ايماقتار • 05 تامىز، 2020

"استانا-ادالدىق الاڭى" مەملەكەت پەن قوعام اراسىنداعى ديالوگ الاڭىنا اينالدى

19 رەت كورسەتىلدى

نۇر-سۇلتان قالاسى اكىمىنىڭ ورىنباسارى باقتيار ماكەننىڭ توراعالىعىمەن "استانا – ادالدىق الاڭى" جوباسىنىڭ سوڭعى جەتى اي قورىتىندىسى بويىنشا كەڭەس ءوتتى، دەپ حابارلايدى ەلوردا اكىمدىگىنىڭ رەسمي سايتى.

كەڭەسكە سىبايلاس جەمقورلىققا قارسى ءىس-قيمىل دەپارتامەنتى باسشىسىنىڭ ءبىرىنشى ورىنباسارى جازيرا جىلقىشيەۆا، جوبا جەتەكشىسى، قالالىق ءماسليحات دەپۋتاتى ميراس شەكەنوۆ، اۋدان اكىمدەرىنىڭ كەڭەسشىلەرى، قالالىق باسقارما باسشىلارى قاتىستى. اشىق بيۋدجەتتەردىڭ ينتەراكتيۆتى كارتاسىن وزەكتى ەتۋ، ءدارى-دارمەكتەردىڭ باعاسى بويىنشا دارىحانالارعا جۇرگىزىلگەن مونيتورينگ ناتيجەلەرى، تكش-نى جاڭعىرتۋ باعدارلاماسىنىڭ مونيتورينگى، قالاداعى رۇقسات ەتىلمەگەن قوقىس ورىندارى سەكىلدى بىرقاتار ماسەلە تالقىلاندى.

سونداي-اق، باسقارمالاردىڭ "ساپالى جول" جوباسى اياسىندا جول قۇرىلىسى كەزىندە ۋاكىلەتتى ورگانداردىڭ زاڭ بۇزۋشىلىقتاردى جويۋ جونىندەگى باياندامالارى تىڭدالدى. ءماسليحات دەپۋتاتى ميراس شەكەنوۆ ءدارىحانالاردىڭ مونيتورينگ ناتيجەلەرى مەن "استانا – ادالدىق الاڭى" جوباسى مەنەدجەرلەرىنىڭ گۋمانيتارلىق كومەك جەتكىزۋ  بويىنشا جۇرگىزگەن جۇمىستارىنا ەگجەي-تەگجەيلى توقتالدى. شىلدە ايىنىڭ باسىنان باستاپ جۇمىس توپتارى قر پارلامەنتى ءماجىلىسىنىڭ جانە قالالىق ءماسليحات دەپۋتاتتارىمەن، سىبايلاس جەمقورلىققا قارسى ءىس-قيمىل دەپارتامەنتى قىزمەتكەرلەرىمەن، تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتى، جاستار جانە ىشكى ساياسات باسقارماسى وكىلدەرىمەن، ەرىكتىلەرمەن، قۇقىق قورعاۋ ورگاندارىنىڭ، اۋداندىق اكىمدىكتەردىڭ وكىلدەرىمەن جانە قوعام بەلسەندىلەرىمەن بىرلەسىپ، كۇندەلىكتى رەيدتەر جۇرگىزەدى.

"بۇگىنگى تاڭدا 50-گە تارتا ءدارىحانا تەكسەرىلدى، وندا ءدارى-دارمەكتەردىڭ باعاسىن كوتەرگەن 16 دەرەك، جەكە تۇلعالاردىڭ ءدارى-دارمەكتەردى ساتۋى جانە باسقا دا بىرقاتار قۇقىق بۇزۋشىلىقتار انىقتالىپ، وعان قاتىستى ءتيىستى شارالار قابىلداندى"، – دەدى ميراس شەكەنوۆ.

كەڭەس قورىتىندىسى بويىنشا، باقتيار ماكەن قالانىڭ الەۋمەتتىك ماڭىزى بار نىساندارىنا، ونىڭ ىشىندە اشىق بيۋدجەتتەردىڭ ينتەراكتيۆتى كارتاسى شەڭبەرىندە تۇراقتى نەگىزدە مونيتورينگ جۇرگىزۋدى تاپسىردى.

سونداي-اق، وقۋ ورىندارى مەن بالاباقشالاردىڭ جاڭا وقۋ جىلىنا دايىندىعىن قاداعالايتىن مونيتورينگ جۇرگىزىپ، اۋدان تۇرعىندارى مەن كەڭەسشىلەردىڭ جۇمىسىن جانداندىرۋ تاپسىرىلدى.

سوڭعى جاڭالىقتار

مەننيدىڭ تاعى ءبىر مارتتىگى

كاسىپقوي بوكس • كەشە

ۇقساس جاڭالىقتار