ۇكىمەت • 31 شىلدە، 2020

ا.بالاەۆا وڭىرلەردەگى قوعامدىق كەڭەس توراعالارىمەن ونلاين-كەزدەسۋ وتكىزدى

15 رەت كورسەتىلدى

2020 جىلعى 30 شىلدە كۇنى اقپارات جانە قوعامدىق دامۋ ءمينيسترى ايدا بالاەۆا وبلىستاردىڭ، نۇر-سۇلتان، الماتى جانە شىمكەنت قالالارىنىڭ قوعامدىق كەڭەس توراعالارىمەن ونلاين-كەزدەسۋ وتكىزدى. بۇل تۋرالى اقپارات جانە دامۋ مينيسترلىگى حابارلايدى، دەپ جازادى Egemen.kz

كەزدەسۋ بارىسىندا قوعامدىق كەڭەستەرگە قاتىستى الەۋمەتتىك نورمالار مەن ەرەجەلەردى ءبىر جۇيەگە كەلتىرۋدىڭ وزەكتى ماسەلەلەرى قوزعالدى.

"قوعامدىق كەڭەستەر مەملەكەتتىك ورگانداردىڭ اشىقتىعى مەن ەسەپ بەرۋشىلىگىن قامتاماسىز ەتە وتىرىپ، ينستيتۋتسيونالدىق رەفورمانى قوزعاۋشى كۇشكە اينالا الماي وتىرعانى جاسىرىن ەمەس. وكىنىشكە قاراي، كوپتەگەن جاعدايلاردا قوعامدىق كەڭەستەردىڭ ۇسىنىمدارى مەملەكەتتىك ورگاندار تاراپىنان قاراۋسىز قالادى. بۇل تۇرعىدا مەملەكەتتىك شارالاردى قوعامدىق باقىلاۋ ارقاشان دا پارمەندى تەتىك بولىپ قالا بەرمەك. پاندەميا بۇل جۇمىستىڭ قانشالىقتى ماڭىزدى ەكەنىن كورسەتتى"، - دەدى ايدا بالاەۆا.

سونداي-اق كەزدەسۋدە قوعامدىق كەڭەستەردىڭ قىزمەتىن جەتىلدىرۋ جانە ولاردىڭ قوعامدىق ومىرگە بەلسەندى قاتىسۋى بويىنشا ناقتى ۇسىنىستار ايتىلدى. مينيسترلىك جاقىن ارادا قوعامدىق كەڭەستەردىڭ ىسكە اسىرىلىپ جاتقان بارلىق جوبامەن تانىسىپ قانا قويماي، ولارعا ودان ءارى قوعامدىق باقىلاۋ باستاماسىمەن تالداۋ جاساۋدى كوزدەيتىن مەملەكەتتىك باعدارلامالاردىڭ بىرىڭعاي پورتالىن ىسكە قوسۋدى جوسپارلاپ وتىر.

كەزدەسۋدە حالىقتىڭ الەۋمەتتىك وسال توپتارى ءۇشىن جاعداي جاساۋعا باقىلاۋ جۇرگىزۋ جونىندەگى ماسەلەلەر دە شەتتە قالمادى. بۇل باعىتتا بۇگىنگى تاڭدا مينيسترلىك جانىنان ارنايى كوميسسيا قۇرىلعان. قوعامدىق كەڭەستەرگە پروبلەمالار مەن ماسەلەلەر كوتەرۋمەن عانا شەكتەلمەي،  تاجىريبە الماسۋدا دا بەلسەندى بولۋلارى ۇسىنىلدى.

"قوعامدىق كەڭەستەردىڭ الەۋەتى وتە جوعارى. تەك ونى بارىنشا پايدالانۋ كەرەك جانە ينستيتۋتسيونالدىق ەركىندىكتى كوبىرەك كورسەتۋ كەرەك. ادامدار بىزدەن وسىنى كۇتىپ وتىر"، - دەپ اتاپ ءوتتى مينيستر.

الماتى قالاسىنىڭ، اتىراۋ، قاراعاندى، سولتۇستىك قازاقستان وبلىستارىنىڭ قوعامدىق كەڭەس توراعالارى جۇمىس تاجىريبەلەرىمەن ءبولىسىپ قانا قويماي، پاندەميا كەزەڭىندە قوعامدىق كەڭەستەردىڭ قوعام ومىرىنە بەلسەندى قاتىسۋىن جانداندىرۋ بويىنشا بىرقاتار ۇسىنىس ەنگىزدى.

وسىلايشا، اتىراۋ وبلىسى قوعامدىق كەڭەسىنىڭ توراعاسى م.وتەشوۆ قك-كە ادىستەمەلىك قولداۋ كورسەتەتىن رەسپۋبليكالىق ادىستەمەلىك ورتالىق قۇرۋدى ۇسىندى. بۇدان باسقا، ول قك تۋرالى زاڭ جوباسىنا ونەركاسىپتىك وڭىرلەردەگى شەتەلدىك كومپانيالارمەن ءوزارا ءىس-قيمىلعا قاتىستى تۇزەتۋلەر ەنگىزۋدى ۇسىندى.

الماتى قالاسى قوعامدىق كەڭەسىنىڭ توراعاسى ر.الشانوۆ الداعى سايلاۋدا ءماسليحات دەپۋتاتتىعىنا سايلاۋ ءۇشىن قوعامدىق كەڭەستەردىڭ لايىقتى مۇشەلەرىن ۇسىنۋ تۋرالى پىكىرىن ايتتى.

