قازاقستان رەسپۋبليكاسىنىڭ تۇڭعىش پرەزيدەنتى قورىنىڭ ءماجىلىس زالىندا كورنەكتى ازەربايجان جازۋشىسى جانە مەملەكەت-قوعام قايراتكەرى يۋنۋس وگۋزدىڭ ورىس تىلىندە ەكى كىتاپ بولىپ جارىق كورگەن «تەمىرلان» رومانىنىڭ تۇساۋكەسەرى ءوتتى.
قازاقستان رەسپۋبليكاسىنىڭ تۇڭعىش پرەزيدەنتى قورىنىڭ ءماجىلىس زالىندا كورنەكتى ازەربايجان جازۋشىسى جانە مەملەكەت-قوعام قايراتكەرى يۋنۋس وگۋزدىڭ ورىس تىلىندە ەكى كىتاپ بولىپ جارىق كورگەن «تەمىرلان» رومانىنىڭ تۇساۋكەسەرى ءوتتى.
الماتىداعى «ءداۋىر» باسپاسىنان جارىق كورگەن بۇل ەڭبەكتىڭ تانىستىرىلىمىنا باكۋدەن رومان اۆتورى جانە كورنەكتى ازەربايجان جازۋشىسى ءارى اقىنى, ماحمۇت قاشقاري اتىنداعى حالىقارالىق قوردىڭ قۇرىلتايشىسى ءھام اتقارۋشى ديرەكتورى, قازاق ادەبيەتىمەن تىعىز قارىم-قاتىناس جاساپ جۇرگەن اۋدارماشى ەلحان زال قاراحانلى كەلىپ قاتىستى. ايتا كەتۋ كەرەك, ەلحان زال بۇعان دەيىن قازاقستاننىڭ تۇڭعىش پرەزيدەنتى نۇرسۇلتان نازارباەۆتىڭ «قازاقستان جولى» كىتابىن, سونداي-اق, ولجاس سۇلەيمەنوۆتىڭ ولەڭدەرى مەن بەرىك شاحان ۇلىنىڭ اڭگىمەلەرىن ازەربايجان تىلىنە اۋدارىپ, كىتاپ ەتىپ شىعارتقان بەلگىلى قالامگەر.
يۋنۋس وگۋزدىڭ بۇل «تەمىرلان» اتتى رومانى – بۇعان دەيىن ورىس, اعىلشىن, اراب جانە الەمنىڭ 15 تىلىندە جارىق كورىپ, قالىڭ وقىرماننان جوعارى باعاسىن العان تۋىندى رەتىندە دە الەم ادەبيەتىندە ورنى بولەك شىعارما. اۆتوردىڭ ايتۋىنشا, بولاشاقتا بۇل شىعارما قازاق تىلىندە جارىق كورمەك. شىعارما ورىس تىلىندە جارىق كورگەنىمەن, يۋنۋس وگۋز باۋىرلاس قازاق ەلى, قازاقستاندىق وقىرماندارعا اتالمىش ەڭبەكتى تارتۋ ەتۋدى ماقسات تۇتىپتى.
تۇساۋكەسەر جيىنىن جازۋشى بەرىك شاحان ۇلى سالتاناتتى تۇردە اشىپ, كەش قوناقتارىنا ەكى ەلدىڭ ىنتىماقتاستىعى, ادەبي بايلانىستارى مەن مادەني قارىم-قاتىناستارى تۋرالى سىرلى سۇحبات تۇرىندە جۇرگىزىپ وتىردى. كەزدەسۋدە ازەربايجان جازۋشىسى ەلحان زال قاراحانلى, «الاش» عىلىمي-زەرتتەۋ ورتالىعىنىڭ باس ديرەكتورى حايروللا عابجالەلوۆ, قالامگەر مالىك وتارباەۆ, جازۋشى-اۋدارماشى گۇلزادا مىرزاحمەتوۆا, بەلگىلى ءتىل مامانى, قوعام قايراتكەرى اسىلى وسمانقىزى, ۇيعىردىڭ كورنەكتى جازۋشىسى احمەتجان ءاشيري ءسوز سويلەپ, وسى شىعارمانىڭ قۇندى جاقتارى مەن ۇتىمدى جەلىسىنە توقتالىپ, باۋىرلاس قازاق-ازەربايجان ەلدەرىنىڭ اراسىندا ادەبي بايلانىستى جانداندىرا ءتۇسۋ جونىندە پىكىرلەرىن ورتاعا سالدى.
قانات ەسكەندىر,
«ەگەمەن قازاقستان».
الماتى.
