اۋدان ورتالىعىندا جاڭادان بوي كوتەرگەن دەنەشىنىقتىرۋ-ساۋىقتىرۋ كەشەنى 320 ادامعا لايىقتالىپ جوبالانعان. جالپى اۋماعى 2437,7 شارشى مەتر جەردى الاتىن كەشەندە سپورتتىڭ ۆولەيبول, باسكەتبول, گاندبول, كۇرەس تۇرلەرىمەن شۇعىلدانۋعا بارلىق جاعداي بار. سپورت سارايىنىڭ ءىشى جاتتىعۋلارعا قاجەتتى قۇرال-جابدىقتارمەن تولىقتاي قامتاماسىز ەتىلگەن.
قارقارالى قالاسىندا تاعى ءبىر سپورت نىسانى – ۇستەل تەننيسىنىڭ ورتالىعى دا كەلۋشىلەرگە ايقارا ەسىك اشتى. مۇندا ءبىر مەزگىلدە 60-تان استام ادام سپورتتىڭ وسى تۇرىمەن اينالىسا الادى. تەننيس ورتالىعى زاماناۋي تالاپتارعا ساي جاراقتاندىرىلعان.
سونىمەن قاتار اۋدانداعى ءىرى ەلدى مەكەندەردىڭ ءبىرى قاراعايلى كەنتىندە دارىگەرلىك امبۋلاتوريانىڭ جاڭا عيماراتى پايدالانۋعا بەرىلدى. جەرگىلىكتى حالىق كوپتەن كۇتكەن بۇل مەديتسينالىق مەكەمە ءبىر مەزگىلدە 100 ادامعا دەيىن قابىلداي الادى, 25 توسەكتىك كۇندىزگى ستاتسيونار مەديتسينالىق كەرەك-جاراقپەن تولىق جابدىقتالعان.
قارقارالى اۋدانىنىڭ اكىمى ەلدار دۇيسەتاەۆ حالىقتىڭ ءال-اۋقاتىن جاقسارتۋ ماقساتىنداعى جۇمىستاردىڭ الداعى ۋاقىتتا دا جالعاسىن تاباتىنىن ايتادى.
قاراعاندى وبلىسى,
قارقارالى اۋدانى
