مەديتسينالىق جانە ۆەتەرينارلىق زەرتحانالار الەم بويىنشا تەڭ دارەجەلى مارتەبەگە يە. سوندىقتان ۆەتەرينارلىق مەديتسينا جانە مەديتسينا سالاسىنداعى حالىقارالىق ۇيىمدار, سونىڭ ىشىندە حەب, فاو جانە ددسۇ پاندەميا كەزىندە كوروناۆيرۋس ينفەكتسياسىمەن كۇرەستە ۆەتەرينارلىق زەرتحانالاردى پايدالانۋدى ۇسىنادى.
وسىعان وراي ەلىمىزدە پتر تەستىلەۋ مۇمكىندىگىن كەڭەيتۋ ءۇشىن دەنساۋلىق ساقتاۋ مينيسترلىگىنە 1 تامىزدان باستاپ قازاقستاننىڭ 11 ايماعىندا ورنالاسقان 24 ۆەتەرينارلىق زەرتحانالاردىڭ مامانداندىرىلعان عيماراتتارى قولدانىسقا ۇسىنىلادى.
پايدالانۋعا بەرىلەتىن بارلىق تەست ورىندارى زەرتحانالاردىڭ ەكىنشى قاباتتارىندا ورنالاسادى. ميكروورگانيزمدەردىڭ پاتوگەندىلىگى II-IV توپتارىمەن جۇمىس ىستەۋ تالاپتارىنا سايكەس كەلەدى: ولاردىڭ جەكە كىرەبەرىستەرى, سانيتارلىق قاقپالارى جانە بيولوگيالىق قاۋىپسىزدىك جاشىكتەرى بار. بۇل ۆەتەرينارلىق زەرتحانالاردىڭ ءبىرىنشى قاباتتارىندا نەگىزگى باعىتتار بويىنشا ءوز جۇمىستارى جالعاسا بەرەدى.
سونىمەن قاتار, شالعايداعى اۋىلدىق جەرلەردە دياگنوستيكالىق زەرتتەۋلەر جۇرگىزۋ ءۇشىن جىلجىمالى ۆەتەرينارلىق زەرتحانا قولدانىلادى.
عيمارات جانە جىلجىمالى زەرتحانامەن بىرگە پتر جابدىقتارىنىڭ 26 جيىنتىعى بەرىلەدى دەپ جوسپارلانۋدا. سونداي-اق, اۋىل شارۋاشىلىعى مينيسترلىگى رەسپۋبليكالىق ۆەتەرينارلىق زەرتحانادان جانە ۇلتتىق اگرارلىق عىلىمي-ءبىلىم بەرۋ ورتالىعىنان ادامدار مەن جانۋارلارعا قاۋىپتى ينفەكتسيالار دياگنوزىن انىقتاۋ تاجىريبەسى بار 67 بىلىكتى ماماندى ىسساپارعا جىبەرەدى.
ءبىر ايتا كەتەرلىگى, جانۋارلاردىڭ جۇقپالى اۋرۋلارىن دياگنوستيكالاۋدىڭ پتر ءادىسى ءىس جۇزىندە كوروناۆيرۋستىق ينفەكتسيانى پتر دياگنوستيكالاۋ ادىسىمەن ۇقساس. جالعىز ايىرماشىلىق قولدانىلاتىن تەست جۇيەلەرىندە. سوندىقتان الەمنىڭ كوپتەگەن جەتەكشى ەلدەرى COVID-19 پاندەمياسىمەن كۇرەسۋدە ۆەتەرينارلىق زەرتحانالاردىڭ مۇمكىندىگىن پايدالانۋدا.
ەستەرىڭىزگە سالا كەتەيىك, وسى جىلدىڭ 21 شىلدەسىندە وتكەن قر ۇكىمەتىنىڭ وتىرىسىندا دەنساۋلىق ساقتاۋ ءمينيسترى الەكسەي تسوي قازاقستاندا پتر تەستىلەۋ قۋاتتىلىعىنىڭ جەتىسپەۋى كۇنىنە 8 مىڭ سىناقتان تۇراتىنىن مالىمدەدى. وڭىرلەردەگى جاعدايدى رەتتەۋ ءۇشىن ۆەدومستۆو باسشىسى رەسپۋبليكانىڭ ۆەتەرينارلىق قىزمەت زەرتحانالارىنىڭ مۇمكىندىكتەرىن پايدالانۋدى ۇسىنعان بولاتىن.
