قازاقستان • 09 تامىز، 2020

التىن استىق قامباعا قۇيىلا باستادى

43 رەت كورسەتىلدى

بۇدان بۇرىن حابارلاعانىمىزداي سولتۇستىكتىڭ كەيبىر شارۋاشىلىقتارى ەرتە پىسكەن استىققا وراق ءتۇسىرىپ ۇلگەرگەن. قازىر كەڭ دالانىڭ توسىندە استىق كەمەلەرى كۇندىز-ءتۇنى جۇيتكىپ ءجۇر، دەپ جازادى Egemen.kz

جاقسىباي سامرات

الايدا كەيبىر اۋدانداردىڭ شارۋاشىلىقتارى التىن استىققا وراق تۇسىرۋگە اسىقپاي، تەحنولوگيالىق مەرزىمدى قاتاڭ ساقتاپ، ورۋعا تەك جاقىن كۇندەردە كىرىسپەكشى. سونىڭ ىشىندە ايىرتاۋ اۋدانىنىڭ ديحاندارى دا بار. اۋدان اكىمى دارحان ءامريننىڭ ايتۋىنا قاراعاندا: "بيىل اۋدان 370 مىڭ گەكتار جەرگە استىق ەككەن. بارلىق تەحنولوگيالىق تالاپتاردى ديحاندار ورىنداۋعا تىرىستى. سونىڭ ىشىندە 10 مىڭ توننا مينەرالدىق تىڭايتقىشتار سەبىلدى. ءارامشوپتى قۇرتۋدا حيميالىق قۇرالدار ۋاقتىلى قولدانىلدى. سونىڭ ارقاسىندا استىق تا بىتىك شىقتى. استىق ورۋعا جاپپاي كىرىسۋدى 10-15 تامىز ارالىعىندا جوسپارلاعان ەدىك، الايدا بۇگىنگى كۇننىڭ وزىندە استىقتارى ءپىسىپ ۇلگەرگەن 5-6 شارۋاشىلىق ۇلكەن وراققا كىرىسىپ كەتتى. ءبىز بيىل تەحنيكالىق پاركتى جاڭارتۋعا دا ۇلكەن نازار اۋداردىق. شارۋالار بيىل 2،4 ملرد تەڭگەگە 170 بىرلىك ءتۇرلى تەحنيكالار ساتىپ الدى"، دەيدى ول.

سونىمەن بىرگە بيىل ايىرتاۋلىق ديحاندار ءوز جۇمىسكەرلەرىنىڭ ەڭبەكاقىسىن 30 پايىزعا دەيىن ارتتىرۋدى كوزدەپ وتىرعان كورىنەدى. بيىلعى استىقتىڭ شىعىمدىلىعى جوعارى. ماسەلەن، وراققا كىرىسىپ كەتكەن "ساۋمالكول اگرو" جشس ديحاندارى بۇگىنگى كۇننىڭ وزىندە ارپانىڭ گەكتارىنان 22 تسەنتنەردەن الىپ جاتقان كورىنەدى. بىلتىرعى شىعىمدىلىق بۇدان ەكى ەسە تومەن بولعان.

ەلىمىزدىڭ ەڭ باستى بايلىعى – التىن استىق قىرمانعا امان ءتۇسىپ، قويماداعى قورلارىمىزدى تولتىرسا ەشكىمنىڭ مۇرتىن بالتا شاپپايدى. قازىر جالعىز قىزىلجار ءوڭىرى عانا ەمەس، بارشا قازاقستاندىقتار وسى تىلەكتە ەكەنى انىق.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز