ەكولوگيا, گەولوگيا جانە تابيعي رەسۋرستار ءمينيسترى م. مىرزاعاليەۆ, اۋىل شارۋاشىلىعى ءمينيسترى س. وماروۆ, سونداي-اق «حاميت» بالىق شارۋاشىلىعىنىڭ وكىلى ب. سەرمانيزوۆ, «Caspian Riviera» بالىق شارۋاشىلىعىنىڭ وكىلى ر. حاميتوۆا, «KingFish» بالىق شارۋاشىلىعىنىڭ وكىلى م. ءتۇرسىنالى بايانداما جاسادى. بالىق اۋلاۋ جانە ونى كوبەيتۋ — ازىق-ت ۇلىك ءونىمى وندىرىسىندەگى باسىم سالالاردىڭ ءبىرى. قازاقستاندا تاۋارلى بالىق وسىرۋمەن 180 بالىق ءوسىرۋ شارۋاشىلىعى اينالىسادى. بيىلعى اقپان ايىندا اتىراۋ قالاسىندا ۇكىمەت باسشىسىنىڭ توراعالىعىمەن وتكەن كەڭەستىڭ قورىتىندىسى بويىنشا اكىمشىلىك كەدەرگىلەردى ازايتۋعا جانە بالىق شارۋاشىلىعى سالاسىن دامىتۋ ءۇشىن وڭتايلى جاعدايلار جاساۋعا باعىتتالعان بىرقاتار زاڭنامالىق باستامالار ازىرلەندى. سۋ رەسۋرستارىن پايدالانعانى ءۇشىن تولەمدى وڭتايلاندىرۋعا, بالىق ءوسىرۋ شارۋاشىلىعىن (ونىڭ ىشىندە سۋ قورعاۋ بەلدەۋىندە) ءتيىمدى ايماقتارعا بولۋگە جانە ورنالاستىرۋعا, بالىق اۋلاۋدىڭ جانە بالىق اۋلايتىن كەمەلەر جۇمىسىنىڭ ءتيىمدى كەستەسىن بەلگىلەۋگە, تىيىم سالىنعان بالىق اۋلاۋ قۇرالدارىنىڭ اينالىمى ءۇشىن جاۋاپكەرشىلىكتى بەلگىلەيتىن نورمالاردى قاتاڭداتۋعا ەرەكشە نازار اۋدارىلدى. بارلىق قاجەتتى زاڭنامالىق تۇزەتۋلەر بيىلعى قىركۇيەكتە پارلامەنتكە ەنگىزىلەدى. جەمشوپتى سۋبسيديالاۋ (25% دەيىن) جانە ينۆەستيتسيالىق شىعىنداردى وتەۋ (30% دەيىن) تۇرعىسىنان قوسىمشا مەملەكەتتىك قولداۋ شارالارى كورسەتىلىپ جاتىر. تاۋارلى بالىق ءوسىرۋدى دامىتۋعا باعىتتالعان ينۆەستيتسيالىق جوبالارعا جەڭىلدەتىلگەن نەسيە بەرۋ كوزدەلگەن. جالپى, سالا ايتارلىقتاي الەۋەتكە يە جانە سەرپىندى ءوسىم كورسەتۋدە. قابىلدانىپ جاتقان شارالاردىڭ ارقاسىندا بيىل وسىرىلگەن تاۋارلى بالىقتىڭ كولەمىن سوڭعى ەكى جىلدا 1,6 ەسەگە ءوسىرىپ (2018 جىلى – 5,6 مىڭ توننا, 2019 جىلى – 7,4 مىڭ توننا), 9 مىڭ تونناعا جەتكىزۋ جوسپارلانىپ وتىر. بۇل رەتتە وسىرىلەتىن بالىقتىڭ نەگىزگى كولەمى تۇركىستان وبلىسى (شامامەن 68%), الماتى, سولتۇستىك قازاقستان