پىكىر • 21 شىلدە، 2020

كەرىس پەن كيكىلجىڭ ەمەس – ۇلتتىق ۇجىم كەرەك بىزگە!

45 رەت كورسەتىلدى

وسىناۋ ەل باسىنا كۇن تۋعان كەزدە بيلىكتى كىنالاپ، بىرەۋىمىز ولاي، بىرەۋىمىز بۇلاي تارتپاي، ەلىمىزدىڭ ەگەمەندىگىن ساقتاۋدىڭ قام-قاراكەتىنە كىرىسۋىمىز كەرەك. ءبىر قوعامدىق-ەكونوميكالىق فورماتسيا كەتىپ، ەكىنشىسى كەلگەن كەزدە ورنى ويسىراعان كەمشىلىك پەن قاتەلىكتەر بولماي قويمايدى. وركەنيەتتى ەلدەردىڭ ءبارى دە ءبىز وتكەن وتكەلەكتەن وتكەن! ولاردى ءبىر كەزدە جابايى باتىس دەگەن، قازىر وركەنيەتتى ەلدەر دەپ ءوزىمىز ايتامىز! ءبىر-ءبىرىمىزدى كىنالاۋدى توقتاتىپ، ۇلتتى امان الىپ قالۋىمىز قاجەت! ەڭ باستىسى – تاۋەلسىز قازاقستاننىڭ ىرگەتاسى قالاندى! بۇل – تاريحي فاكت.

تاريحتىڭ نە ءبىر وتكەلەگىندە اتىراۋ-ارقا-الاتاۋ-التايعا دەيىنگى ۇلان بايتاق جەردى ساقتاپ قالعان قازاق – ۇلى حالىق! ونىڭ بۋرجۋازياسىنىڭ دا (ەگەر ول ۇلتتىق بۋرجۋازيا بولسا؟) سول كەمەڭگەر ۇلتقا لايىق ءوزىنىڭ تاريحي شەشىمىن قابىلدايتىن كەزى كەلدى! ۇلتتىق ەكونوميكانى وسى داعدارىستان امان الىپ شىعاتىن وسىلار! ەلدىڭ ىرزىعىن قۇزعىنشا باۋىرىنا باسىپ جەمەي، قىرانشا شاشىپ جەيتىن زامان كەلدى! وسىناۋ سىندارلى ساتتە ءوزىنىڭ بايلىعىنىڭ، ەڭ بولماسا 50 پايىزىن مەملەكەتتىك زايمعا ايىرباس­تاپ، نە كورسە دە كىندىك قانى تامعان ەل-جۇرتىمەن بىرگە كورىپ، تۇرالاعان جۇرتىن تۇيىقتان شىعارىپ السا، تاريح اقتاپ، اللا جارىلقايدى ونى!

دىندە «يسپوۆەد» دەگەن ۇعىم بار، كۇناھار ادام بالاسىنىڭ اللانىڭ الدىنا بارىپ، كۇنادان ارىلۋ دۇعاسى! بۇگىن ءبىزدىڭ ءبارىمىز دە قوس قولىمىزدى ۇستاپ، سول ءتاڭىرىنىڭ الدىندا تۇرمىز!

كىنا كوپ. مەملەكەت، قوعام، بيلىك قانا ەمەس، ءبىزدىڭ ءبارىمىز دە كىنالىمىز: اعا-ءىنى، قارىنداس-باۋىرلارىمىزدى توسىننان كەلگەن ىندەتتەن ساقتاپ كالا المادىق قوي؟ ءبارى دە ادام ءۇشىن – ادامنىڭ يگىلىگى ءۇشىن دەيتىن قوعام قۇرا المادىق قوي؟!

و، ءتاڭىرى! كەشە گور بىزدەي كۇناھار پەندەڭدى!

تاريحتىڭ ءبىر ساباعى – كەدەي ەل وركەنيەت ورىنە شىعا المايدى! پرەزيدەنتتىڭ جانىنداعى ۇلتتىق قوعامدىق سەنىم كەڭەسى، بۇگىننەن باستاپ، مىنە، وسى ماسەلەمەن اينالىسسا، شەشىلمەيتىن ءتۇيىن، الىنبايتىن اسۋ جوق بىزگە! وسىعان ۇلت، ۇلىسىمىزعا قاراماي، ءبارىمىز ءبىر كىسىدەي ات سالىسايىق! ويلانايىق! عالامعا قازاقتىڭ قانداي ۇلت ەكەنىن كورسەتەتىن كۇن كەلدى!

