اۋداندى اۋىز سۋمەن قامتۋ بويىنشا بۇگىندە اتامەكەن ەلدى مەكەنىندەگى اۋىز سۋ جۇيەلەرىنىڭ قۇرىلىسى جۇرۋدە. مەردىگەر مەكەمە: "تۆيك" جشس-ءى. قۇرىلىس جۇمىستارى اياقتالعان ۋاقىتتا 210 ابونەنت, ياعني 2122 تۇرعىن تازا اۋىز سۋمەن قامتىلاتىن بولادى.
ايماقتى كوگىلدەر وتىنمەن قامتۋ جۇمىستارىنا كەلسەك, اتامەكەن ەلدى مەكەنىندە "توبولينو" اگتس گاز قۋاتتىلىعىن ارتتىراتىن ستانتسيانىڭ قۇرىلىسى باستالعان. اگتس-ءتىڭ وتكىزگىشتىك قۋاتى - 20000 نم3/ساع. گاز قۇبىرى جۇيەسىنىڭ ۇزىندىعى - 4,73 شاقىرىم. بيىل قۇرىلىس جۇمىستارى اياقتالىپ, بىرنەشە ەلدى مەكەن گازبەن قامتىلاتىن بولادى.
اۋداندا قۇرىلىس جۇمىستارى قارقىندى. سارىاعاش قالاسىنىڭ سامال شاعىن اۋدانىندا 900 ورىنعا ارنالعان مەكتەپ قۇرىلىسى باستالعان. مەردىگەر مەكەمە: "جاڭا ارنا 2002" جشس-ءى. 2020 جىلى قۇرىلىسى باستالعان مەكتەپ 2021 جىلى تامىز ايىندا پايدالانۋعا بەرىلمەك. عيماراتتىڭ جالپى اۋماعى – 8324,2 شارشى مەتر. جوسپار بويىنشا مەكتەپتىڭ وقۋ بلوگى, سپورتزالى, اسحاناسى جانە شەبەرحاناسى بوي كوتەرەدى.
سارىاعاش – شيپايجايلى, ەمدىك ءتۋريزمى دامىعان ايماق. سۇرانىسقا بايلانىستى جىل سايىن جاڭا كەشەن بوي كوتەرەدى. ماسەلەن, 2020 جىلدىڭ ماۋسىم ايىندا قۇرىلىس اياقتالىپ, پايدالانۋعا بەرىلگەن "دارحان" شيپاجايى بۇگىندە 100 ادامدى قابىلداۋعا قاۋقارلى. ەمدىك-ساۋىقتىرۋ كەشەنىندە 20 ادام تۇراقتى جۇمىسپەن قامتىلعان. ەم-دومنىڭ 24 ءتۇرى بار. ودان بولەك, اقىلى بىرنەشە قىزمەت كورسەتىلەدى. شيپاجاي جىلىنا 1300-گە جۋىق دەمالۋشى قابىلداۋدى جوسپارلاۋدا. كەشەندە ەمدەلۋدىڭ ورتاشا قۇنى 12500 تەڭگەنى قۇرايدى.