جانە شىعىس قازاقستان وبلىستارىنا تيەسىلى. پرەمەر-مينيستر بالىق ءوندىرىسىنىڭ كولەمى ايتارلىقتاي ۇلعايىپ, 2030 جىلعا قاراي 600 مىڭ تونناعا دەيىن جەتكىزىلۋى مۇمكىن ەكەنىن اتاپ ءوتتى. سونىمەن قاتار بالىق سالاسى اوك قۇرىلىمىندا نەگىزگىلەردىڭ بىرىنە اينالۋى ءتيىس, ەكسپورت كولەمى 10 ەسە — 300 مىڭ تونناعا دەيىن ۇلعايتىلىپ, كەمىندە 100 مىڭ قوسىمشا جۇمىس ورنى قۇرىلۋى ءتيىس. ء«ار وڭىردە بالىق ءوندىرىسى ۇيىمداستىرىلۋى ءتيىس, بيزنەس سۋبەكتىلەرىنە سۋ قويمالارى بەكىتىلىپ, جاڭا اۋلانعان ساپاسى جوعارى بالىق ساتاتىن ساۋدا ورىندارىنىڭ سانىن ارتتىرۋ كەرەك. ازاماتتاردىڭ پايدالى تاماقتانۋ راتسيونىن قامتاماسىز ەتۋ ءۇشىن دۇنيەجۇزىلىك دەنساۋلىق ساقتاۋ ۇيىمىنىڭ ۇسىنىسى بويىنشا ءبىر ادامعا بالىقتى تۇتىنۋ دەڭگەيىن 16 كيلوگرامعا جەتكىزۋ كەرەك (بۇگىندە قر-دا — جىلىنا 3-4 كگ)», — دەدى ا. مامين. ۇكىمەت باسشىسى بيىلعى 1 قاراشاعا دەيىن بالىق شارۋاشىلىعىن دامىتۋدىڭ وڭىرلىك باعدارلامالارىن ازىرلەۋدى جانە بەكىتۋدى تاپسىردى, وندا باسىم سۋبسيديالاۋ, جەر تەلىمدەرىن ءبولۋ, ينفراقۇرىلىم جۇرگىزۋ بويىنشا ناقتى ينديكاتورلار مەن ءىس-شارالار جانە باسقا دا مەملەكەتتىك قولداۋ شارالارى كورسەتىلۋى ءتيىس. ەكولوگيا مينيسترلىگىنە مۇددەلى مەملەكەتتىك ورگاندارمەن بىرگە ءبىر اي مەرزىمدە بيزنەس قاۋىمداستىقتارمەن بالىق شارۋاشىلىعى سالاسىن سۋبسيديالاۋدى كەڭەيتۋ جونىندەگى ۇسىنىستاردى پىسىقتاۋ, ءبىلىم جانە عىلىم مينيسترلىگىمەن بىرگە جوعارى وقۋ ورىندارىنىڭ وقۋ جانە تاجىريبەلىك باعدارلامالارىن بالىق اۋلاۋدان بالىق وسىرۋگە باسا نازار اۋدارا وتىرىپ, قايتا قاراۋ تاپسىرىلدى. قارجى مينيسترلىگىنە ساۋدا مينيسترلىگىمەن بىرگە شەت ەلدەن بالىقتىڭ باعالى تۇرلەرىنىڭ بالىق ءوسىرۋ ماتەريالىن جەتكىزۋدى جانە ولاردى تاسىمالداۋ كەزىندە شەكارادا باقىلاۋدىڭ بارلىق تۇرلەرىنەن ءوتۋدى راسىمدەۋ ءراسىمىن وڭايلاتۋ جونىندەگى ۇسىنىستاردى پىسىقتاۋ تاپسىرىلدى.
قازاقستانداعى جانە الەمدەگى سوڭعى جاڭالىقتاردى ءبىرىنشى بولىپ وقۋ ءۇشىن Telegram جەلىسىندە بىزگە جازىلىڭىز.
