ايماقتار • 20 تامىز، 2020

ەسىرتكىگە قارسى كۇرەستە بەتپەردە دە پايدالانىلۋدا

22 رەت كورسەتىلدى

سولتۇستىك قازاقستان وبلىسىنىڭ پوليتسەيلەرى مەن ەرىكتىلەرى بۇگىنگى كۇنى سۇرانىسقا يە بولىپ وتىرعان بەتپەردەلەرگە "ەسىرتكىگە جول جوق" لوگوتيپىن جاپسىرىپ، ستۋدەنتتەرگە، كوپ بالالى وتباسىلارعا، حالىقتىڭ الەۋمەتتىك ءالسىز توپتارىنىڭ وكىلدەرىنە 2 مىڭ داناسىن تەگىن تاراتتى. وبلىستىق پد ەسىرتكى قىلمىسىنا قارسى ءىس-قيمىل باسقارماسىنىڭ قىزمەتكەرلەرى اكتسيانى وتكىزۋ ءۇشىن ەرىكتىلەرمەن بىرلەسە وتىرىپ، وسىنداي بەتپەردەلەر دايىنداعان ەدى، دەپ جازادى Egemen.kz

2018 جىلدان بەرى قالا اكىمدىگىنىڭ جاستار رەسۋرستىق ورتالىعىنىڭ مۇشەسى بولىپ كەلگەن سامات باەكين بەتپەردەگە لوگوتيپ جاپسىرىپ تاراتۋدى تابىلعان اقىل دەپ سانايدى. "بەتپەردە ينفەكتسيادان قورعانۋ عانا ەمەس، سونىمەن بىرگە سالاۋاتتى ءومىر سالتىن ۇستانۋعا شاقىرادى"، دەيدى ول. "ەسىرتكى – ءبىزدىڭ زامانىمىزدىڭ باستى قاۋىپتەرىنىڭ ءبىرى. سوندىقتان ءبىز قوعامدى قورعاۋ جانە كوركەيتۋ جۇمىسىندا جۇرگەن ءتارتىپ ساقشىلارىن قولداۋعا تىرىسامىز".

بەتپەردەلەر تاراتىلعاننان كەيىن ەرىكتىلەر پوليتسەيلەرمەن بىرلەسىپ، "چەرەمۋشكي" اۋدانىندا رەيد وتكىزىپ، ۇيلەر مەن گاراجداردىڭ قابىرعالارىندا ەسىرتكى ساۋداسىمەن اينالىساتىنداردىڭ ۆەب-رەسۋرستارىن جارنامالايتىن 60-تان استام گراففيتيىن  جويدى.

"7 ايدىڭ ىشىندە پوليتسەيلەر مەن وبلىستىڭ قامقور تۇرعىندارىنىڭ بىرلەسكەن كۇشى 257 ەسىرتكى گراففيتيىن جويدى. جىل باسىندا ەسىرتكىنى جارنامالاۋشىلارعا قىلمىستىق جاۋاپكەرشىلىك ارتتىرىلعاننان بەرى ولاردىڭ سانى كۇرت تومەندەدى، ەندى ولار 6 جىلعا دەيىن باس بوستاندىعىنان ايىرىلۋى مۇمكىن. وسىعان قاراماستان پروبلەما شەشىلەر ەمەس، ءبىز ءوز ارەكەتىمىزبەن قوعامنىڭ نازارىن اۋدارىپ، ەسىرتكى سياقتى اپات وتباسىلارعا كۇتپەگەن جەردەن كەلۋى مۇمكىن ەكەندىگىن ەسكە سالعىمىز كەلدى"، دەيدى سولتۇستىك قازاقستان وبلىسى پد باستىعىنىڭ ورىنباسارى، پوليتسيا پولكوۆنيگى رۋسلان نازاروۆ.

 

قازاقستانداعى جانە الەمدەگى سوڭعى جاڭالىقتاردى ءبىرىنشى بولىپ وقۋ ءۇشىن Telegram جەلىسىندە بىزگە جازىلىڭىز.

سوڭعى جاڭالىقتار

ۇقساس جاڭالىقتار