ايماقتار • 08 شىلدە، 2020

جاعدايدى تۇراقتاندىرۋدى كوزدەيدى

12 رەت كورسەتىلدى

جەرگىلىكتى «Ertis تەلەارناسىنىڭ تىكەلەي ەفيرىندە وبلىس اكىمى ابىلقايىر سقاقوۆ «وڭىردەگى ەپيدەميالىق احۋال» تاقىرىبىنداعى سۇحباتقا قاتىستى. سۇحبات بارىسىندا وبلىس اكىمى وڭىردەگى ىندەتكە قارسى ءىس-شارالاردىڭ اتقارىلۋ بارىسى تۋرالى، دارىگەر مامانداردىڭ جەتىسپەۋشىلىگى، جالپى بۇل باعىتقا جۇمسالاتىن قارجىلاندىرۋ كولەمى تۋرالى بايانداپ بەردى.

– 7 شىلدە كۇنگى جاعداي بويىنشا وڭىردە كوروناۆيرۋستىق ينفەكتسيانىڭ 1 460 جاعدايى تىركەلدى، – دەدى ءا.سقاقوۆ. – 532 ادام ساۋىعىپ شىقسا، 14 ادام قايتىس بولدى. وبلىس بويىنشا پروۆيزورلىق توسەكتىك ورىندار سانى 3 462-گە دەيىن، ياعني 4 ەسە ارتتىرىلعان. قازىر وبلىستا پنەۆمونيامەن اۋىراتىن 2 194 ناۋقاس پروۆيزورلىق ستاتسيونارلاردا ەم الۋدا. اۋرۋدىڭ جەڭىل جانە ورتاشا فورماسىمەن 1 644 ناۋقاس امبۋلاتورلىق ەمدەلۋدە. ترياج-ورتالىعىنا بۇگىنگە 390 ادام تۇسكەن. وبلىس اكىمى مەديتسينا قىزمەتكەرلەرىنە ءار ناۋقاسقا جەتكىلىكتى مولشەردە نازار اۋدارۋ جانە بارىنشا كومەك كورسەتۋ مىندەتتەلگەنىن اتاپ ءوتتى.

قازىر 9554 تۇرعىن امبۋلاتورلىق جاعدايدا قارالۋدا ەكەن. 1644-ءى ورتا جانە جەڭىل ساتىداعى پنەۆمونياعا شالدىققان. قالعاندارى ستاتسيونارلاردان ساۋىعىپ شىققان ادامدار. سونىمەن بىرگە ناۋقاستار مەن مەديكتەر دەنساۋلىق ساقتاۋ مينيسترلىگىنىڭ نۇسقاۋلارى مەن ۇسىنىستارىن بۇلجىتپاي ورىنداۋلارى قاجەت. ادامدار ءوزىن ءوزى ەمدەۋدەن باس تارتىپ، دارىگەرلەر كومەگىنە جۇگىنۋلەرى كەرەك. وعان قوسا، بارلىق ماسەلە بويىنشا 109 بىرىڭعاي بايلانىس ورتالىعىنداعى جەدەل جەلىنىڭ كومەگىنە جۇگىنۋگە بولاتىن كورىنەدى.

– بۇگىندە وڭىردە 108 وكپەنى جاساندى جەلدەتۋ اپپاراتى بار، – دەدى وبلىس اكىمى. – ونىڭ 65-ءى قازىر جۇقپالى جانە پروۆيزورلىق ستاتسيونارلارعا تارتىلعان. جاقىن ارادا تاعى 33 اپپارات جەتكىزىلەدى. سونىمەن قاتار 226 وتتەگىمەن قامتاماسىز ەتۋ نۇكتەسى بار. قوسىمشا 155 نۇكتەنى جابدىقتاۋ تۋرالى شەشىم قابىلداندى، وسىلايشا ولاردىڭ جالپى سانى 400-گە دەيىن جەتكىزىلەدى.

بيۋدجەتتىڭ بارلىق دەڭگەيلەرىن، ونىڭ ىشىندە ۇكىمەت پەن جەرگىلىكتى اتقارۋشى ورگاندار رەزەرۆى، سونداي-اق وبلىستىق بيۋدجەتتى قوسا العاندا كوروناۆيرۋستىق ينفەكتسياعا قارسى ءىس-شارالارعا 2،8 ملرد تەڭگە ءبولىندى. ونىڭ 837 ملن تەڭگەسى ءوڭىر مەديتسينالىق ۇيىمدارىنىڭ ما­تە­ريالدىق-تەحنيكالىق جاعدايىن قام­تاماسىز ەتۋگە جۇمسالدى. ماسەلەن، وسى قاراجاتقا 33 وكپەنى جاساندى جەلدەتۋ اپپاراتى، 19 ستاتسيونارلىق موني­تور ساتىپ الىنسا، 42 ملن تەڭگەگە مە­ديتسينالىق بۇيىمدار مەن 660 ملن تەڭگەگە دارىگەرلەرگە ارنالعان ۇزاق مەر­زىمدى جەكە قورعانىس زاتتارى الىندى.

