ايماقتار • 15 شىلدە، 2020

جەزقازعاندا دارىگەر جەتىسپەيدى

79 رەت كورسەتىلدى

ارقا ءتوسىنىڭ ەڭ بايلىعىنان مول ۇلەس العان "قازاقمىس" كومپانياسى ەلدەگى الاڭداتارلىق جاعدايعا بەتىن ەندى بۇرا باستاعانداي. بۇلاي دەيتىن سەبەبىمىز، الپاۋىت كاسىپورىن سوڭعى كەزدەرى كوروناۆيرۋسپەن كۇرەس مايدانىندا بارەكەلدى دەگىزەرلىك يگى ىستەرىمەن كوزگە ءتۇسىپ ءجۇر، – دەپ جازادى Egemen.kz.

تاياۋدا اتالعان كومپانيا جەزقازعان ءوڭىرى ءۇشىن وكپەنى جاساندى جەدەلدەتۋ اپپاراتىنىڭ 14 داناسىن ساتىپ الدى. الداعى ۋاقىتتا تاعى 13-ءىن جەتكىزۋ جوسپاردا بار ەكەن. بۇدان بولەك، كاسىپورىن 150 وتتەگى كونتسەنتراتىن، 70 پۋلسوكسيمەترلەردى جانە 2 رەنتگەن-اپپاراتتى ساتىپ الىپ، ولاردى جەزقازعان جانە ساتباەۆ قالالارىنداعى اۋرۋحانالارعا تاراتىپ بەرىپتى.

مۇنىڭ ءبارىن جەزقازعان قالاسىندا وبلىس اكىمى جەڭىس قاسىمبەكتىڭ قاتىسۋىمەن بولعان كەڭەس وتىرىسى بارىسىندا دەنساۋلىق ساقتاۋ باسقارماسىنىڭ باسشىسى ەرجان نۇرلىباەۆ مالىمدەدى.

جاسىراتىنى جوق، جەزقازعان وڭىرىندە ىندەت ءورشىپ، ءولىم-ءجىتىم كوبەيىپ، جالپى ەپيدەميولوگيالىق جاعداي ۋشىعىپ تۇر. ماسەلەن، قازىرگى ۋاقىتتا كوروناۆيرۋسقا قارسى كۇرەستە دارىگەرلەردىڭ جەتىسپەۋشىلىگى انىق سەزىلەدى. سول سەبەپتى اتالعان جيىندا جەزقازعان ءوڭىرى ءۇشىن وبلىس وراتالىعىنان دارىگەرلەر بريگاداسىن جىبەرۋ ماسەلەسى اڭگىمەگە وزەك بولدى.  ولاردى ۋاقىتشا بولسا دا ءۇي-جايمەن قامتاماسىز ەتۋ جايى دا كۇن تارتىبىنە قويىلدى.

1

جيىندا وبلىس اكىمى جەڭىس قاسىمبەك وسى تۇيتكىلدى ماسەلەلەر ءتۇيىنىن تارقاتۋدىڭ امالدارى مەن جولدارى تۋراسىنداعى ءوزىنىڭ وي-پىكىرىن ءبىلدىردى.

– مەن بۇگىن مۇندا ەپيدەميولوگيالىق جاعدايمەن جەكە تانىسۋ ءۇشىن كەلدىم. كەيبىر كۇردەلى پروبلەمالاردىڭ بار ەكەنىن جاقسى بىلەمىن. ولاردىڭ ءبىرى – مەديتسينالىق كادرلاردىڭ تاپشىلىعى. ماسەلە مەنىڭ جەكە باقىلاۋىمدا. دارىگەرلەردى ىزدەيمىز. سونداي-اق، ءدارى-دارمەكتىڭ جەتىسپەۋشىلىگىنە بايلانىستى تۇرعىندار تاراپىنان شاعىمدار دا بار. جالپى، وبلىس بويىنشا مەديتسينالىق پرەپاراتتاردى جەتكىزۋ باستالدى. مەنىڭ مىندەتىم – ءىرى پارتيالاردى قامتاماسىز ەتۋ، ال ودان ءارى اكىمدەر ءدارى-دارمەكتى دارىحانالارعا جەدەل جەتكىزۋ ءۇشىن قاجەت بولعان جاعدايدا تاسىمالداۋمەن اينالىسۋى ءتيىس، –  دەدى ول.

