ەستەرىڭىزگە سالا كەتسەك, كەنتاۋ قالاسىنا قاراستى شورناق اۋىلىندا ەر ادام مەن اۋىلداسىنىڭ اراسىندا تۇسىنبەۋشىلىك ورىن الىپ, سوڭى بۇزاقىلىققا ۇلاسقان. ياعني جابىرلەنۋشىنىڭ ۇيىنە بىرنەشە اۆتوكولىكپەن بەلگىسىز ادامدار كەلىپ, ونىڭ ءۇيى مەن كورشىلەرىنىڭ اۋلاسىنا قاراي تاس لاقتىرعان. ناتيجەسىندە, جابىرلەنۋشىنىڭ ءۇش تۋىسى جاراقات الىپ, دەرەۋ اۋرۋحاناعا جەتكىزىلىپ, مەديتسينالىق كومەك كورسەتىلگەن.
اتالعان اقپاراتتى الىسىمەن وقيعا ورنىنا العاشقىلاردىڭ ءبىرى بولىپ, وسى ايماققا بەلگىلەنگەن ۋچاسكەلىك پوليتسيا ينسپەكتورى نۇرلان قۇرالباەۆ جەتكەن. ول اۋىل تۇرعىندارى اراسىنداعى تۇسىنبەۋشىلىكتى توقتاتىپ, تۇرعىنداردىڭ قارۋ قولدانۋىنا جول بەرمەدى.
وسىلايشا, ۋچاسكەلىك پوليتسيا ينسپەكتورىنىڭ جەدەل ارەكەت ەتىپ, دۇرىس جۇمىس جۇرگىزگەنىنىڭ ارقاسىندا داۋ-داماي مەن بۇزاقىلىقتى توقتاتىپ, ادام شىعىنىنىڭ بولۋىنا جول بەرمەدى. الايدا, ءوز قىزمەتىن اتقارۋ بارىسىندا پوليتسەي كۇدىكتىلەر لاقتىرعان تاستان جاراقات الىپ, اۋرۋحاناعا جەتكىزىلىپ, وعان مەديتسينالىق كومەك كورسەتىلگەن.
تۇركىستان وبلىستىق پوليتسيا دەپارتامەنتىنىڭ باسشىلىعىنان قۇرىلعان جەدەل-تەرگەۋ توبى ءبىر تاۋلىك ىشىندە وسى بۇزاقىلىققا قاتىسى بار ءتورت تۇرعىندى ۇستادى. قازىرگى تاڭدا سوتقا دەيىنگى تەرگەۋ امالدارى جۇرگىزىلىپ جاتىر.
