جاس ونەرتاپقىش ءيمپۋلستى, تەمپەراتۋرانى, سونىمەن قاتار بالانىڭ گەولوكاتسياسىن قاداعالاي الاتىن جانە بۇل تۋرالى اتا-اناعا حابارلاما جىبەرەتىن جاڭالىق ويلاپ تاۋىپ, وعان «Your friend» دەگەن اتاۋ بەرىپتى.
ءمولدىر ايجارىق بۇل بيزنەس-جوبانى 11-سىنىپتان باستاپ ۇستازى ءاليا جۋسانباەۆانىڭ جەتەكشىلىگىمەن ەكونوميكا ساباعىندا قولعا الا باستاعان ەكەن. «قوعامنىڭ ماسەلەلەرىن زەرتتەي وتىرىپ, كوپتەگەن اتا-انا بالاسىنىڭ دەنساۋلىعىنا ءتيىستى ۋاقىت بولە المايتىندىعىن بايقادىم. ويتكەنى ولار كوپ ۋاقىتىن جۇمىستا وتكىزەدى. وسى ماسەلەلەردى زەرتتەي كەلە, بالانىڭ دەنساۋلىعىن باقىلايتىن جانە اتا-اناسىنا مالىمەت جىبەرە الاتىن سمارت-بىلەزىك جاساۋ يدەياسى پايدا بولدى», دەيدى ول. ايتا كەتەيىك, جاس عالىم ZhasCamp Accelerator الەۋمەتتىك جوبالاردى دامىتۋ باعدارلاماسىنىڭ تۇلەگى. اتالعان باعدارلامانىڭ ناتيجەسىندە ول عالىم جانە Technologies Lab باس ديرەكتورى تيمۋر رىسپەكوۆ سىندى تالىمگەر تاپقان. كەيىننەن مەنتوردىڭ جەتەكشىلىگىمەن كود جازىپ, قۇرىلعىنىڭ جۇمىس ءپروتوتيپىن جاساپ شىققان. قازىرگى كەزدە ول جوباسىن دامىتۋ ۇستىندە. سونداي-اق ءمولدىر ايجارىق ويلاپ تاپقان قۇرىلعى پايدالانۋشى سەنسورلاردى ءوز قاجەتتىلىگىنە ساي اۋىستىرا الادى ەكەن. بۇگىندە تەك ءوندىرىس پەن اتالعان جوبانى ودان ءارى دامىتۋ ءۇشىن ينۆەستيتسيالار تارتۋ ماسەلەسى عانا قالىپ تۇر. جوبا 3 جاستان 8 جاسقا دەيىنگى بالالارعا ارنالعان. ونەرتاپقىش ەندى اتالعان جوبا ارقىلى اۋديتوريانى كەڭەيتۋدى جوسپارلاپ وتىر. سونىمەن قاتار مۇمكىندىگى شەكتەۋلى جاندار مەن قۇتقارۋشىلاردى قامتۋ دا ويىندا بار ەكەن. بۇگىندە جاس ونەرتاپقىش وسى بيزنەس-جوسپار بويىنشا بەلسەندى جۇمىس ىستەۋدە. ال جوعارى وقۋ ورنىنا تۇسكەن سوڭ ءارتۇرلى ماماندىق ستۋدەنتتەرىنەن جوبالىق توپ قۇرۋدى جوسپارلاۋدا.
جامبىل وبلىسى
