ەل پرەزيدەنتى قاسىم-جومارت توقاەۆ بىرلەسكەن وتىرىستا COVID-19 ۆيرۋسىنا قارسى مەملەكەت تاراپىنان اتقارىلىپ جاتقان شارالارعا, سونداي-اق الدا اتقارىلۋى ءتيىس جۇمىستارعا توقتالدى. ءتيىستى جوعارى لاۋازىم يەلەرى مەن مەملەكەتتىك قىزمەتكەرلەرگە وسى ماسەلەدە ۇلكەن جاۋاپكەرشىلىك جۇكتەلەتىنىن اتاپ كورسەتتى.
حالقىمىز نەبىر ناۋبەت جىلدارىن باستان كەشىردى. بۇل ىندەتتەن دە ارىلارىمىز انىق. مەملەكەت باسشىسىنىڭ 13 شىلدەنى – ۇلتتىق ازا تۇتۋ كۇنى دەپ جاريالاۋى – ءار سالادا وزىندىك ۇلەس قوسىپ جۇرگەن بەلگىلى قوعام قايراتكەرلەرىنەن, جالپى جاقىنىنان ايىرىلعان ءار وتباسىنىڭ قامكوڭىلىن جۇباتۋ دەپ تۇسىنەمىز.
بەرەكە-بىرلىگىمىز جاراسقان حالقىمىزدىڭ اماندىعى ءۇشىن ارقايسىمىز زور جاۋاپكەرشىلىك تانىتىپ, بىرلەسە كۇرەسەيىك, اعايىن!
ءابدىماناپ بەكتۇرعانوۆ,
پارلامەنت ءماجىلىسىنىڭ دەپۋتاتى,
Nur Otan پارتياسى فراكتسياسىنىڭ مۇشەسى
