كەشقۇرىمعى اپاق-ساپاقتا پەتروپاۆلدىڭ قارت تۇرعىنى لاريسا ۆلاديميروۆانىڭ تەلەفونى شار ەتكەن. مۇنداي ۋاقىتتا ونى ەشكىم مازالاي قويمايتىن, سوندىقتان كەيۋانا بىردەن سەكەم الىپ قالادى. تەلەفوندى كوتەرگەندە ار جاقتاعى داۋىس ءوزىن بانكتىڭ قاۋىپسىزدىك قىزمەتىنەنمىن دەپ تانىستىرىپ, ء"سىزدىڭ بانكىدەگى ەسەپشوتىڭىزعا بىرەۋلەر بۇزىپ كىرمەك بولدى, ءبىز ونى دەرەۋ انىقتاۋىمىز كەرەك, سوندىقتان بىزگە كارتاڭىزدىڭ نومەرىن تەز ايتا قويىڭىز", دەپ دىگىرلەيدى.
العاشىندا ساسىپ قالعانىمەن, تەلەديداردان ينتەرنەت-الاياقتىق تۋرالى كوپ ەستىگەن 67 جاسار كەيۋانا ءوزىن ءوزى قولعا الىپ, جۇرەگىن توقتاتىپ: "مەن سىزدەرگە ەشتەڭە دە ايتپايمىن, ەرتەڭ بانككە بارىپ, ءبارىن ءوزىم انىقتايمىن", دەگەندە اناۋ جاقتاعى ادام بايلانىستى كىلت ۇزەدى. تەكسەرمەك بولىپ ونىڭ نومىرىنە قايتا حابارلاسقاندا, ەشكىم تەلەفوندى كوتەرمەيدى.
ءوزىنىڭ باستان كەشكەن وقيعاسىن لاريسا ۆلاديميروۆا پوليتسياعا دا حابارلاپ, ولاردى قۇلاعدار قىلادى. بۇگىنگى تاڭعا دەيىن ءدال وسىنداي 18 وقيعا تىركەلگەن ەكەن. بارلىق ۋاقىتتا الاياقتار زەينەتكەرلەردىڭ اڭعالدىعىن پايدالانىپ, كۋالىكتەرىنىڭ جەكە سايكەستەندىرۋ نومىرلەرىن, كارتالارىنىڭ نومىرلەرىن, قۇپيا سوزدەرىن سۇراپ الادى. وسىدان كەيىن كارتاداعى اقشانى اۋدارۋ ولارعا وپ-وڭاي. كريمينالدىق پوليتسيا قىزمەتكەرلەرى پاندەميا باستالعاننان بەرى ينتەرنەت-الاياقتاردىڭ بارىنشا قارقىن العانىن ايتادى.
"الاياقتار بانك قىزمەتكەرلەرى اتىنان حابارلاسىپ, كليەنتتەرگە ولاردىڭ كارتالارى بويىنشا كۇدىكتى اۋدارىمدار جۇرگىزىلىپ جاتقانى تۋرالى حابارلايدى. سەندىرۋ ءۇشىن الاياقتار بانكتەردىڭ, ولاردىڭ CALL-ورتالىقتارىنىڭ نومىرلەرىن ءتۇرلى باعدارلامالار ارقىلى كوشىرىپ الىپ, قوڭىراۋ شالادى. تەلەفون ارقىلى سويلەسكەن كەزدە ولار بانكتەگى قاۋىپسىزدىك قىزمەتكەرلەرىنىڭ ءرولىن شەبەر اتقارادى. بانك تەرميندەرىن قولدانىپ, اڭگىمەلەسۋدى سىپايى جانە سەنىمدى تۇردە جۇرگىزەدى. الاياقتار ادامنىڭ وزىنە سەنىپ قالعانىن تۇسىنگەن كەزدە, ترانزاكتسيانى توقتاتۋ ءۇشىن جسن مەن تولەم كارتوچكالارىنىڭ دەرەكتەمەلەرىن سۇراپ الادى", دەيدى سقو پد باستىعىنىڭ ورىنباسارى, پوليتسيا پولكوۆنيگى رۋسلان نازاروۆ.
جىل باسىنان پەتروپاۆلدا ينتەرنەت-الاياقتىقتىڭ 183 فاكتىسى تىركەلگەن.
