بەرىك ءۋاليدىڭ ايتۋىنشا, مەملەكەت باسشىسى قاسىم-جومارت توقاەۆتىڭ جۇمىس كەستەسى وتە تىعىز. پرەزيدەنت مەملەكەتتىك ورگانداردىڭ باسشىلارىمەن, قوعام وكىلدەرىمەن كەزدەسىپ, كونفەرەنتسيالار وتكىزىپ, جوسپارلانعان ءىس-شارالارعا قاتىسادى.
– قاسىم-جومارت كەمەل ۇلى اپتاسىنا جەتى كۇن جۇمىس ىستەيدى دەپ كەسىپ ايتا الامىن, تۋىنداعان قيىندىقتارعا شۇعىل جاۋاپ بەرىپ جاتادى. داعدارىسقا قارسى كۇن تارتىبىمەن قاتار, ول مەملەكەت دامۋىنىڭ ۇزاق مەرزىمدى مىندەتتەرىنە: ەكونوميكانى, الەۋمەتتىك سالانى قولداۋ ماسەلەلەرىنە ۇلكەن كوڭىل بولەدى, – دەيدى پرەزيدەنتتىڭ ءباسپاسوز حاتشىسى.
سونداي-اق ول پرەزيدەنتتىڭ الەۋمەتتىك جەلىلەردەگى كەيبىر جازبالارىنىڭ نەگە كەش جاريالاناتىنىن دا ءتۇسىندىردى.
– پرەزيدەنتتىڭ Twitter-دەگى كەي جازبالارى تۇندە پايدا بولاتىنىن دۇرىس بايقاعانسىزدار. وزدەرىڭىز بىلەسىزدەر, مەملەكەت باسشىسى ەل ومىرىندەگى جاعدايلاردى قالت جىبەرمەي قاداعالاپ وتىرادى جانە بۇقارالىق اقپارات قۇرالدارى مەن الەۋمەتتىك جەلىلەردەگى مالىمەتتەرمەن تانىسۋعا ارقاشان ۋاقىت تابادى. ەگەر قاسىم-جومارت كەمەل ۇلى قاجەت دەپ ساناسا, وندا ول قوعامدى ەلەڭ ەتكىزگەن ماڭىزدى وقيعالارعا قاتىستى ءوز كوزقاراسى تۋرالى كەز كەلگەن ۋاقىتتا جازبا جاريالاپ, قاجەتتى نۇسقاۋلار بەرەدى. جۇمىس كەستەسىنىڭ تىعىز بولۋىنا بايلانىستى كەيدە مۇنداي جازبالارى كەش شىعۋى مۇمكىن ەكەندىگى تۇسىنىكتى بولار, – دەپ ءتۇسىندىردى بەرىك ءۋالي.
پرەزيدەنت ءباسپاسوز حاتشىسىنىڭ ايتۋىنشا, قاسىم-جومارت توقاەۆ وسىلايشا بارلىق مەملەكەتتىك قىزمەتكەرگە ۇلگى بولا وتىرىپ, وسىنداي سىن-ساعاتى تۋعان ۋاقىتتا قالاي جۇمىس ىستەۋ كەرەكتىگىن كورسەتەدى.
ايتا كەتەيىك, پرەزيدەنت تابيعات اياسىنداعى ەل ازاماتتارىنىڭ ادەپسىزدىگىن سىناعان جازباسىن كەشە Twitter-دە تۇنگى 01:30 ۋاقىتىندا جاريالاعان ەدى.
