بەيرۋت حالىقارالىق اۋەجايىندا جاساقتى قازاقستان رەسپۋبليكاسىنىڭ ليۆان رەسپۋبليكاسىنداعى ۋاقىتشا سەنىمدى وكىلى ەرجان قالەكەنوۆ, ليۆان رەسپۋبليكاسى قورعانىس مينيسترلىگىنىڭ وكىلى بريگادالىق گەنەرال ابي كارام جانە ليۆان سىرتقى ىستەر مينيسترلىگىنىڭ وكىلى الي ديراني قارسى الدى.
ء"بىز ليۆانعا كومەك كورسەتۋدەگى قازاقستاننىڭ وسى يگى ءىسىن باعالايمىز جانە قر پرەزيدەنتى قاسىم-جومارت توقاەۆقا, كورسەتكەن كومەگى مەن قولداۋى ءۇشىن شىن جۇرەكتەن ريزاشىلىعىمىزدى بىلدىرەمىز", - دەدى ليۆان سىرتقى ىستەر مينيسترلىگىنىڭ وكىلى الي ديراني.
ايتا كەتۋ كەرەك, اعىمداعى جىلدىڭ ءساۋىر ايىندا توتەنشە جاعداي كەزىندە ەلدە كوروناۆيرۋستىق ينفەكتسيانىڭ تارالۋىنا بايلانىستى ارنايى ماقساتتاعى اسكەري-مەديتسينالىق جاساقتار قۇرىلدى. ولار جەدەل ارەكەت ەتۋگە جانە قارۋلى كۇشتەر قولباسشىلىعىنىڭ ارنايى مىندەتتەرىن ورىنداۋعا ارنالعان. اسكەري دارىگەرلەر ەلىمىزدىڭ ءتۇرلى ايماقتارىندا تاپسىرمالاردى ورىندادى جانە قازىر ەل باسشىلىعىنىڭ تاپسىرماسى بويىنشا ليۆان حالقىنا مەديتسينالىق كومەك كورسەتۋ ءۇشىن العا شىقتى.
ءار ءتۇرلى جاعدايدا جۇمىس ىستەۋ ءۇشىن ارنايى ماقساتتاعى اسكەري-مەديتسينالىق جاساقتىڭ پەرسونالى بىتىمگەرشىلىك دايىندىق باعدارلاماسى بويىنشا اعىلشىن ءتىلىن وقىتۋ كۋرستارىنان وتكەن.
ەستەرىڭىزگە سالا كەتەيىك, 8 تامىز كۇنى تاڭەرتەڭ قر پرەزيدەنتى - قازاقستان رەسپۋبليكاسى قارۋلى كۇشتەرىنىڭ جوعارعى باس قولباسشىسىنىڭ تاپسىرماسى بويىنشا پورتتاعى جارىلىس سالدارىنان زارداپ شەككەندەرگە مەديتسينالىق كومەك كورسەتۋ ءۇشىن قۇرامىندا 29 اسكەري دارىگەر مەن 4 اۋدارماشىسى بار توپ بەيرۋتقا جىبەرىلگەن بولاتىن.
