اتالعان جۇمىستاردىڭ اياسىندا مينيسترلىك وكىلدەرى باس شاھاردىڭ ماڭىنداعى زاڭسىز قوقىس ورىندارىنا ارنايى بارىپ قايتتى. بۇل رەسپۋبليكا كولەمىندە جۇرگىزىلەتىن اۋقىمدى جۇمىستىڭ باسى عانا دەپ سەندىردى جاۋاپتى ۆەدومستۆوداعىلار. مۇنداي تەكسەرۋ جۇمىستارى بۇكىل ەلدە جاسالادى دەپ كوزدەلۋدە.
سالالىق ورگان وڭىرلەردەگى بەيبەرەكەت قوقىس ۇيىندىلەر جايلى اقپاراتتى جيناۋ ءۇشىن جەدەل جەلىنى ىسكە قوستى. بۇگىندە 250-دەن استام شاعىم كەلىپ تۇسكەن. ونىڭ كوبى الماتى وبلىسى (40 شاعىم) مەن الماتى قالاسىنا (اپتا ىشىندە 18 حابارلاما), سول سەكىلدى اقتوبە, اقمولا جانە شىعىس قازاقستان وبلىسىندارىنداعى تۇرمىستىق قالدىق ۇيىندىلەرىنە قاتىستى. جەدەل جەلىگە اقپاراتتى قاراعاندى (15), اقتوبە (14) وبلىستارىنىڭ, سونداي-اق الماتىنىڭ (11) تۇرعىندارى كوپ بەرگەن.
تاياۋدا Twitter-دەگى پاراقشاسىندا ەكولوگيا, گەولوگيا جانە تابيعي رەسۋرستار ءمينيسترى ماعزۇم مىرزاعاليەۆ بۇل جەلىگە قازاقستاننىڭ كەز كەلگەن تۇرعىنى حابارلاسىپ, ءوز شاھارلارىنداعى نەمەسە اۋدانداعى زاڭسىز قوقىس ورىندارىنا قاتىستى دەرەكتەردى, سول سەكىلدى فوتو جانە بەينەماتەريالداردى جىبەرە الاتىنىن ايتقان ەدى.
«سىزدەرمەن, سونداي-اق ىشكى ىستەر دەپارتامەنتى جانە اكىمدىكتەرمەن بىرگە جاعدايدى باقىلاپ, سول جەردە شارا قابىلدايتىن بولامىز», دەدى جازبادا مينيستر. قۇزىرلى ورگان ءبىر اي ىشىندە ەلىمىزدەگى بارلىق قوقىس پوليگوندارىنا تولىقتاي مونيتورينگ جۇرگىزبەك.
عارىشتان جۇرگىزىلگەن باقىلاۋ ارقىلى مينيسترلىك وڭىرلەردەگى ۇيىندىلەردى جويۋدىڭ جاڭا كەستەسىن قۇرىپ, اكىمدىكتەرگە جولدادى. بۇگىندە بۇلاردىڭ 18-ءى جويىلدى.
جۋىردا وتكىزىلگەن ۇكىمەتتىڭ كەڭەيتىلگەن وتىرىسىندا پرەزيدەنت قاسىم-جومارت توقاەۆ ەلىمىزدە ۋاقىت وتكەن سايىن ەكولوگيالىق پروبلەمالار كۇردەلەنىپ بارا جاتقانىن ايتىپ, ونى شەشۋدىڭ جولدارىن تەزدەتۋدى جۇكتەگەن-ءدى. وسىعان بايلانىستى ۇكىمەتكە زاڭنامالىق بازانى ازىرلەپ, Waste to energy (قالدىقتار ەنەرگياعا) تەحنولوگياسىن ەنگىزۋ ءۇشىن قولايلى ينۆەستيتسيالىق جاعدايدى جاقسارتۋدى تاپسىرعان بولاتىن.
