سۋرەت «ەگەمەن قازاقستاننىڭ» ارحيۆىنەن الىندى
قالىپتاسقان ەپيدەميالىق جاعدايلارعا بايلانىستى 2020-2021 وقۋ جىلى قاشىقتان ءبىلىم بەرۋ فورماتىندا باستالادى. اتا-انالاردىڭ قالاۋى بويىنشا مەكتەپتەردە 1-4 سىنىپ وقۋشىلارى ءۇشىن كەزەكشى سىنىپتار جۇمىس ىستەيتىن بولادى. ءبىر سىنىپتا ءبىلىم الۋشىلار سانى 15-تەن اسپايدى.
پەداگوگيكالىق كەڭەس بارىسىندا پەداگوگتەرگە وقىتۋ ەرەجەلەرى مەن كەزەكشى سىنىپتاردا سانيتارلىق قاۋىپسىزدىكتى قامتاماسىز ەتۋ شارالارى ەگجەي-تەگجەيلى تۇسىندىرىلەدى. وقۋشىلار مەن پەداگوگتەردىڭ تەمپەراتۋراسى كۇندە ولشەنىپ, دەنە قىزۋى نورمادان جوعارى بولعان جاعدايدا جانە اۋرۋ بەلگىلەرى انىقتالسا, پەداگوگتەر جۇمىسقا كىرىسپەيدى, ال وقۋشىلاردى ۇيلەرىنە قايتارادى.
«ەگەر اتا-انالار نەمەسە بالالاردىڭ زاڭدى وكىلدەرى نيەت ءبىلدىرىپ, ءوتىنىش جازسا, ال مەكتەپ سانيتارلىق نورمالاردى قاتاڭ ساقتاۋعا دايىن بولسا, باستاۋىش سىنىپ وقۋشىلارى مەكتەپ قابىرعاسىندا وقي الادى. مەكتەپتەردە جوعارى سىنىپ وقۋشىلارىنىڭ كابينەتتەرى بوس بولعاندىقتان, بۇل كابينەتتەردى دە باستاۋىش سىنىپتاردى وقىتۋدى ۇيىمداستىرۋ ءۇشىن پايدالانۋعا بولادى. اتا-انالاردىڭ وتىنىشتەرىن سىنىپ جەتەكشىلەرى قولجەتىمدى بايلانىس قۇرالدارى ارقىلى ونلاين-فورماتتا قابىلدايدى. مەكتەپ فورماسىنا قاتىستى: جالپى فورماعا قويىلاتىن تالاپتار جويىلمايدى, بىراق ۋاقىتشا وزگەرىستەر ەنگىزىلدى, سوعان بايلانىستى بيىل اتا-انالار بالانى مەكتەپ فورماسىندا نەمەسە باسقا دا ىڭعايلى كيىممەن جىبەرۋ تۋرالى شەشىمدى ءوزى قابىلدايدى», دەدى ءبىلىم جانە عىلىم مينيسترلىگىنىڭ ءباسپاسوز قىزمەتى.
مەكتەپتەردەگى كومپيۋتەرلەر بالالارعا ۋاقىتشا پايدالانۋعا بەرىلەدى. سونىمەن قاتار ءبىلىم باسقارمالارى, بولىمدەرى قوسىمشا كومپيۋتەرلەر, نوۋتبۋكتەر, پلانشەتتەر ساتىپ الىپ, قابىلداۋ-تاپسىرۋ اكتىلەرى نەگىزىندە وقۋشىلارعا تاپسىرادى.
ءاربىر ءوڭىر, ءبىلىم بەرۋ ۇيىمى قاشىقتان وقىتۋدى ۇيىمداستىراتىن ينتەرنەت-پلاتفورمانى ءوزى تاڭدايدى. قاشىقتان وقىتۋ فورماتى اياسىندا مۇعالىمدەر مەن وقۋشىلار پلاتفورما ارقىلى ستريمينگ جۇيەسىن قولداناتىن بولادى. سونداي-اق پەداگوگيكالىق كەڭەستە مۇعالىمدەرگە ساباقتى ۇيىمداستىرۋ بويىنشا ۇسىنىستار تالقىلانىپ جاتىر. شالعايداعى اۋىلدىق ەلدى مەكەندەردە ورنالاسقان شاعىن جيناقتى مەكتەپتەردە كۇندىزگى فورماتتا وقىتۋدى ۇيىمداستىرۋ ماسەلەسى دە نازاردان تىس قالمايدى.
كۇن تارتىبىندەگى تاعى ءبىر ماڭىزدى تاقىرىپ – كارانتيندىك جانە شەكتەۋ شارالارى جاعدايىندا 2-11(12) سىنىپتارداعى وقۋشىلاردىڭ وقۋ جەتىستىكتەرىن باعالاۋ. پەداگوگيكالىق كەڭەستەردە ءبىلىم الۋشىلاردىڭ وقۋ جەتىستىكتەرىن باعالاۋ جۇيەسىندەگى ۋاقىتشا وزگەرىستەر تالقىلانىپ جاتىر.
