كۇنى كەشە جول-كولىك وقيعاسى ورىن الىپ, ناتيجەسىندە ەكى جولاۋشى زارداپ شەكتى جانە جولدان تىسقارى جەردە تۇرعان كولىكتەرگە زاقىم كەلتىرىلدى. وقيعا ساعات 21 شاماسىندا جامبىل مەن پارتيزان كوشەلەرىنىڭ قيىلىسىندا بولعان. ۆاز-21099 اۆتوكولىگىنىڭ جۇرگىزۋشىسى قاراما-قارسى باعىتتا كەلە جاتقان Nissan Qashqai كولىگىمەن سوقتىعىسۋدان جالتارامىن دەپ رولگە يە بولا الماي, تروتۋارعا شىعىپ كەتىپ, ونىڭ ار جاعىندا توقتاپ تۇرعان قىمبات شەتەلدىك كولىكتەردى سوققان. ناتيجەسىندە ۆاز كولىگىنىڭ 2 جولاۋشىسى دەنە جاراقاتتارىمەن اۋرۋحاناعا جەتكىزىلىپ, مەديتسينالىق كومەك الدى. ال توقتاپ تۇرعان Toyota Land Cruiser مەن Hyundai كولىكتەرىنە مەحانيكالىق زاقىمدار كەلتىرىلگەن. ۆاز-دىڭ ءوزى دە قاتتى زاقىمدانعان.
ءبىر قىزىعى جۇرگىزۋشىگە بەرىلگەن مەديتسينالىق انىقتاما ونىڭ اراقتان ساۋ بولعانىن كورسەتكەن. قازىر ءىس پروتسەسسۋالدىق شەشىم قابىلداۋ ءۇشىن پەتروپاۆل قالاسىنىڭ مامانداندىرىلعان اكىمشىلىك سوتىنا تاپسىرىلعان. ساپ-ساۋ جۇرگىزۋشىنىڭ تار جەردە جول ءتارتىبىن بۇزعاندىعىنىڭ سىرى ازىرگە بەلگىسىز.
ءبىر قىزىعى ءدال سول قيىلىستا شامامەن كەشكى ساعات 23-دە "Audi" اۆتوكولىگىنىڭ جۇرگىزۋشىسى ءبىر باعىتتا كەلە جاتقان Mitsubishi Galant كولىگىمەن سوعىلعان. بۇرىن دا وسى جەردە كوپ اپات بولاتىندىقتان ماۋسىم ايىندا قۇقىق بۇزۋشىلىقتاردى تىركەيتىن "ميراج" اۆتوماتتاندىرىلعان جۇيەسى ورناتىلعان بولاتىن. بىراق سوعان قاراماي ءبىر ايدىڭ ىشىندە اتالعان ۋچاسكەدە جىلدامدىقتى اسىرۋدىڭ 60-تان استام فاكتىسى تىركەلگەن. جالپى, "جىل باسىنان بەرى وبلىستا 98 جول-كولىك وقيعاسى ورىن الىپ, سونىڭ سالدارىنان 13 ادام كوز جۇمىپ, 129-ءى جاراقات الدى", - دەيدى سقو پوليتسيا دەپارتامەنتى جەرگىلىكتى پوليتسيا قىزمەتى باسقارماسى باستىعىنىڭ مىندەتىن اتقارۋشى گريگوري تىش.
پەتروپاۆل
