ءبىلىم • 20 شىلدە، 2020

ەلوردالىق پەداگوگتەر "قاشىقتان وقىتۋدى ۇيرەنەمىن" ونلاين-كۋرسىنان وتەدى

603 رەت كورسەتىلدى

كۋرستا مۇعالىمدەر قاشىقتان وقىتۋدىڭ ەرەكشەلىكتەرى مەن تۇرلەرىن زەرتتەپ، ونلاين-ساباقتاردىڭ وقۋ ءۇردىسىن جوسپارلاۋدى ۇيرەنەدى. بۇل تۋرالى ەلوردا اكىمدىگىنىڭ رەسمي سايتىنى سىلتەمە جاساي وتىرىپ Egemen.kz حابارلايدى.

24-29 تامىز ارالىعىندا ءبىلىم بەرۋ ۇيىمدارىنىڭ بارلىق پەداگوگتەرى "نازارباەۆ زياتكەرلىك مەكتەپتەرى"، "پەداگوگيكالىق شەبەرلىك ورتالىعى" ازىرلەگەن "قاشىقتان وقىتۋدى ۇيرەنەمىن" ونلاين-كۋرسىندا ءبىلىم الادى. بۇل تۋرالى بۇگىن بريفينگتە قالالىق ءبىلىم باسقارماسىنىڭ باسشىسى شولپان قادىروۆا حابارلادى.

"كۋرس بەس مودۋلدەن تۇرادى: قاشىقتان وقىتۋ ەرەكشەلىكتەرى، وقۋعا تارتۋ، اقپاراتتىق-تەحنيكالىق قۇرالدارى، كاسىبي ىنتىماقتاستىق، اتا-انالاردى پەداگوگيكالىق قولداۋ. كۋرس ۇزاقتىعى – 40 اكادەميالىق ساعات، وتكىزۋ فورماتى – اسينحروندى. بۇل تىڭداۋشىلارعا ءوز بەتىنشە ءوتۋ ۋاقىتى مەن قارقىنىن تاڭداۋعا مۇمكىندىك بەرەدى. كۋرستار «Stepik» ءبىلىم بەرۋ پلاتفورماسىندا وتەدى"، – دەدى ش.قادىروۆا.

ونلاين-كۋرستىڭ ءاربىر تاقىرىبى مۇعالىمدەردىڭ ءوز بەتىنشە زەردەلەۋى ءۇشىن وزەكتى ماتەريالدار مەن رەسۋرستاردى قامتيدى. پەداگوگتەر كۋرستاردا قاشىقتان وقىتۋدىڭ ەرەكشەلىكتەرى مەن تۇرلەرىن زەرتتەپ، ونلاين-ساباقتاردىڭ وقۋ ۇدەرىسىن جوسپارلاۋدى، وقۋ جەتىستىكتەرىن باعالاۋدى ۇيىمداستىرۋدى ۇيرەنەدى.

سونىمەن قاتار نۇر-سۇلتان قالاسىنىڭ ءبىلىم بەرۋدى جاڭعىرتۋ ورتالىعى تامىز ايىنىڭ 1 جانە 2-ءشى اپتاسىندا "تسيفرلىق پەداگوگيكا: وقىتۋ جانە تاجىريبە" تاقىرىبىندا ونلاين-وقىتۋ ۇيىمداستىرۋدى جوسپارلاپ وتىر. ونلاين وقىتۋ كەزىندە 12 480 (100%) پەداگوگ قامتىلادى، ونىڭ ىشىندە مەكتەپكە دەيىنگى ءبىلىم بەرۋ پەداگوگتەرى – 2562، جالپى ءبىلىم بەرۋ مەكتەپتەرى – 9036، تجكب مۇعالىمدەرى – 882. "مايكروسوفت" كومپانياسىنىڭ ءبىرىنشى جانە جالعىز اۆتوريزاتسيالانعان سەرىكتەسى Knowledge Engineering كومپانياسىمەن بىرگە، پلاتفورما مۇمكىندىكتەرىن ءتيىمدى پايدالانۋ بويىنشا ءبىلىم بەرۋ ۇيىمدارىنىڭ 5987 (47%) پەداگوگىنە ۆەبينار وتكىزىلەدى.

ۆەبينار ء"بىلىم بەرۋگە ارنالعان ينتەراكتيۆتى قۇرالدار. مۇعالىم ءبىلۋى ءتيىس تەحنولوگيالار" دەگەن باعدارلامالىق مودۋل بويىنشا وتەدى. پەداگوگتەر 4 توقساننان باستاپ قازىرگى ۋاقىتقا دەيىن، Academia.kz پەداگوگيكالىق شەبەرلىكتىڭ ۆيرتۋالدى زەرتحاناسىندا ءبىلىم جەتىلدىرۋدە. ۆيرتۋالدى زەرتحانادا پەداگوگيكا، پسيحولوگيا، اقپاراتتىق-كوممۋنيكاتسيالىق تەحنولوگيالار جانە ت.ب. ماسەلەلەر بويىنشا ەڭ وزەكتى ونلاين-كۋرستار توپتاماسى ۇسىنىلعان.

جاراتىلىستانۋ-ماتەماتيكالىق باعىتتاعى ءبىلىم بەرۋ مەكتەپتەرىنىڭ پەداگوگتەرىن قولداۋ ماقساتىندا "مۇعالىمدەردىڭ ونلاين اكادەمياسى" جوباسى ىسكە اسۋدا. قالانىڭ تاجىريبەلى مۇعالىمدەرى پەداگوگتەر ءۇشىن مەكتەپىشىلىك كۋرستار وتكىزۋ ارقىلى ادىستەمەلىك كومەك كورسەتۋدە (ماقساتتى توپتار قۇرىلدى). سونداي-اق ۇزدىك پەداگوگتەردىڭ تاجىريبەسىن جيناقتاۋ ارقىلى جاڭا ادىستەمەسى بار پەداگوگ-زەرتتەۋشىلەر مەن پەداگوگ-شەبەرلەر زەرتحاناسىن قۇرۋ جوسپارلانعان. ءبىلىم بەرۋدى جاڭعىرتۋ ورتالىعى "استانالىق ەلەكتروندى مەكتەپ" ەلەكتروندى پلاتفورماسىن ازىرلەۋدە، وندا قىسقا مەرزىمدى ساباق جوسپارلارى، بەينە ساباقتار مەن ساباقتار، ءبىلىم بەرۋ تسيفرلىق رەسۋرستارى ورنالاستىرىلاتىن بولادى.

ءبىلىم بەرۋدىڭ بارلىق دەڭگەيلەرىندەگى پەداگوگتەر ءۇشىن وسى پلاتفورماعا ەركىن كىرۋ مۇمكىندىگى قاراستىرىلعان. ماۋسىم ايىنان باستاپ yardstream ارقىلى جۇزەگە اساتىن "پەداگوگيكالىق تاجىريبە الاڭى" اشىق جۇمىس ىستەيدى. ءبىلىم بەرۋدىڭ بارلىق دەڭگەيلەرىندەگى پەداگوگتەر الەۋمەتتىك جەلىلەر مەن يۋتۋب ارناسى ارقىلى كەز كەلگەن ۋاقىتتا ەلوردالىق مۇعالىمدەردىڭ تاجىريبەسىمەن تانىسا الادى.


سوڭعى جاڭالىقتار

ۇقساس جاڭالىقتار