تەحنولوگيا • 13 شىلدە، 2020

NASA مارسكا قامداندى

43 رەت كورسەتىلدى

عارىش سالاسى ونەركاسىپتىڭ باسقا تۇرلەرىندەي COVID-19-دىڭ تاۋەكەلدەرىنەن 100%-دى ساقتاندارىلماعان. ۆيرۋستىڭ تارالۋىن تەجەۋ ءۇشىن الەم بويىنشا كارانتين كۇشەيتىلىپ، اۋقىمدى جوبالاردىڭ جۇمىسى توقتاتىلدى. الايدا قاۋىپتى ىندەت SpaceX كومپانياسىنا جوسپاردى ورىنداۋعا كەدەرگى بولعان جوق. وعان تاياۋداعى Crew Dragon عارىش كەمەسىنىڭ حالىقارالىق عارىش ستانتسياسىنا استروناۆتتاردى جەتكىزۋى دالەل. دەگەنمەن بۇل يندۋسترياداعى كومپانيالارعا ءوز ستراتەگيالارىن جاڭا سىن-قاتەرگە يكەمدەۋگە تۋرا كەلدى.

ناۋرىز ايىندا كاليفورنياداعى NASA-نىڭ ەيمس اتىنداعى زەرتتەۋ ورتالىعى قاشىقتان جۇمىس ىستەۋ ساياساتىنا كوشكەن العاشقى ءىرى اگەنتتىككە اينالدى. مۇنداي قادامعا بارۋعا  قىزمەتكەرلەردىڭ بىرىنەن COVID-19-دىڭ تابىلۋى ماجبۇرلەدى. كوپ ۇزاماي NASA-نىڭ باسقا ورتالىقتارى دا وسىنداي جۇمىس تارتىبىنە اۋىستى.

كەز-كەلگەن اعىمداعى جۇمىستار جانە زەرتتەۋ جوبالارى ونلاين فورماتتا جۇزەگە اسىرىلا باستادى. ءبىر ورىندا اتقارىلۋى ءتيىس، دەسە دە اسىعىستىقتى تالاپ ەتپەيتىن بارلىق جۇمىس توقتاتىلدى. ءتىپتى ۇزاق ۋاقىتتان بەرى جالعاسىپ كەلە جاتقان دجەيمس ۋەب تەلەسكوبىنىڭ قۇرىلىسى كەيىنگە شەگەرىلدى.

"وتە ماڭىزدى" دەپ سانالعان جوبالار تەلەجۇمىس (قاشىقتان جۇمىس ىستەۋ) شەكتەۋلەرىنەن بوساتىلدى. ونىڭ ىشىندە ۇتقىر قوزعالىستى قوندىرعىلار زەرتحاناسىنداعى Mars 2020 جىلجىمالى اپپاراتىن قۇراستىرۋ (قازىرگى Perseverance) جانە كەننەدي عارىش ورتالىعىنداعى SpaceX-ءتىڭ Crew Dragon كەمەسىنىڭ ىسكە قوسىلۋى بولدى. مارس پلانەتاسىنا باعىتتالعان ميسسيانى جۇزەگە اسىرۋ ءۇشىن جەر مەن قىزىل عالامشاردىڭ اراقاشىقتىعى اناعۇرلىم جاقىن بولعانى ءتيىمدى. بۇل قاجەتتى وتىن مەن قۋات كولەمىن ۇنەمدەۋگە سەپتەسەدى. مۇنداي ءساتتى ۋاقىت ەكى جىلدا ءبىر كەلەتىندىكتەن "مارس-2020" ميسسياسى بيىلعى جازدىڭ سوڭىندا باستالۋى كەرەك-ءتى. ال Dragon ەكيپاجىنا حعس-نا (حالىقارالىق عارىش ستانتسياسىنا) استروناۆتتاردى جەتكىزۋ جوسپارىن كەيىنگە شەگەرۋ عارىش ايلاعىن ەكيپاجسىز قالدىرۋ قاۋپىن تۋدىرار ەدى.

قىزمەتكەرلەر وسىعان دەيىن دە مەديتسينالىق ءارى سانيتارلىق قاۋىپسىزدىك تالاپتارىن ۇستانىپ كەلدى. ەندى ادامدار اراسىنداعى ەكى مەتر اراقاشىقتىق ساقتىعى ادەتتەگى داعدىعا اينالادى. الايدا، عارىش بۇل – جوعارى تەحنولوگيالار يندۋسترياسى. بارلىق جۇمىستى پاتەردە ورىنداپ، قۇراستىرىلعان اپپاراتتى ءۇي جاعدايىندا سىناقتان وتكىزۋ مۇمكىن ەمەس. 

