03 تامىز، 2020

قاراعاندى وبلىسىندا 312 مەكتەپ قاشىقتان وقىتادى

37 رەت كورسەتىلدى

قاراعاندى وبلىستىق ءبىلىم بەرۋ باسقارماسىنىڭ جاڭادان تاعايىندالعان باسشىسى گۇلسىم قوجاحمەتوۆا جاڭا وقۋ جىلىنا دايارلىق بارىسىن تالقىلاعان اپپارات جيىنىندا قاشىقتان وقىتۋعا ءوتۋ، ءوڭىر مەكتەپتەرىن كومپيۋتەرلەرمەن جانە وقۋلىقتارمەن قامتاماسىز ەتۋ جايىنان جان-جاقتى ماعلۇمات بەردى، – دەپ حابارلايدى Egemen.kz. وبلىس اكىمىنىڭ ءباسپاسوز قىزمەتىنە سىلتەمە جاساپ.

بيىل 1 قىركۇيەكتەن باستاپ وبلىستىڭ 312 مەكتەبى قاشىقتان وقىتۋ رەجىمىندە جۇمىس ىستەي باستايدى. قالعان 193 مەكتەپ، ونىڭ ىشىندە اۋىلدىق جانە شاعىن جيناقتى مەكتەپتەر بار، ولار بالالاردى ءداستۇرلى ۇلگىدە وقىتۋدى جالعاستىرا بەرەدى. ال باستاۋىش مەكتەپتىڭ 3 623 وقۋشىسى كەزەكشى سىنىپتارعا بارىپ، ءبىلىم نارىمەن سۋسىندايدى.

بۇگىنگى كۇندە وبلىس اۋماعىندا قاشىقتان وقىتۋدى جان-جاقتى مەڭگەرۋ جانە جەڭىلدەتۋ بويىنشا بىرقاتار ءىس-شارالاردىڭ اتقارىلىپ جاتقانىن ايتا كەتكەن ءجون. مىسالى، وقىتۋدىڭ مۇنداي ءتۇرى بالالارعا، سونداي-اق پەداگوگتار ماماندارعا بارىنشا قولايلى بولۋى ءۇشىن وبلىستا كومپيۋتەرلەردى جاڭارتۋ بويىنشا اۋقىمدى جۇمىستار جۇرگىزىلۋدە.

بيىل بالا وقىتۋدىڭ تارتىبىنە ءبىرشاما وزگەرىستەر ەنگىزىلگەن. اتاپ ايتار بولساق، ءبىر سىنىپتا 15 وقۋشىدان ارتىق بولماۋى ءتيىس. سونىمەن بىرگە، كابينەتتىك جۇيە بولمايدى، ساباقتار ۋاقىتىنىڭ ۇزاقتىعى دا قىسقارتىلماقشى. كوروناۆيرۋس ينفەكتسياسىنا بايلانىستى، قازىرگى ۋاقىتتا وبلىس مەكتەپتەرى ءۇشىن زارارسىزداندىرعىش قۇرالدار مەن سانيتاريالىق تالاپتاردى ساقتاۋعا قاجەتتى جابدىقتار ساتىپ الىنا باستاعان.

جيىن بارسىندا گۇلسىم قوجاحمەتوۆا ءوڭىر مەكتەپتەرىندەگى 35 544 كومپيۋتەردىڭ بارلىعى بىردەي قاشىقتان وقىتۋعا جارامدى ەمەس ەكەنىن ءمالىم ەتتى.

– وبلىستىق جانە جەرگىلىكتى بيۋدجەتتەر ەسەبىنەن 3 777 كومپيۋتەر ساتىپ الدىق. وقۋ جىلىنىڭ باسىنا دەيىن ءالى دە 5 034 كومپيۋتەر الۋ جوسپاردا بار. سونداي-اق، دەمەۋشىلىك قاراجاتتار ەسەبىنەن تاعى دا 977 بىرلىك كومپيۋتەردى ساتىپ الماقشىمىز. «قازاقمىس» كورپوراتسياسى 927 كومپيۋتەر الىپ بەردى، تاعى 50 بىرلىكتى شارۋا قوجالىقتارى ساتىپ اپەرەدى، – دەپ ەسەپ بەردى وبلىستىڭ باس مۇعالىمى.