ءبىر-ءبىرىمىزدى باي، كەدەي دەمەي، ءبىر جەڭنەن قول، ءبىر جەردەن ءسوز شىعارىپ، پرەزيدەنتىمىزدىڭ ماڭىنا جينالۋىمىز كەرەك! كەدەيگە دە، بايعا دا قازاقستاننىڭ تاۋەلسىزدىگىنەن باسقا تاريحي قۇندىلىق جوق! بىزگە قازاقستاننان باسقا ەل جوق! ودان باسقا بارار جەر، باسار تاۋ جوق بىزگە! ءبىر-ءبىرىمىزدى جاعادان الىپ، قىرقىسۋدى قويىپ، ۇلتتىق كەلىسىمگە كەلەيىك!

ەرتەڭ كەش بولادى...

ۇرلىق اۋرۋى ءبىزدىڭ ەتىمىزدەن ءوتىپ، سۇيەگىمىزگە جەتكەن ەكەن; شەتەلدەن كەلگەن گۋمانيتارلىق كومەككە اۋىز سالا باستاعاندار شىقتى! ەمحانالاردا ءدارى جوق! بار بولسا، تىستەگەننىڭ اۋزى، ۇستاعاننىڭ قولىندا كورىنەدى؟! بۇل نە سۇمدىق؟!

الەۋمەتتىك جەلىلەرگە قاراساڭ، زارەڭ ۇشادى! قازاق كىمنىڭ دوس، كىمنىڭ قاس ەكەنىن ءالى بىلمەي جاتىر. وتىز جىل قوردالانعان ۇلتتىڭ كوكەيكەستى ماسەلەلەرىن ءبىر كۇندە شەشۋ مۇمكىن ەمەس قوي؟

پرەزيدەنت تۋرالى جاقسى لەبىز ايتۋ، مەن قازاقپىن، قازاقستان – مەنىڭ وتانىم دەيتىن ەلدىڭ وزىنە جاقسى. بۇل – ءبىزدىڭ ەلىمىز! بىزدە بۇدان باسقا ەل دە، مەملەكەت تە جوق ەندى! ءبىزدىڭ بۇدان باسقا پرەزيدەنتىمىز دە جوق! پرەزيدەنتتىڭ ءجۇزى جارقىن بولماسا، قازاقتىڭ بولاشاعى دا كومەسكى بولادى... وعان كەلەسى سايلاۋعا دەيىن ۋاقىت بەرەيىك! العاشقى قادامىنىڭ ءوزى كەلەشەكتەن كوپ ءۇمىت كۇتتىرىپ وتىر! تايپالىق-توبىرلىق-قۇلدىق پسيحولوگيادان قۇلان-تازا ارىلىپ، قازاققا وركەنيەتتى ۇلت بولاتىن كەزەڭ كەلدى!

وسى سىندارلى ساتتە ءبىزدىڭ ءبارىمىز دە پرەزيدەنتتىڭ ماڭايىنا توپتاسۋىمىز كەرەك! ونىڭ ادالدىعى مەن بيىك ينتەللەكتىسىنە سەنىپ، ءبىر جەردەن ءسوز، ءبىر جەڭنەن قول شىعارىپ، قازاقستاننىڭ تاۋەلسىزدىگىن كوزىمىزدىڭ قاراشىعىنداي ساقتاۋىمىز قاجەت! ماسەلە وسىندا!

كەۋدەڭدى قىسقان قىجىلىڭ ىشىڭە سىيماي بارا جاتسا، الدا كوسىلە سويلەيتىن ۋاقىت بار عوي؟! قالاي ەل بولامىز، قايتىپ وركەنيەت ورىنە شىعامىز، وتكەننەن قالاي ساباق الامىز دەگەن ناقتى ۇسىنىس، پىكىر، ويلارىڭىز بولسا ورتاعا سالىڭىز؟

 

سەرىك اقسۇڭقار ۇلى،

اقىن، قازاقستاننىڭ ەڭبەك سىڭىرگەن قايراتكەرى

 

قاراعاندى وبلىسى

سوڭعى جاڭالىقتار

ۇقساس جاڭالىقتار