جوعارعى سوت توراعاسى قايرات ءمامي بەينە بايلانىس ارقىلى وبلىستىق جانە وعان تەڭەستىرىلگەن سوتتاردىڭ توراعالارىمەن جانە سۋديالارىمەن, سۋديا ادەبى جونىندەگى وڭىرلىك كوميسسيالاردىڭ جەتەكشىلەرىمەن, وبلىس ورتالىقتارى مەن قالا ماڭىندا ورنالاسقان اۋداندىق سوتتاردىڭ توراعالارىمەن جۇمىس كەڭەسىن وتكىزدى. بۇل تۋرالى BNews. kz حابارلادى.
بەينە بايلانىستا سوت تورەلىگىن جۇزەگە اسىرۋدىڭ قازىرگى جاعدايى تۋرالى ماسەلە قوزعالىپ, بيىلعى 9 ايداعى اتقارىلعان جۇمىستارعا قىسقاشا شولۋ جاسالدى. رەسپۋبليكا بويىنشا سوت اكتىلەرىنىڭ 9,5 پايىزىنا شاعىم ءتۇسىپ, ءاربىر ەكىنشى سوت شەشىمىنىڭ كۇشى جويىلعان. ال وسى مەرزىمدە اۋداندىق سوتتاردىڭ 1796 ادامعا قاتىستى ۇكىمى دە قاتە دەپ تانىلدى. بۇل كورسەتكىشتى بىلتىرعىمەن سالىستىرساق, 2 پايىزعا جوعارى بولىپ وتىر. سونداي-اق جەرگىلىكتى سوتتاردىڭ 6 مىڭعا جۋىق شەشىمدەرىنىڭ كۇشى جويىلعان. مۇنان وزگە, قاداعالاۋ جانە كاسساتسيالىق ساتىداعى سوتتار الماتى قالاسى سوتتارىنىڭ 45 شەشىمىن, استانا قالاسى سوتتارىنىڭ 18 شەشىمىن جانە شىعىس قازاقستان وبلىسى سوتتارىنىڭ 16 شەشىمىن قالپىنا كەلتىرىپتى. جالپى, بيىل 39 سۋديا تارتىپتىك جاۋاپكەرشىلىككە تارتىلىپ, ونىڭ 8-ءى جۇمىستان شىعارىلعان جانە 2 سۋديا سوتتالعان.
«بيىل ەكى مىڭعا جۋىق ادام سۋديالار قاتەلىگىنىڭ قۇربانى بولدى. سوت بيلىگى بەدەلىنىڭ تومەندەۋى مەن سۋديالارعا دەگەن سەنىمسىزدىكتىڭ باستى سەبەبى وسىندا. وسىنىڭ ناتيجەسىندە ءبىز قوعاممەن تۇسىنىسە الماي ءجۇرمىز»,- دەدى ءسوز ورايىندا جوعارعى سوت توراعاسى ق. ءمامي.
جيىن قورىتىندىسىندا جوعارعى سوت توراعاسى وبلىستىق جانە وعان تەڭەستىرىلگەن سوتتاردىڭ توراعالارىنىڭ بارلىعىنا ەڭبەك ءتارتىبىن ساقتاۋ ماسەلەسىن جەكە باقىلاۋعا الۋعا تاپسىرما بەردى. سونىمەن بىرگە, وڭىرلىك جەتەكشىلەرگە سىبايلاس جەمقورلىق كورىنىستەرىنىڭ الدىن الۋ جۇمىستارىن جانداندىرۋدى تاپسىردى.
ءامىرحان الماعانبەتوۆ.