سالاداعى جەكەلەگەن كومپانيالار لوكاۋتتىڭ (وڭدىرىستىك جۇمىستى ۋاقىتشا توقتاتۋ) كەسىرىنەن زەرتحانالار مەن قاجەتتى جابدىقتاردى شىعارۋدى دوعارىپ، تۇتاستاي وندىرىستىك تسيكلدى جانە ۇشىرۋ سىناقتارىن توقتاتۋعا ءماجبۇر. ناۋرىزدىڭ سوڭىندا Bigelow Aerospace كومپانياسى بارلىق قىزمەتكەرلەرىن جۇمىستان بوساتسا، تاعى ءبىر الپاۋىت OneWeb كارجىلىق قيىندىق سالدارىنان بانكروتتىققا ءوتىنىش بەردى.

باسقا كومپانيالارعا، اسىرەسە شاعىن اگەنتتىكتەرگە ءسال كىدىرىس الىپ، ەكونوميكانىڭ قايتادان جانعىرۋىن توسۋدان باسقا امال جوق. ماسەلەن، زىمىران قوزعالتقىشتارىن شىعارۋمەن اينالىساتىن Relativity Space پاندەميانى العا تارتىپ، 3D فورماتىندا جولعا قويىلعان زىمىراندى جيناقتاۋدى باسەڭدەتتى. ايتسە دە كومپانيا CNBC-گە قىزمەتكەرلەردى قىسقارتۋ جوسپاردا جوق ەكەنىن، سونداي-اق ءوندىرىس ءالى دە جالعاسىپ جاتقانىن مالىمدەدى.

نارىقتىڭ وزگە قاتىسۋشىلارى كارانتين ەرەجەلەرىن بۇزىپ، كوزدەلگەن ماقساتتى قايتسە دە ىسكە اسىرۋدىڭ ءتۇرلى امالدارىن قولدانىپ كەلەدى. SpaceX باستى باسەكەلەسى OneWeb-ءتىڭ بانكروتقا ۇشىراعانىنا قاراماستان ءوزىنىڭ تومەن وربيتالدى سپۋتنيكتىك جۇيەسىنە 482 Starlink جەرسەرىگىن وربيتاعا جەتكىزدى. سول سەكىلدى يلون ماسكتىڭ كومپانياسى عارىش ۇشاقتارىن سىنقتان وتكىزۋدى جالعاستىرىپ جاتىر. ال Virgin Orbit بىرنەشە اپتا بۇرىن عارىشقا العاشقى اپپاراتتى شىعارۋدى قولعا الدى.

سالانىڭ داعدارىسقا بەلشەسىنەن باتۋىنان NASA مەن قورعانىس مينيسترلىگى اراسىنداعى ۇكىمەتتىك كەلىسىمشارتتار ساقتاسا كەرەك. وسى ۋاقىتقا دەيىن ولار باسەڭدەگەن ەمەس. ءساۋىردىڭ سوڭىندا عارىش اگەنتتىگى ايعا قوناتىن قوندىرعىلاردى ازىرلەيتىن ءۇش كومپانيانى "ارتەميدا" باعدارلاماسىنا ىرىكتەپ الدى. سونىمەن قوسا مۇزدىقتاردى زەرتتەۋگە ارنالعان VIPER اپپاراتىن جەردىڭ تابيعي سەرىگىنە جەتكىزەتىن كومپانيا انىقتالۋعا جاقىن قالدى. بۇدان باسقا اگەنتتىك Northrop Grumman كومپانياسىمەن "ايدىڭ قاقپاسىنا" ارنالعان تۇرعىن ءۇيدىڭ ءمودۋلىن ازىرلەۋگە بايلانىستى كەلىسىمشارت جاسادى.

عارىش يندۋسترياسى قالىپتى ءومىردىڭ ورالۋىن اسىعا كۇتۋدە. "مارس-2020" جوباسى شىلدەنىڭ اياعىندا ىسكە اسىرىلادى دەپ جوسپارلانىپ وتىر. NASA جانە Northrop Grumman دجەيمس ۋەب تەلەسكوبىنىڭ قۇرىلىسىن قالپىنا كەلتىرمەك نيەتتە. بىراق ونى ۇشىرۋدىڭ ۋاقىتى ءالى انىقتالعان جوق. بۇدان بولەك، ادامداردى ايعا جەتكىزۋگە ارنالعان جاڭا عارىش كەشەنىنىڭ العاشقى ساتىسىن ازىرلەۋ بويىنشا شەكتەۋلى جۇمىستار جانداندى.

سوڭعى جاڭالىقتار

اداسقان بالالار امان-ەسەن تابىلدى

ايماقتار • 07 تامىز، 2020

ۇقساس جاڭالىقتار