ستاتيستيكا كوميتەتىنىڭ 2020 جىلعى 1 مامىرداعى دەرەگىنە سۇيەنسەك, نۇر-سۇلتان قالاسىندا 1 ملن 150 مىڭ ادام تۇرادى ەكەن. 1-2 پايىزدىق ايىرماشىلىقتى ەسەپكە الماساق, ەرلەر مەن ايەلدەردىڭ ۇلەسىن تەڭ دەپ ايتۋعا بولادى. ال 35 جاسقا دەيىنگى جاستاردىڭ ۇلەسى 60 پايىزدان اسادى.
جالپى, دامۋدىڭ داڭعىل جولىنا تۇسكەن كەز كەلگەن مەملەكەت جاستارعا ەرەكشە باسىمدىق بەرەدى. قازاقستان دا وسى باعىتتى ۇستاناتىنى بەلگىلى. 2019 جىل – جاستار جىلى بولدى. بيىلعى 2020 جىل – ۆولونتەر جىلى دەپ جاريالاندى. وسىنىڭ بارلىعى مەملەكەت تاراپىنان ەلدىڭ ەرتەڭىن قولداۋ ءۇشىن جاسالىپ وتىرعانى ايتپاسا دا تۇسىنىكتى.
ەلباسى نۇرسۇلتان نازارباەۆتىڭ ەل استاناسىن ارقا توسىنە كوشىرۋ تۋرالى يدەياسىمەن ۇلى دالا توسىندە الەم مويىنداعان شاھار قۇرىلدى. ەسىلدىڭ جاعاسىندا بوي كوتەرگەن قالا وركەنيەت كوشىنە ىلەستى. وعان يۋنەسكو-نىڭ شەشىمىمەن «بەيبىتشىلىك قالاسى» دەگەن اتاق بەرىلدى. ال پرەزيدەنت قاسىم-جومارت توقاەۆ باس شاھاردىڭ اۆتورى ءارى باس ساۋلەتشىسىنىڭ ەرەن ەڭبەگىن ەرەكشە باعالاپ, قالاعا نۇر-سۇلتان اتاۋىن بەرۋ تۋرالى شەشىم قابىلدادى.
بۇل شەشىم ەلباسى مەن ەلوردا ەگىز ۇعىم ەكەنىن كورسەتتى.
ەلوردادا نە جاسالسا دا, جاستار ءۇشىن جانە جاستاردىڭ بولاشاعى ءۇشىن جاسالادى. سەبەبى جاستار – ەلىمىزدىڭ قازىرگى الەمدەگى باسەكەگە قابىلەتتىلىگىنىڭ نەگىزگى فاكتورى. قازاقستاننىڭ بولاشاعى جاستاردىڭ بىلىمىنە, كۇش-قۋاتى مەن پاتريوتيزمىنە بايلانىستى.
ەلباسى ايتقانداي: «تاۋەلسىزدىك رۋحىمەن ءوسىپ كەلە جاتقان بۇگىنگى جاس بۋىن – ءبىزدىڭ ەرتەڭگى ءۇمىتىمىز, سەنىمدى تىرەگىمىز».
باس شاھاردا 2010 جىلى ەقىۇ ءسامميتى, 2011 جىلى استانا, الماتى قالالارىندا قىسقى ازيا ويىندارى, 2017 جىلى ەلوردادا ەكسپو حا-لىقارالىق كورمەسى زور تابىسپەن ءوتتى. اتاپ كورسەتەرلىگى, بايىرقالى باسقوسۋلاردىڭ بارلىعىنا جاستار جۇمىلدىرىلدى.
جالپى, قازاقستان تاۋەلسىزدىك العاننان بەرى جاستارعا بارىنشا قولداۋ كورسەتىپ كەلەدى. ۆولونتەر جىلى اياسىندا جاستار ەرەكشە قىرىنان تانىلدى. تۇتاس الەمدى شارپىعان پاندەميا جاعدايىندا ەل جاستارى ەلگەزەكتىك تانىتىپ, قيىن كەزەڭدە قايىرلى باستامالاردىڭ باسىنان تابىلدى. ماسەلەن, جاستار كارانتينگە جابىلعان ۇيلەردىڭ تۇرعىندارىنا ازىق-ت ۇلىك تاراتىپ, قايىرىمدىلىق شارالارىنا قاتىستى. مۇنداي يگى ىستەن قازاقستان كوممۋنيستىك حالىق پارتياسىنىڭ جاستار قاناتى دا قالىس قالعان جوق.