بۇگىنگى كۇندە جەزقازعان قالاسىنا دەنە ىستىعىن باساتىن جانە ۆيرۋسقا قارسى ءدارى-دارمەكتىڭ العاشقى پارتياسى جەتكىزىلىپتى. بىراق، تۇرعىندار ونى پىشاق ءۇستى ءبولىسىپ العانعا ۇقسايدى. قوسىمشا پارتيالار جەتكىزىلمەسە، ءدارى-دارمەك تاپشىلىعىنىڭ سول كۇردەلى كۇيىندە قالا بەرەتىن ءتۇرى بار. دەگەنمەن، تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتى باسشىسىنىڭ ورىنباسارى يۋري زالىگين الداعى كۇندەرى بۇل ولقىلىقتىڭ ورنى تولاتىنىنا سەندىرىپ وتىر.

وڭىردە جاعداي وسىنداي بولىپ قالىپتاسقاندا، الىپساتارلار دا ايىلىن جيماي، لاس ىستەرىمەن اينالىسىپ كەلگەن. ماسەلەن، جەزقازعان مەن ساتباەۆ قالالارىنىڭ بەس ءدارىحاناسىندا ءدارى-دارمەك باعاسىنىڭ ارتۋى جانە پرەپاراتتاردى رەتسەپسىز ساتۋ فاكتىلەرى انىقتالعان. جيىن باراسىندا بەلگىلى بولعانداي، قازىرگى ۋاقىتتا بۇلاردىڭ ءىسىن جانە اتالعان سالاداعى باسقا دا بىلىقتاردى ەكونوميكالىق تەرگەۋ دەپارتامەنتى قاتاڭ تۇردە قاداعالاۋعا الىپتى.

كەڭەس وتىرىسىنىڭ سوڭىنا تامان وبلىس اكىمى كوروناۆيرۋسقا قارسى كۇرەس مايدانىندا ەرەن ەڭبەگىمەن كوزگە تۇسكەن مەديتسينا قىزمەتكەرلەرىنە مەملەكەتتىك ناگرادالاردى تابىس ەتتى.

قازاقستان رەسپۋبليكاسى پرەزيدەنتىنىڭ جارلىعىمەن ازاماتتاردىڭ دەنساۋلىعىن ساقتاۋ ىسىندەگى جانقيارلىق ەڭبەگى ءۇشىن ساتباەۆ قالاسى بويىنشا  تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ باسقارماسىنىڭ باسشىسى گاۋحار جالمۋرزينا "قۇرمەت" وردەنىمەن، جەزقازعان قالاسىنىڭ "مەديتسينالىق ورتالىعى" جشس ديرەكتورى ۆلاديمير موتورىكين "ەرەن ەڭبەگى ءۇشىن" مەدالىمەن ماراپاتتالدى.

ەسكە سالار بولساق، بۇگىنگى كۇندە جەزقازعان قالاسىندا 440 ورىندىق ءتورت جۇقپالى اۋرۋلار ستاتسيونارى جۇمىس ىستەپ تۇر. ونداعى جۇكتەلىم شامامەن 62% قۇرايدى. 350 توسەكتىك ءبىر پۋلموپروۆيزورلىق گوسپيتال، سونداي-اق 90 ورىنعا ارنالعان ەكى كارانتيندىك گوسپيتال جانە 15 رەانيماتسيالىق توسەك جانە بار. سونداي-اق، قازىرگى ۋاقىتتا جۇقپالى اۋرۋلار اۋرۋحاناسىنا كۇردەلى جوندەۋ جۇمىستارى جۇرگىزىلۋدە. ستاتسيونار  وسى جىلدىڭ كۇزىنە اشىلادى دەپ جوسپارلانعان.

سوڭعى جاڭالىقتار

ۇقساس جاڭالىقتار