قوعام • 12 تامىز، 2020

الماتى ينفراقۇرىلىمىن جاقسارتۋداعى ماڭىزدى شەشىمدەر قالالىقتاردىڭ پىكىرى ارقىلى قابىلدانادى

24 رەت كورسەتىلدى

بۇل تۋرالى قالا اكىمى باقىتجان ساعىنتاەۆ "الماتى" تەلەارناسىنداعى Akimat Live باعدارلاماسىنىڭ تىكەلەي ەفيرىندە الماتىلىقتاردىڭ سۇراقتارىنا جاۋاپ بەرە وتىرىپ، مالىمدەدى، دەپ حابارلايدى Egemen.kz

كەزەكتى حاباردا ب.ساعىنتاەۆ قالانىڭ ينفراقۇرىلىمىن جاقسارتۋعا قاتىستى بىرقاتار سۇراققا جاۋاپ بەردى.

"جول، سۋمەن قامتۋ جەلىسىن سالۋ، جارىقتاندىرۋ، قاۋىپسىزدىكتى قامتاماسىز ەتۋ، اۋلالاردى اباتتاندىرۋ، بالا باقشالار مەن مەكتەپتەردىڭ قۇرىلىستارىن جۇرگىزۋ جونىندەگى بارلىق ماڭىزدى شەشىمدەر تۇرعىندارمەن كەزدەسۋلەر ارقاسىندا قابىلداندى"، دەپ اتاپ ءوتتى الماتى اكىمى.

ب.ساعىنتاەۆ 2019 جىلدىڭ ەكىنشى جارتىجىلدىعىندا قالا اۋماقتارىن دامىتۋدىڭ بارلىق جوسپارلارى الماتىلىقتاردىڭ پىكىرلەرىن ەسكەرە وتىرىپ، قايتا جاسالعانىن اتادى.

ء"بىرىنشى كەزەكتە قانداي ماسەلەنى شەشۋ قاجەتتىگىن سول اۋماقتا نەمەسە اۋداندا تۇراتىن ادامنان ارتىق ەشكىم بىلمەيدى. مەن تۇرعىندارمەن كەزدەسۋ كەزىندە ناقتى اقپارات الاتىنىما تالاي رەت كوز جەتكىزدىم. مۇنداي كەزدەسۋلەردىڭ قانشالىقتى پايدالى ەكەندىگى جونىندە سۇراق قويعان جانمەن تولىق كەلىسەمىن. ارينە، جۇمىستىڭ بۇل ءتۇرى ودان ءارى جالعاساتىن بولادى. مەن ءوزىم اشىقتىقتى ءارى قالا تۇرعىندارىمەن ەركىن اڭگىمەلەسۋدى قولدايمىن"، دەدى ب.ساعىنتاەۆ.

تامىز ايىنان باستاپ وتكەن جىلدىڭ سوڭىنا دەيىن الماتى اكىمى قالا تۇرعىندارىمەن 16 كەزدەسۋ ء(ار اۋداندا ەكى رەت) وتكىزدى، بۇل تۇرعىنداردى تولعاندىراتىن سۇراقتاردى تىڭداۋعا مۇمكىندىك بەردى. بۇدان وزگە، الماتىلىقتار اكىمنىڭ جۇمىس ساپارى كەزىندە وتىنىشتەرى مەن تىلەكتەرىن ءبىلدىردى.

ء"بىز مۇنداي كەزدەسۋلەردى وسى جىلدىڭ ەكىنشى توقسانىنان باستاپ جالعاستىرۋدى جوسپارلاعانبىز، بىراق پاندەمياعا، ەلدە توتەنشە جاعدايدىڭ جاريالانۋىنا جانە كارانتيندىك شارالارعا بايلانىستى ولاردى توقتاتۋعا تۋرا كەلدى. ازىرشە ازاماتتاردى قابىلداۋ ونلاين-بايلانىس ارقىلى جۇرگىزىلۋدە. بۇدان وزگە، "الماتى" تەلەارناسىنىڭ الاڭىندا مەن سىزدەردىڭ سۇراقتارىڭىزعا ۇنەمى جاۋاپ بەرەتىن بولامىن"، دەپ اتاپ ءوتتى الماتى اكىمى.

ەسكە سالساق، قالالىق جانە اۋداندىق اكىمدىكتەردىڭ، باسقارمالاردىڭ الەۋمەتتىك جەلىلەرىندەگى رەسمي اككاۋنتتارعا كەلىپ تۇسكەن بارلىق وتىنىشتەر مەن شاعىمداردى "وpen الماتى" وپەراتورلارى قارايدى. ولاردىڭ ارقايسىسىنا جاۋاپتار بەرىلەدى.

بۇل Akimat Live باعدارلاماسىنىڭ ءۇشىنشى ەفيرى، ونىڭ بارىسىندا الماتى اكىمى باقىتجان ساعىنتاەۆ قالاعا قاتىستى جالپى تاقىرىپتار بويىنشا 20-دان استام وزەكتى سۇراقتارعا جاۋاپ بەردى. الماتىلىقتاردى قالاعا بىرنەشە جىل بۇرىن قوسىلعان ىقشاماۋداندارداعى سۋمەن جابدىقتاۋ، جارىقتاندىرۋ، جول سالۋ ماسەلەلەرىنىڭ قالاي شەشىلىپ جاتقاندىعى جانە بەلگىلەنگەن جوسپارلاردىڭ ورىندالۋىنا ىندەتتىڭ قانشالىقتى اسەر ەتكەنى قىزىقتىردى.

وتكەن اپتادا الماتى اكىمى كۆي-گە قارسى جۇرگىزىلگەن پارمەندى ءىس-شارالار تۋرالى ايتىپ، قالالىقتاردىڭ ەڭ وزەكتى سۇراقتارىنا جاۋاپ بەرگەن بولاتىن.

سوڭعى جاڭالىقتار

الىستان جەتكەن العىس

ايماقتار • بۇگىن، 14:10

ۇقساس جاڭالىقتار