حوك پەن جاپونيا ۇكىمەتىنىڭ بىرلەسكەن شەشىمى الەم حالقى ءۇشىن ايتارلىقتاي جاڭالىق بولعان جوق. سەبەبى, COVID-19 ىندەتى ۋشىعىپ, جاعداي كۇن ساناپ قيىنداپ بارا جاتىر ەدى. كوپتەگەن ەلدەر كارانين جانە توتەنشە جاعداي رەجيمىن جاريالادى. ال بۇل ءوز كەزەگىندە ىرىكتەۋ كەزەڭدەرىن وتكىزۋگە كەدەرگى كەلتىردى. سپورتشىلاردىڭ ويىن قارساڭىندا بابىنا ەنۋى ءۇشىن دە بۇل قيىن كەزەڭ سانالدى. وسى ورايدا, وليمپيادانى ۇيىمداستىرۋشىلار تاريحتا ماڭىزدى شەشىم قابىلداپ, جازعى ويىنداردى 2021 جىلدىڭ 23 شىلدەسى مەن 8 تامىزى ارالىعىنا اۋىستىردى.
بۇگىن, 2020 جىلدىڭ 23 شىلدەسىندە الەم جانكۇيەرلەرى ماڭىزدى داتانى اتاپ وتۋدە. تورتجىلدىقتىڭ ەڭ ماڭىزدى ءارى اۋقىمدى سپورتتىق دوداسى – توكيو وليمپياداسىنىڭ باستالۋىنا تۋرا ءبىر جىل قالدى. ىندەتتىڭ جالعاسۋىنا بايلانىستى ۇيىمداستىرۋ كوميتەتى بارلىق ءىس-شارالاردى ونلاين رەجيمدە وتكىزۋدى ءجون ساناعان.
"ويىننىڭ باستالۋىنا ءبىر جىل عانا ۋاقىت قالدى. ءبىزدى الدا ۇلكەن مىندەتتەر كۇتىپ تۇر. وسى ورايدا, ءبىزدىڭ جاپونيالىق ارىپتەستەرىمىز پرەمەر-مينيستر سيندزو ابە, "توكيو-2020" پرەزيدەنتى موري يوسيرو, گۋبەرناتور كويكە يۋريكو, سونداي-اق, سپورتشىلار مەن بارلىق جازعى وليمپيادالىق حالىقارالىق فەدەراتسيالارعا, ۇوك-تەر مەن دەمەۋشىلەرگە, تەلە-راديوتاراتۋ قۇقىعىن يەلەنگەندەرگە العىسىمدى ايتامىن. ولاردىڭ قولداۋىنسىز ءبىز مۇنداي تاريحي شەشىمدى قابىلداي الماس ەدىك. ءبىز جاپون تاراپىمەن بىرلەسە وتىرىپ, بارلىق ماڭىزدى قادامداردى جاساۋعا دايىنبىز. وسىلايشا, ءبىز ۇيىمداستىرۋ كوميتەتىمەن بىرگە كەيىنگە قالدىرىلعان توكيو-2020 ويىندارىن ەستەن كەتپەيتىن مەرەكەگە, ادامزاتتىڭ ىنتىماق-بىرلىگىن پاش ەتەتىن دودا رەتىندە وتكىزەمىز. بىرلىك بولسا, بىزدەن مىقتى ەشكىم جوق ەكەنىن كورسەتەمىز", - دەدى حوك پرەزيدەنتى توماس باح مىرزا.
توكيوداعى وليمپيادا جانە پاراليمپيادا ويىندارىن ۇيىمداستىرۋ كوميتەتى ويىنعا قولداۋ كورسەتكەن بارشا جانكۇيەرگە جانە سپورتشىلارعا العىس رەتىندە ۆيدەوفيلم كورسەتەدى. ال ءىس-شارالار وليمپيادالىق كانالدىڭ پلاتفورماسىندا تىكەلەي ەفيردە كورسەتىلەدى.
