جوبا قازاقستان رەسپۋبليكاسىنىڭ وڭتۇستىگىندەگى قاراتاۋ فوسفور باسسەينىنىڭ كەن ورىندارىن يگەرۋدى جانە مينەرالدىق تىڭايتقىشتار شىعاراتىن جاڭا زاۋىت سالۋدى كوزدەيدى. جوبانىڭ جالپى قۇنى 1,2 ميلليارد اقش دوللارىن قۇرايدى.
"حيميالىق كاسىپورىننىڭ جۇمىسى جامبىل وبلىسىندا كەمىندە 1200 جاڭا جۇمىس ورنىن قۇرۋ مۇمكىندىگىن قامتاماسىز ەتەدى, سونىمەن قاتار اۋىل شارۋاشىلىعى مەن قۇرىلىس سالاسىنىڭ دامۋىنا ايتارلىقتاي تۇرتكى بولادى, ازىق-ت ۇلىك قاۋىپسىزدىگىن جوعارىلاتۋعا, قازاقستان رەسپۋبليكاسىنىڭ ەكسپورتتىق الەۋەتىن ارتتىرۋعا ىقپال ەتەدى, قازاقستان مەن رەسەي اراسىنداعى ينتەگراتسيالىق بيزنەس-بايلانىستاردى ەلەۋلى تۇردە نىعايتادى", دەپ ءتۇسىندىردى ەرمەك كوشەرباەۆ.
سالىنعالى جاتقان حيميالىق كاسىپورىندا ءداستۇرلى فوسفور وندىرىستەرىنىڭ نەگىزگى كەمشىلىكتەرىنىڭ ءبىرى - فوسفورلى گيپس تۇرىندەگى قالدىقتار بولمايدى, بۇل تابيعي رەسۋرستاردى پايدالاۋدىڭ تيىمدىلىگىن جاقسارتىپ, ءوڭىر ەكولوگياسىن ساقتايدى. بۇدان باسقا, جوبا ونىڭ بارلىق قاتىسۋشىلارىنا ۇزاقمەرزىمدى الەۋمەتتىك-ەكونوميكالىق اسەر اكەلمەك.
"قول قويىلعان ۇكىمەتارالىق كەلىسىم ستراتەگيالىق ينۆەستيتسيالىق جوبانى ىسكە اسىرۋدا جاڭا كەزەڭدى باستايدى – جۇمىس ىستەپ تۇرعان ءوندىرىستى كەڭەيتىپ, حيميا سالاسىنداعى ەڭ ۇزدىك قولجەتىمدى تەحنولوگيالاردى پايدالانۋمەن جىلىنا كەمىندە 1 ميلليون توننا مينەرالدى تىڭايتقىش پەن يندۋستريالىق ونىمدەر وندىرەتىن جاڭا زاۋىتتىڭ قۇرىلىسىن باستاۋعا كوشۋگە مۇمكىندىك بەرەدى. زاۋىتتىڭ قۇرىلىسىن 2025 جىلعا قاراي اياقتاۋ جوسپارلانىپ وتىر", دەپ اتاپ ءوتتى دەنيس مانتۋروۆ.
بۇل جوبا رەسپۋبليكالىق يندۋستريالاندىرۋ كارتاسىنا ەنگىزىلگەن جانە 2019 جىلعى ساۋىردە سارىسۋ اۋدانىندا زاۋىتتىڭ مۇقتاجدىقتارى ءۇشىن قۋاتتىلىعى 110 مىڭ شارشى م/ساع. گاز قۇبىرىنىڭ قۇرىلىسى باستالعان. ينۆەستيتسيالىق جوبانى «ەۋروحيم» مينەرالدىق-حيميالىق كومپانياسى» ااق-تىڭ قازاقستانداعى ەنشىلەس كومپانياسى «ەۋروحيم – قاراتاۋ» جشس ىسكە اسىراتىن بولادى.
