىپتىق الاڭداعى جۇمىسى كاسىبي شەبەرلىكتىڭ ءتيىمدى ساباقتارىنا اينالدى. ءپان مۇعالىمدەرى دەربەس ءبىلىم بەرۋ, باعالاۋ قۇرالدارىن ازىرلەۋ, اتا-انالارمەن ىنتىماقتاستىق ورناتۋ, قولايلى جانە قاۋىپسىز مەكتەپ ورتاسىن قۇرۋ جانە وزگە دە وزەكتى باسىمدىلىقتار اياسىندا بىلىمدەرىن كەڭەيتتى.
قالىپتاسقان ءداستۇر بويىنشا زياتكەرلىك مەكتەپتەردىڭ مۇعالىمدەرى كاسىبي جەتىستىكتەرى ءۇشىن ءبىلىم جانە عىلىم مينيسترلىگى مەن دەربەس ءبىلىم بەرۋ ۇيىمىنىڭ تاراپىنان ماراپاتتارعا يە بولدى.
تامىز كونفەرەنتسياسىنىڭ بارلىق باياندامالارى مەن كاسىبي كەيستەرى بۇگىندە نازارباەۆ زياتكەرلىك مەكتەپتەرىنىڭ بارشا عالامتور پلاتفورمالارىندا قولجەتىمدى.
قازاقستانداعى جانە الەمدەگى سوڭعى جاڭالىقتاردى ءبىرىنشى بولىپ وقۋ ءۇشىن Telegram جەلىسىندە بىزگە جازىلىڭىز.