1

بۇل تەحنيكالاردىڭ ءبارى ۇيىندە كومپيۋتەرى جوق مۇعالىمدەر مەن مەكتەپ وقۋشىلارىنا ۋاقىتشا پايدالانۋعا بەرىلەدى ەكەن. جوسپار بويىنشا بۇل  شارۋا 20 تامىزعا دەيىن رەتتەلۋى ءتيىس.

قاشىقتان وقىتۋ ۇلگىسىنە ءوتۋدىڭ عالامتورمەن قامتاماسىز ەتۋ سىندى وزەكتى ماسەلەمەن تىكەلەي بايلانىستى ەكەنى بەلگىلى. بۇگىنگى كۇندە وبلىس مەكتەپتەرى ءۇشىن 4 741 مودەم ساتۋ الۋ جوسپاردا بار ەكەن. ونىڭ ىشىندە 198 مودەم دەمەۋشىلەردىڭ قاراجاتىنا الىنباقشى. بۇعان قوسا، وڭىردەگى 81 ەلدى مەكەندە ءموبيلدى عالامتور جىلدامدىعى ۇلعايتىلادى. بايلانىستى 2G ۇلگىسىنەن 4G ۇلگىسىنە اۋىستىرۋ دا الدا تۇرعان اسا ماڭىزدى مىندەتتەردىڭ ءبىرى.

اپپارات جيىنىندا وبلىس اكىمى جەڭىس قاسىمبەك الداعى وقۋ جىلىنا دايارلىقتىڭ وتە ماڭىزدى شارۋا ەكەنىن تاعى ءبىر مارتە ەسكە سالدى.

– اۋدانداردا قاجەتتى جابدىقتاردى ساتىپ الۋدىڭ قالاي ءوتىپ جاتقانى تۋرالى ەسەپتى اپتا سايىن تىڭدايتىن بولامىن. سونىمەن بىرگە، كادرلىق قامتاماسىز ەتۋدىڭ اسا ماڭىزدى مىندەتتەردىڭ ءبىرى ەكەنىن ۇمىتپاعان ءجون.  باعدارلامالاردى ازىرلەۋ، باسپانا بەرۋ، جاس مامانداردىڭ كوممۋنالدىق  ماسەلەلەرىن شەشۋ دە ءجىتى نازاردا بولۋ كەرەك، – دەپ ەسكەرتتى ءوڭىر باسشىسى.

قازىرگى تاڭدا وبلىستا وقۋلىقتاردى ساتىپ الۋ بەلسەندى تۇردە قولعا الىنعان. «ينفورماتيكا» ءپانى بويىنشا 5-6-شى جانە 11-سىنىپ وقۋشىلارىنا ارنالعان وقۋ قۇرالدارى، سونىمەن قاتار، ءۇش ءتىلدى وقۋعا ارنالعان ينفورماتيكا، حيميا، فيزيكا جانە بيولوگيا وقۋلىقتارى، تۇزەتۋ مەكتەپتەرىنىڭ 3، 6-شى جانە 8-سىنىپ وقۋشىلارىنا ارنالعان قۇرالدار ساتىپ الىندى. بۇل وقۋلىقتاردىڭ 20%-ى قازىردىڭ وزىندە ءوڭىردىڭ ءبىلىم مەكەمەلەرىنە تاراتىلىپ بەرىلگەن.

تاعى ءبىر ايتا كەتەتىن جايت، بيىل وبلىستاعى 413 مەكتەپ جوندەۋدەن وتەدى. قازىرگى ۋاقىتتا 141 ءبىلىم مەكەمەسىندە كۇردەلى جوندەۋ جانە 272 مەكتەپتە اعىمداعى جوندەۋ جۇمىستارى ەكپىندى تۇردە جۇرگىزىلۋدە.

سوڭعى جاڭالىقتار

الىستان جەتكەن العىس

ايماقتار • بۇگىن، 14:10

ۇقساس جاڭالىقتار