استانادا قازاقستان رەسپۋبليكاسى قارۋلى كۇشتەرى قۇرلىق اسكەرلەرىنىڭ باس قولباسشىسى گەنەرال-لەيتەنانت مۇرات مايكەەۆ قازاقستان رەسپۋبليكاسىنداعى اقش ەلشىلىگى جانىنداعى اسكەري اتتاشە پولكوۆنيك ەندريۋ بەرريەرمەن كەزدەستى.
استانادا قازاقستان رەسپۋبليكاسى قارۋلى كۇشتەرى قۇرلىق اسكەرلەرىنىڭ باس قولباسشىسى گەنەرال-لەيتەنانت مۇرات مايكەەۆ قازاقستان رەسپۋبليكاسىنداعى اقش ەلشىلىگى جانىنداعى اسكەري اتتاشە پولكوۆنيك ەندريۋ بەرريەرمەن كەزدەستى.
كەلىسسوز بارىسىندا تاراپتار قازاقستان مەن اقش قۇرلىق اسكەرلەرىنىڭ اسكەري-تەحنيكالىق ىنتىماقتاستىق جانە اسكەري ءبىلىم سالاسىنداعى ءوزارا ءىس-قيمىلدىڭ قازىرگى جاعدايى مەن كەلەشەگىن تالقىلادى. سونىمەن قاتار, مۇرات مايكەەۆ پەن ەندريۋ بەرريەر ورتالىق ازيا ايماعىنداعى وڭىرلىك قاۋىپسىزدىكتى قامتاماسىز ەتۋ ماسەلەلەرىن دە قاراستىردى.
باس قولباسشى ناتو, ونىڭ ىشىندە اقش قارۋلى كۇشتەرىندە كەڭىنەن قولدانىلاتىن جاۋىنگەرلىك دايىندىقتىڭ جاڭا جۇيەسى – نۇسقاۋشىلار جۇيەسى قۇرلىق اسكەرلەرىندە ءساتتى قولدانىلىپ جاتقانىن اتاپ ءوتتى. سونداي-اق, مۇرات مايكەەۆ پولكوۆنيك ەندريۋ بەرريەرگە قر قارۋلى كۇشتەرىندە جۇرگىزىلىپ جاتقان رەفورمالار, كاسىبي اسكەرگە كوشۋ تۋرالى ايتىپ بەردى.
– بۇگىندە قازاقستان قارۋلى كۇشتەرى جاساقتاۋدىڭ كەلىسىمشارت بويىنشا تۇرىنە وتۋگە دايىن. قۇرلىق اسكەرلەرى قازىرگى زامانعى قارۋ-جاراقپەن قامتاماسىز ەتىلگەن, جەكە قۇرامنىڭ كاسىبي دايىندىعى جوعارى دەڭگەيدە. وسىنىڭ ءبارى كاسىبي اسكەرگە كوشۋدىڭ العىشارتتارى. ەڭ باستىسى, ءبىز قر قك جوعارعى باس قولباسشىسىنىڭ سانى جاعىنان از, كاسىبي جانە قورعانىس قابىلەتى مىقتى اسكەر قۇرۋ تۋرالى تالابىن ورىنداۋدامىز, – دەدى گەنەرال-لەيتەنانت مۇرات مايكەەۆ.
ءوز كەزەگىندە پولكوۆنيك ەندريۋ بەرريەر جۋىردا عانا رەسەي فەدەراتسياسىنىڭ اۋماعىندا وتكەن «مىزعىماس باۋىرلاستىق-2013» بىتىمگەرشىلىك وقۋ-جاتتىعۋىنا قاتىسقان «قازبريگ» جەكە قۇرامىنىڭ جوعارى كاسىبيلىگىن اتاپ ءوتتى.
«ەگەمەن-اقپارات».
