الماتىدا م.ماقاتاەۆ كوشەسىندەگى مەديتسينالىق مەكەمە پروۆيزورلىق ورتالىق رەتىندە جۇمىس جاساۋدا

مەديتسينا • 30 شىلدە، 2020

الماتىدا م.ماقاتاەۆ كوشەسىندەگى مەديتسينالىق مەكەمە پروۆيزورلىق ورتالىققا اينالدى

17 رەت كورسەتىلدى

وسىدان ەكى-ءۇش اپتا بۇرىن ورتالىققا كۇنىنە 20-25 ناۋقاس تۇسكەن بولسا، قازىر ورتا ەسەپپەن 8-10 ادام تۇسۋدە. بۇل تۋرالى ونلاين-بريفينگ كەزىندە پسيحيكالىق ساۋىقتىرۋ ورتالىعىنىڭ ديرەكتورى ساپار راحمەنشەەۆ مالىمدەدى، دەپ حابارلايدى Egemen.kz

ايىم ءداۋىت

– پسيحيكالىق ساۋىقتىرۋ ورتالىعىنىڭ م.ماقاتاەۆ كوشەسىندەگى فيليالىندا 5 ناۋرىزدان باستاپ پروۆيزورلىق ورتالىق قىزمەت جاساپ كەلەدى. شەتەلدەن ۇشىپ كەلگەن 1800 ازاماتتىڭ بارلىعى وسى ورتالىقتا بولدى. ونىڭ 152-نەن ينفەكتسيا انىقتالىپ، ولاردى جۇقپالى اۋرۋلار اۋرۋحاناسىنا اۋىستىرىپ وتىردىق. ءبىرىنشى شىلدەدەن باستاپ ءبىزدىڭ ورتالىقتا 350 توسەك پروۆيزورلىق توسەك جاسالدى. ياعني م.ماقاتاەۆ كوشەسىندەگى ورتالىقتا 180 توسەك بولسا، ءا.كەكىلباەۆ كوشەسىندە 170 توسەك پروۆيزورلىق كومەك كورسەتىلىپ جاتىر، – دەدى سپيكەر.

پروۆيزورلىق ورتالىقتا بىلىكتى 296 مەديتسينا قىزمەتكەرى جۇمىس جاسايدى.

ولار وكپەنىڭ قابىنۋىنىڭ ورتاشا اۋىر جانە اۋىر دارەجەسىمەن، ياعني پنەۆمونيامەن اۋىراتىن ناۋقاستارعا بارلىق قاجەتتى ەمدەۋ شارالارىن جۇرگىزۋدە.

– وكپەسى قابىنعان ناۋقاستارعا ساپالى مەديتسينالىق كومەك كورسەتىلەدى. ناۋقاستارعا قابىنۋعا قارسى، باكتەرياعا قارسى، سونداي-اق انتيكووگۋليانتتى تەراپيا جانە وكسيگەنوتەراپيا قولدانىلادى. بۇل ەمنىڭ ءبارى دەنساۋلىق ساقتاۋ مينيسترلىگىنىڭ بەكىتكەن پروتوكولى بويىنشا جۇرگىزىلۋدە. ءبىزدىڭ ورتالىقتا 10 رەانيماتسيالىق توسەك جانە 6 يۆل اپپاراتى بار. جىل سوڭىنا دەيىن تاعى 4 يۆل اپپاراتىن الامىز دەپ جوسپارلاپ وتىرمىز، – دەدى ورتالىق باسشىسى.

وسى ايدىڭ باسىنان اتالعان پروۆيزورلىق ورتالىقتان 499 ادام ەم الىپ، جازىلىپ شىققان. ەڭ ەستە قالاتىنى، 1933 جىلى تۋىلعان اجەي وكپەسىنىڭ 64 پايىزىنىڭ قابىنعان دياگنوزىمەن ءتۇسىپ، ەمدەلىپ شىققان.

– 1933 جىلى تۋىلعان اپامىز ءبىزدىڭ اۋرۋحاناعا ءتۇسىپ، 18 كۇن جاتىپ، ەم قابىلدادى. بەس كۇن رەانيماتسيادا جاتتى. كت رەنتگەنىنەن قاراعاندا وكپەسىنىڭ 64 پايىزى قابىنعانى انىقتالدى. ول كىسىگە پروتوكول بويىنشا ەم جۇرگىزىلىپ، ون سەگىز كۇننىڭ ىشىندە ساۋىعىپ شىقتى، – دەيدى ساپار راحمەنشەەۆ.

ايتا كەتسەك، پروۆيزورلىق ورتالىق اشىلعالى بەرى جاسى 55-تەن جوعارى 207 ناۋقاس ەمدەلگەن. ونىڭ 152-ءسى جازىلىپ شىقسا، قالعاندارى ەم قابىلداۋدا. بۇگىنگى مالىمەتكە قاراساق، ماقاتاەۆ كوشەسىندەگى پروۆيزورلىق ورتالىقتا 103 ادام ەمدەلۋدە، ال ءا.كەكىلباەۆ كوشەسىندەگى ورتالىقتا 125 ناۋقاس ەم الۋدا. ياعني بۇرىنعىداي ەمەس ناۋقاستار سانى ازايعان ءارى بوس ورىندار دا بار.

ديرەكتوردىڭ ايتۋىنشا پاندەمياعا قاراماستان ورتالىق ءوزىنىڭ تىكەلەي مىندەتتەرىن توقتاتقان جوق. ياعني ديسپانسەرلىك باقىلاۋدا تۇرعان پسيحيكالىق يا بولماسا ناركولوگيالىق اۋىتقۋلارى بار اۋرۋلاردى امبۋلاتورلىق جانە ورتالىققا جاتقىزىپ ەمدەۋ جۇرگىزىلۋدە. پسيحولوگيالىق كومەك كورسەتۋ دە توقتاتىلعان جوق.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز