جالپى, وبلىستا 5581 ادام مەديتسينا قىزمەتكەرلەرىنىڭ باقىلاۋىنا الىنعان. ونىڭ ىشىندە ستاتسيونارلىق ەمدەۋدە 2583 ناۋقاس بولسا, 895 سيمپتومسىز ناۋقاس ءۇي جاعدايىندا ەمدەلىپ جاتىر. ال ۇيدە وقشاۋلانعاندار سانى 2103 ادام ەكەن.
– ينفەكتسيالىق اۋرۋحانالارداعى رەانيماتسيا بولىمدەرىندە اۋىر جانە وتە اۋىر جاعدايداعى 41 پاتسيەنت بار. ولاردىڭ 39-ى ەرەسەك ادام, 2-ەۋى بالا. 15 ناۋقاس وكپەنى جاساندى جولمەن جەلدەتۋ اپپاراتىنا قوسىلعان. جالپى, سوڭعى اپتادا ينفەكتسيانىڭ ءوسۋ قارقىنى 4 پايىزدى قۇرادى. وبلىستا ەپيدەمياعا قارسى جانە زارارسىزداندىرۋ شارالارى جالعاسۋدا, – دەيدى الماتى وبلىسىنداعى ىندەتپەن كۇرەس جۇمىسىنىڭ بارىسىمەن تانىستىرعان وبلىس اكىمىنىڭ ورىنباسارى باتىرجان بايجۇمانوۆ.
وكىنىشكە قاراي وتكەن جىلمەن سالىستىرعاندا وبلىستا وكپەسى قابىنعانداردىڭ ۇلەسى 2,5 ەسەگە ءوسىپ وتىر. ناۋقاستار اراسىنداعى ءولىم-ءجىتىم كوبەيىپ كەتكەن. بىلتىر وسى مەرزىمدە پنەۆمونيادان 90 ادام قايتىس بولسا, قازىر 190 ادام دەرتتەن كوز جۇمعان.
– وبلىستا سوڭعى اپتادا پروۆيزور بولىمىنەن 618 ادام ەمدەلىپ شىقتى. جالپى, كۇن سايىن وكپەسى قابىنعان 150-دەن استام ناۋقاس ەمدەلىپ شىقسا, وسى دياگنوزبەن ەمحاناعا تۇسەتىندەر سانى 200-گە دەيىن جەتىپ وتىر. اۋرۋى اسقىنعان پاتسيەنتتەر سانىنىڭ وسۋىنە بايلانىستى ينفەكتسيالىق ستاتسيوناردا سوڭعى ەكى اپتادا ورىندار سانى 3 ەسە, ياعني 17 ستاتسيونارلىق مەكەمەدە 150-دەن 500-گە دەيىن ارتتى. پنەۆمونيامەن اۋىراتىن ناۋقاستاردى ەمدەۋ ءۇشىن 31 ستاتسيوناردا توسەك سانى 1 مىڭنان 3 مىڭعا دەيىن كوبەيتىلدى. ماسەلەن, تالدىقورعان قالاسىنداعى 300 ورىندىق ينفەكتسيالىق ستاتسيونار وبلىستىق اۋرۋحانا بازاسىنا كوشىرىلدى. تەرى-ۆەنەرولوگيالىق ديسپانسەر بازاسىندا 85 پروۆيزورلى توسەكتىك ورىن اشىلدى. سونىمەن قاتار بۇگىننەن باستاپ وبلىستىق فتيزيو-پۋلمونولوگيا ورتالىعىندا 120 توسەكتىك پروۆيزورعا ناۋقاستاردى قابىلداۋ باستالدى. تالدىقورعان قالاسى بويىنشا 532 پروۆيزورلىق قابىلداۋ ورنى 532 توسەككە دەيىن جەتتى, – دەيدى ب.بايجۇمانوۆ.
ال وبلىس اۋماعىندا ءدارى-دارمەك تاپشىلىعىن بولدىرماۋ جانە ونىڭ باعاسىن وسىرۋگە جول بەرمەۋ ماقساتىندا بىرنەشە مونيتورينگ توبى قۇرىلىپ, جۇمىس ىستەۋدە. قازىر ايماقتا مەملەكەت باسشىسىنىڭ تاپسىرماسىنا سايكەس ءدارى-دارمەكتىڭ قولجەتىمدى بولۋى مەن باعاسىن وسىرۋگە جول بەرمەۋ ماقساتىندا وبلىستىق باس مەملەكەتتىك سانيتارلىق دارىگەرىنىڭ قاۋلىسىمەن مونيتورينگ توبى قۇرىلعان. سول سياقتى Nur Otan پارتياسىنىڭ اۋداندىق, قالالىق فيليالدارى دا بۇل ماسەلەنى باقىلاۋدا ۇستايدى. ءدارى-دارمەكتىڭ كوتەرمە جانە بولشەك ساۋداسى ماسەلەسى بويىنشا ءوزارا ىنتىماقتاستىق تۋرالى ۇشجاقتى مەموراندۋمعا قول قويىلعان. بۇگىنگە دەيىن الماتى وبلىسىنداعى فارماتسەۆتيكالىق قىزمەتپەن اينالىساتىن 70 نىسانعا مونيتورينگ جاسالعان. الىپساتارلىققا جول بەرمەۋ ءۇشىن مەديكامەنتتەردىڭ ءبىر قولعا ساتىلاتىن كولەمى جونىندە كەڭىنەن ءتۇسىندىرۋ جۇمىستارى جۇرگىزىلۋدە.
الماتى وبلىسى
