جيىن بارىسىندا راۋشان قاراباەۆا سيمپتومسىز كوروناۆيرۋستى ۇيدە ەمدەۋدە قانداي قاتەلىكتەرگە جول بەرمەۋ كەرەك ەكەنىن ايتىپ بەردى.
«كوروناۆيرۋس ينفەكتسياسىنىڭ سيمپتومى از نەمەسە سيمپتومسىز ناۋقاستار ۇيدە ەمدەلۋى كەرەك. ارينە ولار وزدىگىنەن ەم قابىلداپ جاتىر جانە دارىگەرلەر مۇنداي ناۋقاستاردىڭ ەم-دومىن رەتتەپ وتىرۋى كەرەك. كوروناۆيرۋستىڭ سيمپتومى از ءتۇرى پاتوگەنەتيكالىق ەمدەۋدى, دالىرەك ايتقاندا ۆيرۋسقا قارسى, انتيباكتەريالىق, ترومبقا قارسى پرەپاراتتار تاعايىنداۋدى قاجەت ەتپەيدى. مۇنداي پاتسيەنتتەر ەمدەۋ-ساقتانۋ رەجىمىندە اقۋىزى كوپ تاماق جەپ, سۇيىقتىقتى كوپ ءىشۋى كەرەك. ولارعا س, د دارۋمەندەرى جانە دەنە قىزۋى كوتەرىلگەن جاعدايدا پاراتسەتامول, يبۋپروفەن سىندى قىزۋ تۇسىرەتىن دارىلەر تاعايىندالادى», دەدى دارىگەر.
ونىڭ ايتۋىنشا, س دارۋمەنىنىڭ ۇلكەن دوزاسى تاعايىندالعان جاعدايدا, بۇيرەك اۋرۋلارىنىڭ, نەسەپ-تاس اۋرۋىنىڭ كۇشەيۋى مۇمكىن ەكەنىن ەستە ساقتاعان ءجون. ەگەر دەنە قىزۋى 38 گرادۋستان اسقاندا, بۇلشىق ەت اۋىرىپ, السىزدىك بايقالسا, باس اۋىرىپ, جوتەل پايدا بولسا, كەۋدە تۇسى اۋىرسا, دارىگەرگە جۇگىنىپ, وكپە قابىنۋىنىڭ الدىن الۋ كەرەك. ول ءۇشىن كوكىرەك قۋىسىنا رەنتگەنولوگيالىق زەرتتەۋ نەمەسە كومپيۋتەرلىك توموگرافيا جۇرگىزىلەدى.
«كوروناۆيرۋس ينفەكتسياسىنداعى ەتيوتروپتى (نەگىزگى) ەم – ۆيرۋسقا قارسى پرەپاراتتار تاعايىنداۋ. قازىرگى ۋاقىتتا كۆي ەمدەۋ ءۇشىن لوپيناۆير/ريتوناۆير, گيدروكسيحلوروحين, فاۆيپيراۆير جانە رەمدەسەۆير سىندى دارىلىك زاتتار جازىلادى. بۇل رەتتە اتالعان دارىلەردىڭ بەلگىلى ءبىر قاۋىپ توندىرەتىنىن, جۇرەك پەن باۋىرعا ۋىتتى اسەر ەتەتىنىن اتاپ وتكەن ءجون. وسىعان بايلانىستى سيمپتومى از جانە سيمپتومسىز ناۋقاستارعا بۇل دارىلەردى وزدىگىنەن قابىلداۋدىڭ قاجەتى جوق», دەدى ر.قاراباەۆا.
سونىمەن قاتار ول انتيبيوتيك ناۋقاستىڭ يممۋنيتەتىن ودان ءارى تومەندەتەتىنىن تىلگە تيەك ەتتى.
«قازىرگى ۋاقىتتا كۆي جۇقتىرعانداردىڭ ەش قاداعالاۋسىز انتيبيوتيك قابىلداپ جاتقانىن بايقادىق. انتيبيوتيكتەر اعزانىڭ يممۋندىق جاۋابىن قالىپتاستىرۋعا قاجەتتى ىشەك ميكروفلوراسىن بۇزادى. سايكەسىنشە, پاتسيەنتتىڭ يممۋنيتەتى ودان ءارى تومەندەي تۇسەدى. ادام بويىندا انتيبيوتيكتى سەزبەيتىن ميكرواعزالار شتامى پايدا بولادى جانە كەلەشەكتەگى باكتەريالىق ينفەكتسيالاردى ەمدەۋ ىسىنە ىقپال ەتەدى», دەدى ر. قاراباەۆا.
بۇعان قوسا ول اۋىر ينفەكتسيالاردا عانا قولدانىلاتىن رەزەرۆتى انتيبيوتيكتەردىڭ دە پايدالانىلىپ جاتقانىنا الاڭداۋشىلىق ءبىلدىردى.
«وعان جول بەرۋگە بولمايدى, سەبەبى پاتسيەنتتىڭ جاعدايىن ودان ءارى اۋىرلاتۋى مۇمكىن. باكتەريالىق كومپونەنت بولعان كەزدە كوروناۆيرۋستى انتيبيوتيكتەرمەن تەك دارىگەردىڭ نۇسقاۋىمەن عانا ەمدەۋ قاجەت», دەدى ر.قاراباەۆا.