قازىر وبلىسقا 400-دەن استام مەديتسينا مامانى قاجەت. وڭىردە 3 اي ىشىندە ستاتسيونارلاردا جۇمىس ىستەيتىن مەديتسينا قىزمەتكەرلەر سانى 6 ەسە ءوستى.

– ستاتسيونارلاردا جۇمىس ىستەيتىن مەديتسينا قىزمەتكەرلەر سانى 497-دەن 2826 دەيىن ءوستى. بۇگىندە كادرلارعا جالپى قاجەتتىلىك 400-دەن استام ادامدى قۇرايدى. ءبىز قازىر بۇكىل وبلىستان دارىگەرلەردى جۇمىلدىردىق. بۇرىنعى مەديتسينا قىزمەتكەرلەرى مەن مەديتسينا وقۋ ورىندارىنىڭ تۇلەكتەرى ارا­سىنان كادرلاردى ىزدەپ وتىرمىز. وبلىستىڭ دەنساۋلىق ساقتاۋ باسقارماسى باسشىسىنىڭ وتىنىشىنە 103 ادام جاۋاپ بەردى. ونىڭ 17-ءسى جۇمىسقا كىرىستى. تاعى 26 ادام وزدىگىنەن جۇگىنۋ بويىنشا جۇمىسقا ورنالاستى. جانە 108 دارىگەر باسقا مەديتسينا ۇيىمدارىنان كومەككە كەلگەنىن اتاپ ءوتتى. سونداي-اق قوسىمشا تاعى 15 دارىگەر جۇمىسقا كىرىسۋگە دايىن.

وبلىس اكىمىنىڭ ايتۋىنشا، قازىر 17 مىڭ پاراتسەتامول قاپتاماسى جەتكىزىلدى. سونىمەن قاتار 6،5 مىڭنان استام تسەفترياكسون مەن تسەف-3 قۇتىسى اكەلىنگەن پرەپاراتتار ەكىباستۇز، اقسۋ قالالارى مەن اۋداندارعا جەتكىزىلەدى. وبلىستىڭ كوتەرمە قويمالارىنا 16 مىڭعا جۋىق قاپتاما انتيبيوتيك، ونىڭ ىشىندە، ۆيرۋسقا قارسى 5 مىڭعا جۋىق ورام، ىس­تىقتى تۇسىرەتىن جانە 8 مىڭعا جۋىق قاپ­تاما سيمپتوماتيكالىق ەمدەۋگە ار­نالعان پرەپاراتتار تۇسپەك.

– بۇگىندە مەديتسينالىق ۇيىمدار بۇرىن جاسالعان شارتتار بويىنشا ءدارى-دارمەك الاتىن بولادى، – دەيدى ايماق باسشى. – قوسىمشا ءوتىنىم 1،5 ملرد تەڭگەگە جۋىق سوماعا ساتىپ الۋعا بەرىلدى. 33 اتاۋلى انتيبيوتيكتەر، تروم­بوليتيكتەر جانە گورموندار جەدەل تار­تىپتە ساتىپ الىنادى.

باق وكىلدەرىنىڭ كوروناۆيرۋسقا قارسى كۇرەسكە ازاماتتىق قوعام مەن بيزنەستىڭ قانشالىقتى ۇلەس قوسىپ جاتقانى تۋرالى سۇراققا جاۋاپ بەرگەن ءوڭىر باسشىسى وسى ماقساتتا كوكتەمدە ارنايى قور قۇرىلعانىن ايتتى. COVID-19 ىندەتىنە قارسى قورعا بيزنەسمەندەردەن 122 ميلليون تەڭگە شاماسىندا قاراجات تۇسكەن. قورعا تۇسكەن اقشانى قاي جەرگە جۇمساۋعا بولاتىندىعىن شەشەتىن ارنايى قامقورشىلىق كەڭەس بار. وبلىس كولەمىندە وسى باعىتتا 400 ۆولونتەر جۇمىس ىستەۋدە.

 

پاۆلودار وبلىسى

سوڭعى جاڭالىقتار

شىعىسقا قار ءتۇستى

ايماقتار • كەشە

ۇقساس جاڭالىقتار