پرەزيدەنت • 31 شىلدە، 2020

مەملەكەت باسشىسىنىڭ اتىنا قۇتتىقتاۋ جەدەلحاتتارى كەلىپ تۇسۋدە

مەملەكەت باسشىسى قاسىم-جومارت توقاەۆتىڭ اتىنا قۇربان ايت مەرەكەسىنە وراي شەت مەملەكەتتەردىڭ پرەزيدەنتتەرى مەن حالىقارالىق ۇيىمداردىڭ باسشىلارىنان قۇتتىقتاۋ حاتتارى مەن جەدەلحاتتارى كەلىپ تۇسۋدە. بۇل تۋرالى اقورداعا سىلتەمە جاساي وتىرىپ Egemen.kz حابارلايدى.

ايىم ءداۋىت

وزبەكستان پرەزيدەنتى شاۆكات ميرزيوەۆ ءوزىنىڭ قۇتتىقتاۋىندا قاسىم-جومارت توقاەۆتىڭ ەكى ەل اراسىنداعى دوستىق پەن باۋىرلاستىقتى، ساۋدا-ەكونوميكالىق، الەۋمەتتىك، رۋحاني-اعارتۋشىلىق باعىتتاعى قاتىناستاردى، سونداي-اق، حالىقتارىمىزدىڭ ورتاق سىن-قاتەرلەرگە قارسى كۇرەستەگى ىنتىماقتاستىعىن جان-جاقتى نىعايتۋعا زور ۇلەس قوسقانىن اتاپ وتكەن.

قىرعىزستان پرەزيدەنتى سوورونباي جەەنبەكوۆ ەكى ەل حالقىنىڭ مۇددەسى ءۇشىن قىرعىزستان مەن قازاقستان اراسىنداعى ستراتەگيالىق سەرىكتەستىك، دوستىق، وداقتاستىق جانە تاتۋ كورشىلىك بايلانىستار قاسىم-جومارت توقاەۆتىڭ تىكەلەي قولداۋىمەن ودان ءارى نىعايا تۇسەتىنىنە سەنىم ءبىلدىردى.

تاجىكستان پرەزيدەنتى ەمومالي راحمون قاسىم-جومارت توقاەۆپەن بىرلەسە وتىرىپ، تاجىكستان مەن قازاقستان اراسىنداعى تىعىز ىنتىماقتاستىقتى نىعايتۋعا جانە كەڭەيتۋگە باعىتتالعان ءوزارا ىقپالداستىقتى جان-جاقتى ىلگەرىلەتۋگە نيەتتى ەكەنىن جەتكىزگەن.

تۇرىكمەنستان پرەزيدەنتى گۋربانگۋلى بەردىمۇحامەدوۆ قاسىم-جومارت توقاەۆقا زور دەنساۋلىق، باقىت جانە ونىڭ قولعا العان بارلىق باستامالارى مەن يگى ىستەرىنە تابىس، ال باۋىرلاس قازاقستان حالقىنا باق-بەرەكە تىلەدى.

تۇركيا پرەزيدەنتى رەجەپ تايپ ەردوعان ءوزىنىڭ قۇتتىقتاۋ حاتىندا «جەكە ءوزىمنىڭ جانە حالقىمنىڭ اتىنان قۇربان ايت مەرەكەسىمەن شىن جۇرەكتەن قۇتتىقتايمىن. قازىر باستان كەشىرىپ جاتقان قيىن-قىستاۋ كەزەڭدە ءبىزدى بىرىكتىرەتىن وسى قاسيەتتى مەرەكەدە سىزگە زور دەنساۋلىق، باقىت، ال باۋىرلاس قازاقستان حالقىنا بەيبىتشىلىك، باق-بەرەكە تىلەيمىن»، – دەپ جازعان.

مەملەكەت باسشىسىن قۇربان ايت مەرەكەسىنە وراي قۇتتىقتاپ، جىلى لەبىز بىلدىرگەن قۇتتىقتاۋ جەدەلحاتتارىن ازەربايجان پرەزيدەنتى يلحام اليەۆ، يران پرەزيدەنتى حاسان رۋحاني، ەگيپەت پرەزيدەنتى ابدەل فاتتاح اس-سيسي، يوردانيا كورولى II ابداللا، باحرەين كورولى شەيح حاماد بەن يسا ءال-حاليفا، ومان سۇلتانى حايسام بەن تاريق، ماروككو كورولى VI مۇحاممەد، الجير پرەزيدەنتى ابدەلمادجيد تەببۋن، اۋعانستان پرەزيدەنتى اشراف عاني، پالەستينا باسشىسى ماحمۋد ابباس پەن فيليپپين كوشباسشىسى رودريگو دۋتەرتە، سونداي-اق، يسلام ىنتىماقتاستىعى ۇيىمىنىڭ باس حاتشىسى يۋسەف بەن احماد ءال-وسەيمين، يسەسكو-نىڭ باس ديرەكتورى ساليم م.ءال-ماليك، كاۆكاز مۇسىلماندارى باسقارماسىنىڭ توراعاسى، تمد دىنارالىق كەڭەسىنىڭ تەڭتوراعاسى، شەيح-ۋل-يسلام اللاحشۇكىر پاشا-زادە جولدادى.

قۇتتىقتاۋ جەدەلحاتتارى ءالى دە كەلىپ ءتۇسىپ جاتىر.