الماتىدا پوليتسەيلەر قۇربان ايت كەزىندە باقىلاۋدى كۇشەيتتى

پاترۋلدىك ناريادتاردىڭ ورنالاسۋى تىعىزدالىپ، ۋچاسكەلىك ينسپەكتورلاردىڭ الدىن الۋ جۇمىستارى جانداندىرىلدى.

– تاجىريبە كورسەتكەندەي، دەپارتامەنتتىڭ قوعامدىق ءتارتىپتى ساقتاۋدى قامتاماسىز ەتەتىن بارلىق بولىمشەلەرىنىڭ ۇيلەسىمدى جۇمىسىنىڭ ارقاسىندا مەرەكە كۇندەرى قىلمىستاردىڭ ەڭ از سانى تىركەلەدى. ادەتتە، ولار تۇرمىستىق سيپاتتا بولادى. ال قىلمىس پەن قۇقىق بۇزۋشىلىق جاسالعان جاعدايدا پوليتسيا بارلىق قاجەتتى شارالاردى قابىلدايدى. سونداي-اق، الماتى وبلىسى باس مەملەكەتتىك سانيتارلىق دارىگەرىنىڭ مىندەتىن اتقارۋشىنىڭ 2020 جىلدىڭ 31 شىلدەسى مەن 2 تامىزى ارالىعىندا الماتى وبلىسىنىڭ اۋماعىندا قۇربان ايت مەرەكەسى كۇندەرى كوروناۆيرۋستىق ينفەكتسيانىڭ تارالۋىنا ىقپال ەتەتىن بارلىق بەلگىلەنگەن تالاپتاردى ساقتاۋ جانە بۇقارالىق ءىس-شارالاردى وتكىزۋگە تىيىم سالۋ تۋرالى قاۋلىسى ەرەكشە ورىندالاتىنىن اتاپ وتكەن ءجون، – دەيدى الماتى وبلىسى پد جەرگىلىكتى پوليتسيا قىزمەتى باسقارماسىنىڭ باسشىسى باعدات ءاشىموۆ.

قۇربان ايت مەرەكەسى كۇندەرى بارلىق ۇيىمداردا، سونداي-اق جەكە ۇيلەر مەن مەشىتتەردە ادامدار كوپ جينالاتىن بۇقارالىق ءىس-شارالاردى وتكىزۋگە; وبلىستىڭ ورتالىق مەشىتىمەن بەلگىلەنگەن ونلاين رەجيمىندە قۇرباندىق شالۋدى جۇزەگە اسىراتىنداردى قوسپاعاندا، وبلىس اۋماعىندا سويۋدى ۇيىمداستىرۋ جانە وتكىزۋ، كولىكتەن جانە جەكە ۇيلەردە مال ساتۋعا تىيىم سالىنادى; 31 شىلدەدەن 2 تامىزعا دەيىن مال سويۋ تسەحتارى مەن بازارلارىنىڭ قىزمەتى توقتاتىلادى.

– وبلىستىڭ ەلدى مەكەندەرىنە كىرە بەرىستە ونلاين رەجيمىندە قۇرباندىق شالۋدى جۇزەگە اسىرۋعا ارنالعان جانۋارلاردى قوسپاعاندا، وبلىس اۋماعىنا جانۋارلاردى اكەلۋگە جول بەرمەۋ جانە جولىن كەسۋ بويىنشا باقىلاۋ ۇيىمداستىرىلادى. سونىمەن قاتار، بەلگىلەنبەگەن جەرلەردە تۇرعىنداردىڭ مال سويۋىنا جول بەرمەۋ ماقساتىندا مال سوياتىن بارلىق ورىندار مەن تسەحتار ەرەكشە باقىلاۋعا الىندى، – دەپ تولىقتىردى باعدات ءاشىموۆ.

سونىمەن قاتار، پوليتسيا قىزمەتكەرلەرى ازاماتتارعا ەڭ الدىمەن ءوز قاۋىپسىزدىگىنە جاۋاپكەرشىلىكپەن قاراۋ كەرەكتىگىن ەسكە سالادى. ءتارتىپ ساقشىلارى ەڭ باستىسى – ازاماتتاردى قۇقىقتىق ءتارتىپتى، زاڭدىلىقتى جانە كارانتيندىك نورمالاردى ساقتاۋعا، سونداي-اق قۇربان ايت كەزىندە قۇقىق قورعاۋ ورگاندارى قىزمەتكەرلەرىنىڭ قوعامدىق ءتارتىپتى ساقتاۋعا جانە ازاماتتاردىڭ قاۋىپسىزدىگىن قامتاماسىز ەتۋگە باعىتتالعان ءىس-ارەكەتتەرىنە تۇسىنىستىكپەن قاراۋعا شاقىردى.