قوعام • 09 شىلدە، 2020

جەمقور شەنەۋنىكتەر "جول كارتاسىن" كەرتىپ جەۋگە كىرىستى مە؟

360 رەت كورسەتىلدى

"جۇمىسپەن قامتۋدىڭ جول كارتاسى-2020" باعدارلاماسى اياسىندا بيىل الماتى وبلىسىندا 109،2 ملرد تەڭگە قاراجات بولىنگەن بولاتىن. مول قارجىنىڭ ناتيجەسىندە ايماقتاعى ەڭبەك نارىعىنا دا سۇرانىس ارتىپ،  23 مىڭعا جۋىق ادام جۇمىسپەن قامتىلماق. قازىر وسى ماقساتتا مىڭعا جۋىق جوبا ماقۇلدانىپ، ءوڭىردىڭ بارلىق اۋداندارىندا جۇمىس قىزىپ تۇر. بىراق...

وكىنىشكە قاراي، مەملەكەتتىك باعدارلاما بويىنشا بولىنگەن قاراجاتقا قول سۇققان جەمقورلىق ارەكەتتەرى دە اشكەرە بولىپ وتىر. مىسالى، جاقىندا ۇلتتىق قاۋىپسىزدىك كوميتەتى الماتى وبلىسى بويىنشا دەپارتامەنتى مەن وبلىستىڭ سىبايلاس جەمقورلىققا قارسى قىزمەتى تەكەلى قالاسى اكىمى اپپاراتىنىڭ باسشىسىن تۇتقىندادى. قازىر اسا ءىرى كولەمدە پارا الدى دەگەن كۇدىككە ىلىنگەن شەنەۋنىكتىڭ ۇستىنەن سوتقا دەيىنگى تەرگەۋ باستالعان.

سىبايلاس جەمقورلىققا قارسى ءىس-قيمىل اگەنتتىگى الماتى وبلىسى بويىنشا دەپارتامەنتىنىڭ اسا ماڭىزدى ىستەر بويىنشا تەرگەۋشىسى قايسار بارجاقسىنوۆتىڭ ايتۋىنشا، لاۋزىمدى تۇلعا وكىلەتتىلىگىن اسىرا پايدالانىپ، قالاداعى "مۇگەدەكتەر قوعامى" بىرلەستىگىنىڭ ديرەكتورىنان 1 500 000 تەڭگە كولەمىندە پارا سۇراعان. ياعني، اپپارات باسشىسى "وڭىرلەردى دامىتۋدىڭ 2020 جىلعا دەيىنگى مەملەكەتتىك باعدارلاماسى" اياسىندا اتقارىلاتىن جۇمىس بويىنشا كەلىسىمشارت جاساۋدا جەڭىلدىك جاساۋ ءۇشىن مۇگەدەك جانداردان اقشا بەرۋدى تالاپ ەتكەن. قازىر قالادا "جول كارتاسى" بويىنشا قوماقتى قارجى ءبولىنىپ، اباتتاندىرۋ جۇمىسى ءجۇرىپ جاتىر. قوعامدىق بىرلەستىك كەلىسىم شارت نەگىزىندە وسى جۇمىستىڭ ءبىر بولىگىن اتقارىپ، بولىنگەن اقشانى يگەرۋى ءتيىس بولاتىن.

"سىبايلاس جەمقورلىققا قارسى ءىس-قيمىل اگەنتتىگىنىڭ الماتى وبلىسى بويىنشا دەپارتامەنتى ۇلتتىق قاۋىپسىزدىك كوميتەتى قىزمەتكەرلەرىمەن بىرلەسىپ، تەكەلى قالاسى اكىمى اپپاراتىنىڭ باسشىسىن ۇستادى. كۇدىكتى  قالا اۋماعىن ابباتتاندىرۋ تۋرالى جاسالعان شارت بويىنشا قوعامدىق بىرلەستىكتىڭ ديرەكتورىنا جالپى قولداۋ كورسەتكەنى ءۇشىن 1 500 000 تەڭگە سوماسىندا پارا الۋدى دەپ ايىپتالۋدا. تەرگەپ-تەكسەرۋ جالعاسۋدا. كۇدىكتىنىڭ كىناسىنىڭ دارەجەسى تۋرالى تۇپكىلىكتى شەشىمدى سوت شىعارادى"، دەيدى اسا ماڭىزدى ىستەر بويىنشا تەرگەۋشى قايسار بارجاقسىنوۆ.

