بەينەكامەرالاردىڭ كومەگىمەن 100-گە جۋىق قىلمىس اشىلدى

ايماقتار • 10 تامىز، 2020

بەينەكامەرالاردىڭ كومەگىمەن 100-گە جۋىق قىلمىس اشىلدى

13 رەت كورسەتىلدى

اتىراۋدا بەينەكامەرالاردىڭ كومەگىمەن 96 قىلمىس اشىلدى، – دەپ حابارلايدى Polisia.kz.

قوعامدىق قاۋىپسىزدىكتى قامتاماسىز ەتۋدە، قۇقىق بۇزۋشىلىق پەن قىلمىستىڭ الدىن الۋدا قالالىق پوليتسيا باسقارماسى جەدەل باسقارۋ ورتالىعى بەينەكامەرالارىنىڭ ءرولى ايتارلىقتاي. ءتارتىپ ساقشىلارىنىڭ مۇنداي سەنىمدى “كومەكشىلەرى” بەينە كامەرالار وبلىس ورتالىعىنداعى كوشەلەر مەن ادامدار جينالىپ، دەمالاتىن الاڭداردا، كوشە قيىلىستارىندا جانە كوپ قاباتتى ۇيلەردىڭ اۋلالارىندا ورنالاستىرىلعان.

"بۇگىندە قالاداعى 700-دەن استام بەينەكامەرالاردى پوليتسيا باسقارماسى جەدەل باسقارۋ ورتالىعىنىڭ قىزمەتكەرلەرى تاۋلىك بويى قاداعالاپ وتىرادى. اتىراۋدا بيىلعى جىل باسىنان بەينەكامەرانىڭ كومەگىمەن 7998 اكىمشىلىك قۇقىقبۇزۋشىلىق انىقتالدى. ولاردىڭ اراسىندا كوشەدە، قوعامدىق ورىنداردا الكوگولدىك ىشىمدىكتەردى ءىشۋ نەمەسە ماساڭ كۇيدە ءجۇرۋ، شىلىم قالدىعىن، قوقىستاردى قالدىرۋ، جاسىل جەلەكتەردى ءبۇلدىرۋ، سونىمەن قاتار، كارانتين رەجيمىنە قاتىستى شەكتەۋلەردى ورىنداماۋ، ت.ب. بۇزۋشىلىقتار ءجيى ورىن الادى"، – دەدى اتىراۋ وبلىسى پوليتسيا دەپارتامەنتىنىڭ باستىعى قامزا ۇمبەتقاليەۆ.

2019 جىلدىڭ جەتى ايىندا جەدەل باسقارۋ ورتالىعىنىڭ بەينەباقىلاۋ كەزەكشى-ينسپەكتورلارىمەن 47-ءى قىلمىس اشكەرەلەنگەن، ال بيىل 96 قىلمىس بەينەكامەرالاردىڭ كومەكتەرىمەن ء“ىزى سۋىماي” اشىلعان. قالالىق پوليتسياعا 12 ماۋسىم كۇنى ارىزدانعان 1946 جىلى تۋعان ايەل، ساعات 15.05 شاماسىندا بەلگىسىز ادام اۋەزوۆ كوشەسىندەگى ۇيلەردىڭ ءبىرىنىڭ الدىندا موينىنداعى القاسىن تارتىپ الىپ كەتكەنى تۋرالى حابارلاعان.

جەدەل ىزدەستىرۋ شارالارى بارىسىندا، سول ماڭايدا ورنالاسقان بەينەكامەرالاردىڭ كومەگىمەن، كۇدىكتى ازامات ارىزدانۋشىنىڭ ايتقان بەلگىلەرى بويىنشا انىقتالىپ، ۇستالىپ، ودان ايعاق زات تاركىلەندى.قر قىلمىستىق كودەكسىنىڭ “توناۋ” بابىمەن سوتقا دەيىنگى تەرگەپ-تەكسەرۋ جۇرگىزىلۋدە.

سونىمەن قاتار، بەينەكامەرالاردىڭ “كوزىنەن” جول قوزعالىسى ەرەجەلەرىن بۇزعاندار دا تىس قالمايدى. جىل باسىنان بەرى وسىنداي 6415 فاكتى انىقتالىپ، قۇقىق بۇزۋشىلار اكىمشىلىك جاۋاپكەرشىلىككە تارتىلدى. جالپى، تالداۋ كورسەتكەندەي، قالاداعى بەينەكامەرالار ورنالاسقان اۋماقتاردا قۇقىق بۇزۋشىلىقتار از تىركەلۋدە.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز