"ساتباەۆتاعى جاعدايعا قاتىستى قوعامنىڭ نارازىلىعى ورىندى. راسىمەن, بۇل وقيعا ءبارىمىزدىڭ جۇرەگىمىزدى اۋىرتىپ, جانىمىزدى جابىرقاتتى. بارلىق اتا-انالاردىڭ اشۋى مەن ىزاسى دا تۇسىنىكتى. دەگەنمەن, وسىنداي قىلمىسكەرلەردى جازالاۋ زاڭ نەگىزىندە جۇرگىزىلۋى كەرەك. بۇلدىرشىنگە زورلىق-زومبىلىق كورسەتكەندەر زاڭ الدىندا قاتاڭ جاۋاپ بەرەدى. ول – اقيقات نارسە. ەشكىمنىڭ بۇعان كۇمانى بولماۋى كەرەك", دەيدى سەنات توراعاسى.
ماۋلەن اشىمباەۆتىڭ ايتۋىنشا, بىلتىر مەملەكەت باسشىسى حالىققا جولداۋىندا بالا قۇقىعىن قورعاۋ ماسەلەسىنە ايرىقشا نازار اۋدارىپ, ولارعا قاتىستى جاسالاتىن قىلمىستارعا جازانى كۇشەيتۋ تۋرالى تاپسىرما بەردى. سوعان بايلانىستى پارلامەنت قىلمىستىق كودەكسكە ىرگەلى وزگەرىستەر ەنگىزدى. بۇگىندە بالدىرعاندارعا قاتىستى جاسالعان زورلىق-زومبىلىق فاكتىسى بويىنشا قىلمىسكەر جيىرما جىلعا نەمەسە ءومىر بويىنا باس بوستاندىعىنان ايىرىلۋى مۇمكىن ەكەنىن اتاپ ءوتتى.
سەنات توراعاسى سونداي-اق: "زورلىق-زومبىلىق ارەكەتى ورتا ساناتتان اۋىر دارەجەلى قىلمىس تۇرىنە وزگەرتىلدى. مۇنداي جاعدايدا تاراپتار تاتۋلاسا المايدى. بۇرىنعى تاجىريبەدە تاراپتاردىڭ ءوزارا تاتۋلاسۋىنىڭ ناتيجەسىندە تالاي ادامنىڭ قىلمىستان جالتارىپ كەتكەنى بەلگىلى. ەندى ونداي ولقىلىققا جول جوق. جاڭا زاڭ نورمالارىنا سايكەس مۇنداي قىلمىس جاساعاندار تۇرمەدەن مەرزىمىنەن بۇرىن بوساپ تا شىعا المايدى, راقىمشىلىققا دا ىلىنبەيدى. سوندىقتان قولدانىستاعى زاڭناما بويىنشا قىلمىسكەرلەردى بۇلتارتپاس اۋىر جازا كۇتىپ تۇر. شورناقتا الەۋمەتتىك-تۇرمىستىق جانجال ورىن العانى بەلگىلى. بىراق مۇنى كەيبىرەۋلەر ەتنوسارالىق جانجالعا اينالدىرعىسى كەلىپ, جەلىلەردە جالعان اقپاراتتار, زاڭسىز ارەكەتتەرگە شاقىرعان ۇندەۋلەر تاراتۋدا. دەسەك تە, ءبىز قۇقىقتىق مەملەكەتتە ءومىر ءسۇرىپ جاتىرمىز. سول سەبەپتى, كەز كەلگەن ماسەلە زاڭ شەڭبەرىندە شەشىلۋى كەرەك. سوندا عانا زاڭ ۇستەمدىگى ورناعان, ءار ازاماتتىڭ قۇقىعى قورعالاتىن, قاۋىپسىزدىگى قامتاماسىز ەتىلەتىن وركەنيەتتى قوعام قۇرا الامىز", دەيدى ماۋلەن اشىمباەۆ.
ءسوزىنىڭ سوڭىندا سەنات توراعاسى: "قازىرگى تاڭدا ىندەتپەن بەتپە-بەت كەلگەن ەلىمىز كۇردەلى كەزەڭدى باستان وتكەرۋدە. وسىنداي سىن-ساعاتتا بىرلىگىمىزگە سىزات تۇسىرمەۋ – اسا ماڭىزدى. سول ءۇشىن ءار نارسەنى اقىلعا جەڭدىرىپ, ارەكەت ەتەيىك", دەيدى ماۋلەن اشىمباەۆ.
