ايماقتار • 07 شىلدە، 2020

گۇلشارا ابدىقالىقوۆا ەپيدەميولوگيالىق جاعدايعا بايلانىستى بريفينگ وتكىزدى

30 رەت كورسەتىلدى

بۇگىن وبلىس اكىمى گۇلشارا ابدىقالىقوۆا ايماقتاعى ەپيدەميولوگيالىق جاعدايعا بايلانىستى ونلاين بريفينگ وتكىزدى.

- COVID-19 ىندەتىمەن كۇرەسۋ جولىندا ەلىمىزدە بىرقاتار شارالار قابىلدانۋدا. باس سانيتارلىق دارىگەردىڭ قاۋلىسىمەن وبلىسىمىزدا قاتاڭ كارانتيندىك رەجيمى ەنگىزىلدى. جاعدايدى قايتا باعامداپ، حالىق سۇرانىسىنا ساي قاجەتتى شارالاردى كۇشەيتۋ ءۇشىن قالاداعى بىرقاتار اۋرۋحانالار مەن ءدارىحانالاردى ارالاپ، تۋىنداعان ماسەلەلەردى جەدەل شەشۋ جولىن قاراستىردىق - دەدى وبلىس اكىمى.

وبلىس باسشىسىنىڭ تاپسىرماسىنا سايكەس  وڭىردە ينفەكتسيالىق جانە پروۆيزورلىق توسەك-ورىندارىن كوبەيتىلۋدە. وڭىرىمىزدە ينفەكتسيالىق ستاتسيوناردا 515، پروۆيزورلىق ستاتسيوناردا 1730 توسەك-ورىندارى بولسا، الدا وبلىستىق فتيزيوپۋلمونولوگيا ورتالىعى بازاسىندا قوسىمشا 120 ورىنعا ينفەكتسيالىق جانە شالقيا ەلدى مەكەنىندە 30 ورىندىق پروۆيزورلىق ستاتسيونار اشۋ جۇمىستارى جۇزەگە اسىرىلادى.

سونىمەن قاتار، وكپەنى جاساندى جەلدەتۋ اپپاراتى مەن وتتەگىنىڭ جەتىسپەۋشىلىگى ماسەلەسى دە شەشىمىن تابۋدا. وبلىستىق كوپبەيىندى اۋرۋحانا جانىنان وتتەگى وندىرەتىن تسەح سالۋ جۇمىستارى قولعا الىنىپ، وبلىستىق بيۋدجەتتەن 80 ملن. تەڭگە قارجى ءبولىندى. وڭىردەگى وكپەنى جاساندى جەلدەتەتىن 76 اپپاراتقا ماۋسىم ايىندا 20 ءپورتاتيۆتى قوندىرعى الىنىپ، قوسىمشا 63-نە تاعى دا ءوتىنىم بەرىلدى. ودان بولەك، وسى اپپاراتتاردى الۋعا جەرگىلىكتى كاسىپكەرلەر قولداۋ بىلدىرۋدە.

بۇگىنگى كۇنى وزەكتى بولىپ تۇرعان ءدارى-دارمەكتىڭ تاپشىلىعى، باعاسىنىڭ تۇراقتىلىعى دا وبلىس باسشىلارىنىڭ باستى نازارىندا. ايماقتا 3 ايعا جەتكىلىكتى دارىلەر 1 اپتادا ءوتىپ كەتىپ، جەتىسپەۋشىلىك تۋىندادى.  

باس سانيتارلىق دارىگەردىڭ قاۋلىسىنا سايكەس بارلىق مۇددەلى مەملەكەتتىك ورگاندارمەن جانە ۇكىمەتتىك ەمەس ۇيىمدارمەن بىرلەسىپ مونيتورينگتىك توپ قۇرىلدى. سونداي-اق، قالا، اۋدان اكىمدىكتەرى جانە «Nur Otan» پارتياسىنىڭ وبلىستىق فيليالى جانىنان قۇرىلعان ارنايى مونيتورينگتىك توپتار ءدارى-دارمەك باعاسى مەن كولەمىنە قاتاڭ باقىلاۋ جۇمىستارىن جۇرگىزەتىن بولادى.  جالپى ءدارى-دارمەكتىڭ شەكتى بولشەك باعالارى تۋرالى تولىق اقپاراتتى "DARI.KZ" قوسىمشاسىنان كورۋگە بولادى.

ەپەديميولوگيالىق جاعدايعا بايلانىستى جەدەل جاردەم كومەگىنە جۇگىنۋشىلەر سانى ارتۋدا. وسى ورايدا، وبلىس بويىنشا 81 جەدەل جاردەم قىزمەت كورسەتۋ بريگادالارىندا 52 دارىگەر مەن 351 فەلدشەر جۇمىس جاسايدى. ولار قازىر تاۋلىگىنە 2 مىڭعا جۋىق شاقىرتۋ ورىنداۋدا. جۇكتەمە 2 ەسەگە ءوسىپ، ديسپەتچەرلەر مەن قىزمەتكەرلەردىڭ جەتىسپەۋشىلىگى بايقالادى. وسىعان وراي، مەديتسينا ماماندىعى بار جاس ماماندار مەن ەرىكتىلەردى جۇمىسقا تارتۋ شارالارى قابىلدانۋدا.

سوڭعى جاڭالىقتار

ۇقساس جاڭالىقتار