قاراعاندى وبلىسى قوعامدىق كەڭەسىنىڭ توراعاسى ە.ايماعامبەتوۆ وڭىرلەردىڭ ەكولوگيالىق ءال-اۋقاتىن جاقسارتۋ بويىنشا شارالار قابىلداۋ قاجەتتىلىگى تۋرالى ايتتى.

سولتۇستىك قازاقستان وبلىسى قوعامدىق كەڭەسىنىڭ توراعاسى ق.ەدىرەسوۆ ءوز سوزىندە اۋىل جاستارىن قولداۋ، ولاردى جۇمىسقا ورنالاستىرۋ جانە جۇمىسپەن قامتۋ بويىنشا شارالار قابىلداۋ قاجەتتىگى تۋرالى مالىمدەدى.

بۇدان باسقا، قوعامدىق كەڭەستەر مەملەكەت باسشىسىنىڭ كارانتيندى ەكى اپتاعا ۇزارتۋ تۋرالى شەشىمىن ءبىراۋىزدان قولدادى، بۇل رەتتە مۇنداي شارالار حالىقتىڭ دەنساۋلىعى مەن ءال-اۋقاتىنا وڭ ىقپال ەتەتىنىن اتاپ ءوتتى.

جالپى، كەزدەسۋ اياسىندا قوعامدىق كەڭەستەر قىزمەتىن جەتىلدىرۋگە جانە ولاردىڭ ءرولىن ارتتىرۋعا ىقپال ەتەتىن بىرقاتار پەرسپەكتيۆالىق تەتىكتەر ۇسىنىلدى. ولاردىڭ ىشىندە قك-ءدىڭ ۇيلەستىرۋ ورتالىعىن قۇرۋ، ورتالىق دەڭگەيدە ۇسىنىمدار مەن شەشىمدەردى ودان ءارى ازىرلەۋ ءۇشىن وزەكتى پروبلەمالاردىڭ بىرىڭعاي بازاسىن قۇرۋ، قك وكىلدەرىنىڭ، ونىڭ ىشىندە ساراپتامالىق ورتالىقتاردىڭ الەۋەتىن ارتتىرۋ، وڭىرلەردەگى قوعامدىق كەڭەس مۇشەلەرىنىڭ باستامالارىن قولداۋ بويىنشا شاعىن گرانتتار باعدارلاماسىن ىسكە اسىرۋ.

كەڭەستەردىڭ مينيسترلىكپەن ودان ءارى ءوزارا ءىس-قيمىلىن جاقسارتۋ ماقساتىندا ازاماتتىق قوعام ىستەرى كوميتەتىمەن 10 كۇندە ءبىر رەت، مينيستر ا.بالاەۆامەن – ايىنا ءبىر رەت، ۇكىمەت دەڭگەيىندە - ءاربىر جارتى جىلدىقتا قوعامدىق كەڭەستەرمەن تۇراقتى كەزدەسۋلەر ۇيىمداستىرۋ ۇسىنىلدى.

سونداي-اق مينيسترلىك مۇنداي كەزدەسۋلەردى جارتى جىلدا ءبىر رەت ۇكىمەت دەڭگەيىندە وتكىزىپ وتىرۋ تۋرالى ۇسىنىس ەنگىزەتىن بولادى.

ا.بالاەۆا ۇكىمەت جانىنان قك ۇيلەستىرۋ ورتالىعىن قۇرۋ، وزەكتى ماسەلەلەردىڭ بىرىڭعاي بازاسىن اشۋ، ساراپشىلار بازاسىن قالىپتاستىرۋ ارقىلى قوعامدىق كەڭەس ساراپتامالىق الەۋەتىن كۇشەيتۋ قاجەتتىگىن اتاپ ءوتتى.

ا.بالاەۆا، كەزدەسۋدى قورىتىندىلاي كەلە، مينيسترلىكتىڭ قاي كەزدە دە ىنتىماقتاستىققا اشىق ەكەنىن جانە بارلىق ماسەلەلەر بويىنشا ءوزارا ديالوگقا دايىن ەكەنىن اتاپ ءوتتى. بۇل تۇرعىدا قوعامدىق كەڭەستەر "حالىق ۇنىنە قۇلاق اساتىن مەملەكەت" تۇجىرىمداماسىن ىسكە اسىرۋدىڭ نەگىزگى قۇرالى رەتىندە قاراستىرىلادى.

انىقتاما: قوعامدىق كەڭەستەر مەملەكەت پەن ازاماتتىق قوعام اراسىنداعى ديالوگ نىسانى رەتىندە 2016 جىلى "100 ناقتى قادام" ۇلت جوسپارىن ىسكە اسىرۋ شەڭبەرىندە قۇرىلدى.

بۇل مەملەكەتتىك ەمەس ينستيتۋتتار مەملەكەتتىك شەشىمدەر قابىلداۋدىڭ اشىقتىعىن ارتتىرۋعا ارنالعان كونسۋلتاتيۆتىك-كەڭەسشى، باقىلاۋشى ورگاندار بولىپ تابىلادى.

بۇگىنگى كۇنى قازاقستاندا رەسپۋبليكالىق جانە جەرگىلىكتى دەڭگەيلەردە 234 قوعامدىق كەڭەس جۇمىس ىستەيدى (رەسپۋبليكالىق دەڭگەيدە – 18، وڭىرلىك دەڭگەيدە – 216). قوعامدىق كەڭەستەردىڭ جۇمىسىنا 3500-دەن استام ادام قاتىسادى.

سوڭعى جاڭالىقتار

ۇقساس جاڭالىقتار