بولاشاعىن ەلوردامەن بايلانىستىرعان جاستارعا ەكى بىردەي ەسىك اشىق. ءبىرى – عىلىم-بىلىمگە دەگەن قۇشتارلىق, ەكىنشىسى – جاڭا ورتا, جاڭا مۇمكىندىكتەر مەن جاڭا يدەيالارعا تولى جارقىن بولاشاققا دەگەن باستاۋ. قالادا ۇنەمى قايناعان تىرشىلىك, اينالادا جانتالاسىپ, جاعالاسىپ جۇرگەن ادامدار, ياعني باسەكەلەستىك وتە جوعارى, ال باسەكەلەستىك بار جەردە العا جىلجۋ, دامۋ بار.
جاستار ءۇشىن ماحابباتتىڭ, جاسامپازدىقتىڭ, دوستىقتىڭ, سۇلۋلىقتىڭ سيمۆولى ىسپەتتى استانادا ساۋلەت ونەرىنىڭ تەڭدەسسىز ۇلگىلەرى سانالاتىن كەشەندەر بوي كوتەرۋدە. بۇگىنگى تاڭدا ەلوردامىزدىڭ الەم الدىنداعى بەدەلى كۇن ساناپ ارتىپ كەلەدى. قازاق ۇلتىنىڭ ۇلى تۇعىرى – ارۋ استانا جيىرما جىلدا دامۋشى ەلدەردىڭ ەلۋلىگىنە ەندى, كەلەسى مەجە دامىعان وتىزدىقتىڭ قاتارىنا قوسىلۋ. ەڭ باستىسى, وركەنيەت كوشىندەگى وزىق تەحنولوگيالارمەن تىنىستاپ, بولاشاقتىڭ قالاسىن بىرگە جاساي بىلسەك بولعانى. سوندا عانا ەلباسى ىرگەسىن قالاعان «ماڭگىلىك ەلگە» اينالاتىنىمىز حاق. ءبىر سوزبەن ايتقاندا, استانا – ىزعارى مەن جىلىلىعى, سۋىعى مەن سۇلۋلىعى قاتار جۇرەتىن جۇمباق قالا بولعانمەن, شەشۋىن تابا بىلگەن جاننىڭ باسىنا قونعان باق.
نۇر-سۇلتان قالاسىنىڭ بۇگىنگى اجارىن جاستاردىڭ كەسكىن-كەلبەت, بەت-بەينەسى, ءومىر سالتى, ارماندارىمەن سالىستىرۋ ءلازىم. ەكەۋىنە دە جاستىق جىگەر, البىرتتىق, تالپىنىس, جاڭاشا ويلاۋ ەركىندىگى, سۇلۋلىق پەن سىمبات ءتان. بەيبىتشىلىك قالاسىنىڭ كەلەشەگى بۇتىندەي XXI عاسىردىڭ ەنشىسىندە جاتىر. ال ونىڭ ەڭسەسىن كوتەرەتىن بۇگىنگى جاستار. ولارعا ەرىنبەي ەڭبەك ەتىپ, ەل مۇددەسىنە قالتقىسىز قىزمەت ەتۋ قاجەت.
مەملەكەت باسشىسى قاسىم-جومارت توقاەۆ ءبىر سوزىندە: «بولاشاعى زور ازاماتتار ەل يگىلىگى ءۇشىن ەكونوميكامىزدى دامىتۋ جولىندا قىزمەت ەتۋى قاجەت. ارينە, ەڭ الدىمەن ءبىز ولارعا قاجەتتى جاعداي جاساۋعا ءتيىسپىز. دارىندى جاستارعا جەتكىلىكتى دەڭگەيدە قولداۋ كورسەتپەي, الدىڭعى قاتارلى زياتكەر مەملەكەت قاتارىنا قوسىلۋ قيىن ەكەنىن مويىنداۋىمىز كەرەك», دەگەن بولاتىن. جاستارعا جاسالىپ جاتقان قازىرگى جاعدايدىڭ استارىندا وسىنداي وي جاتىر. دەمەك جاستارعا سالىنعان ينۆەستيتسيانىڭ قىزىعىن كورەر كۇن الدا.
بۇل – قالا قالعىماۋى, جاستار قالعىتپاۋى ءتيىس دەگەن ءسوز.
ايقىن قوڭىروۆ,
پارلامەنت ءماجىلىسىنىڭ دەپۋتاتى, «حالىق كوممۋنيستەرى» پارلامەنتتىك فراكتسياسىنىڭ جەتەكشىسى
