وكىنىشكە قاراي – كوروناۆيرۋسقا الەمدەگى مەديتسيناسى دامىعان مەملەكەتتەر دە دەر كەزىندە توتەپ بەرە العان جوق. ءبىر كۇندە مىڭداعان ادامنىڭ ۆيرۋس جۇقتىرۋى مەديتسينا سالاسىنا ۇلكەن سالماق ءتۇسىردى. مۇنداي جاعداي ءبىزدىڭ ەلدى دە اينالىپ وتپەدى. دەنساۋلىق ساقتاۋ سالاسى اۋرۋحاناعا اعىلعان ناۋقاستار نوپىرىنەن قيىندىققا تاپ كەلدى. ۆيرۋسپەن كۇرەسىپ جۇرگەن دارىگەرلەرىمىز دە جۇقتىرىپ, ءتىپتى قازا بولعان وقيعالارى دا كەزدەستى. مۇنىڭ ءبارى, ارينە, وڭاي ەمەس.
قاۋىپتى دەرت تۇرعىندار اراسىنا تاراپ كەتتى. قازىر ەلىمىزدە تۇسىنىكسىز تۇماۋمەن اۋىرىپ, پنەۆمونياعا شالدىعىپ جاتقاندار سانى دا كۇرت ارتىپتى. «جىعىلعانعا جۇدىرىق» دەمەكشى, وسىنداي كەزەڭدە ءدارىحانالاردا ءدارى قىمباتتاپ, كەيبىرى سورەلەردەن تابىلمادى. دەرتىنە شيپا بولار ءدارى تاپپاعان جۇرت سەڭدەي سوعىلىسىپ ءجۇر.
مەملەكەت باسشىسى قاسىم-جومارت توقاەۆ حالىققا ۇندەۋىندە بۇعان ەرەكشە نازار اۋداردى. پرەزيدەنت ءدارى-دارمەك باعاسىن نەگىزسىز كوتەرگەندەردى جاۋاپكەرشىلىككە تارتۋعا تاپسىرما بەرگەنىن مالىمدەدى.
ەندى العاشقى مەديتسينالىق كومەك كورسەتۋ جۇمىسى ودان ءارى جەتىلدىرىلمەك. قازىرگە دەيىن قازاقستاندا ۋنيۆەرسالدى 400 موبيلدىك ەمدەۋ بريگاداسى بار. وسى ايدىڭ سوڭىنا دەيىن ونىڭ سانى 3,5 مىڭعا ارتادى. اۋرۋحانالارداعى ورىندار سانى كوبەيتىلىپ, دالا گوسپيتالدارىن جاساقتاۋ قولعا الىنباق.
قورىتا ايتقاندا, جۇقپالى ىندەت سالدارىنان جاقىنىنان ايىرىلعان جۇرتىمىز ءۇشىن, دەرتكە داۋا تاپپاي ەلەڭ-الاڭ كۇي كەشكەن ەلىمىز ءۇشىن بۇل كوڭىلگە مەدەۋ, جانعا جىگەر, ۇمىتكە قانات بىتىرگەن ۇندەۋ بولدى.
جامبىل احمەتبەكوۆ,
ءماجىلىس دەپۋتاتى
