وبلىس اكىمى كۇدىكتىنىڭ ۇستالعانىن, سونداي-اق قازىرگى كەزدە وسى وقيعا بويىنشا بارلىق ءتيىستى تەرگەۋ ءىس-شارالارىنىڭ جۇرگىزىلىپ جاتقانىن جەتكىزدى.
"وكىنىشكە قاراي, ساتباەۆ قالاسىندا وقيعا بولعان ءتۇنى كىناسىز ادامدارعا زيان كەلتىرىلدى. ءتارتىپ بۇزۋشىلاردى توقتاتۋ ءۇشىن جەكە قۇرام وقيعا ورنىنا جۇمىلدىرىلدى. مەن ازاماتتارىمىزدىڭ جۇرەگى نارازىلىققا تولى ەكەنىن تۇسىنەمىن جانە ونىمەن كەلىسەمىن. بىراق, ءبىز قۇقىقتىق مەملەكەتتە ءومىر سۇرەمىز, سوندىقتان دا ەموتسيامىزدى تەجەي ءبىلىپ, بولعان جاعدايدى قۇقىقتىق الاڭدا قاراستىرۋىمىز كەرەك", – دەدى جەڭىس قاسىمبەك.
ءوڭىر باسشىسى تەرگەۋ امالدارى اياقتالعاننان كەيىن, كىنالىنى قاتاڭ جازا كۇتىپ تۇرعانىن اتاپ ءوتتى.
ەسكە سالار بولساق, كەشە, ياعني 23 شىلدە كۇنى ساتباەۆ قالالىق پوليتسيا بولىمىنە بەس جاستاعى قىزىنىڭ جوعالعانى تۋرالى ەر ادام كەلىپ حابارلاعان بولاتىن. ىزدەستىرۋ جۇمىستارىنا جەرگىلىكتى پوليتسيا ءبولىمىنىڭ بارلىق جەكە قۇرامى مەن جۇزدەن استام ەرىكتىلەر جۇمىلدىرىلدى. جوعالعان قىز بالا تۇندە كوپقاباتتى ۇيدەگى پاتەرلەردىڭ بىرىنەن تابىلدى. بۇل وقيعا قالا تۇرعىندارى اراسىندا ۇلكەن شۋ تۋدىرىپ, ونىڭ سوڭى جاپپاي ءتارتىپ بۇزۋشىلىققا اكەلە جازدادى.
قازىرگى ۋاقىتتا قىز بالا اتا-اناسىمەن بىرگە ۇيدە. ءوڭىر باسشىسى ونىڭ دەنساۋلىعىن ۇزدىك ماماندار قاداعالايتىن بولادى دەپ سەندىردى.
سونىمەن قاتار, جەڭىس قاسىمبەك قالاداعى جاعدايدىڭ تۇراقتانعانىن اتاپ ءوتتى. ءدال قازىرگى ساتتە ساتباەۆتاعى تىرلىك قالىپتى ءومىر ارناسىنا تۇسكەن.
قاراعاندى وبلىسى