ايتپاقشى، اپپارات باسشىسى پارا الۋ كەزىندە قاشۋعا ارەكەت جاساعان. ول ءوزىن ۇستاۋعا كەلگەن ارنايى قىزمەت وكىلدەرىن كورگەندە اعىسى قاتتى وزەنگە سەكىرىپ كەتىپتى. كۇدىكتىنى قۇتقارۋعا تۋرا كەلگەن. وكىنىشكە قاراي، لاۋىزىمدى شەنەۋنىككە قاتىستى بۇل وقيعا الماتى وبلىسىنداعى جالعىز مىسال ەمەس.

جاقىندا سىبايلاس جەمقورلىققا قارسى كۇرەس قىزمەتى وبلىستاعى "مەمساراپتاما" كاسىپورىنى باسشىسىن مەن قۇرىلىس كومپانياسىنىڭ ديرەكتورىن ۇستاعان بولاتىن. ولار "ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋدىڭ 2017 – 2021 جىلدارعا ارنالعان "ەڭبەك" مەملەكەتتىك باعدارلاماسى» بويىنشا اتقارالاتىن جۇمىس بارىسىندا ىمىرالاسىپ، سىبايلاس جەمقورلىققا جول بەرگەن. اتاپ ايتقاندا، لاۋزىمدى باسشى قۇرىلىس جۇرگىزگەن سەرىكتسەستىك ديرەكتورىنان 1 ملن تەڭگە كولەمىندە پارا الدى دەگەن كۇدىككە ءىلىندى.

"بۇل ءىس بويىنشا دا سوتقا دەيىنگى تەرگەۋ ءجۇرىپ جاتىر. "مەمساراپتاما" كاسىپورىنىڭ باسشىسىنا بيۋدجەت قارجىسىنا جوندەۋدەن وتكەن  1500 ورىندىق مەكتەپ قۇرىلىسىن مەملەكەتتىك ساراپتامادان وتكىزۋ كەزىندە ءىرى كولەمدە پارا الدى دەگەن ايىپ تاعىلدى. ال سەرىكتەستىك ديرەكتورى ساراپتاما تالاپتارىن وزگەرتۋ ءۇشىن 1 ملن تەڭگە سوماسىندا پارا بەرگەن"، دەيدى  سىبايلاس جەمقورلىققا قارسى ءىس-قيمىل اگەنتتىگىنىڭ الماتى وبلىسى بويىنشا دەپارتامەنتىنىڭ وكىلدەرى.

سونداي-اق بۇعان دەيىن وبلىستىق سىبايلاس جەمقورلىققا قارسى ءىس-قيمىل دەپارتامەنتى قاراساي اۋدانى اكىمىنىڭ ورىنباسارى اسا اۋىر سىبايلاس جەمقورلىق قىلمىسى ءۇشىن ۇستاعان بولاتىن. ول شەنەۋنىك تە كاسىپكەردەن پارا العانى ءۇشىن ايىپتالىپ وتىر. لاۋزىمدى تۇلعا "جۇمىسپەن قامتۋدىڭ جول كارتاسى-2020" باعدارلاماسى اياسىندا جوندەۋدەن ءوتۋى ءتيىس قۇرىلىس نىسانى بويىنشا كەلىسىم شارتتى راسىمدەۋ كەزىندە ءىرى كولەمدە پارا تالا پەتكەن. اتاپ ايتقاندا، جالپى قۇنى 660 ميلليون تەڭگە بولاتىن تاپسىرىستى قابىلداۋ ءۇشىن اكىمنىڭ ورىنباسارى 33،5 ميلليون تەڭگەنى زاڭسىز سىياقى رەتىندە قالتاعا باسپاقشى بولىپتى.

وكىنىشتىسى، وسى تەكتەس تاعى ءبىر قىلمىس كەربۇلاق اۋدانىندا دا تىركەلدى. ارنايى قىزمەت اۋدانى اكىمى اپپاراتىنىڭ باسشىسىن ۇستاعان. سوتقا دەيىنگى تەرگەۋ كەزىندە انىقتالعانداي، شەنەۋنىك جەكە كاسىپكەرمەن ىمىرالاسىپ، "جۇمىسپەن قامتۋدىڭ جول كارتاسى-2020" باعدارلاماسى بويىنشا بولىنگەن 5 ميلليون تەڭگە كولەمىندەگى بيۋدجەت قاراجاتىن جىمقىرعان ەكەن.

 

سوڭعى جاڭالىقتار

شىمكەنتتە 5 شاعىناۋدانعا گاز جۇيەسى تارتىلۋدا

وڭتۇستىك قازاقستان • بۇگىن، 16:05

COVID-19: ابدىراعان ارگەنتينا

الەم • بۇگىن، 11:25

ۇقساس جاڭالىقتار