بۇدان بىلاي ترانزيتتىك اۆتوكولىكتەر كەنشىلەر استاناسىنىڭ جولدارىن تالقانداپ, اۋاسىن لاستاپ, كوشەلەرىن قاق جارىپ وتپەيتىن بولدى. ولار ەندى جاڭا جولمەن قالانى سىرتىنان اينالىپ وتەدى.
اينالما جولدىڭ اشىلۋىنا ارنايى كەلگەن يندۋستريا جانە ينفراقۇرىلىمدىق دامۋ ۆيتسە-ءمينيسترى بەرىك كاماليەۆ سالتاناتتى ءساتتىڭ ەلوردا كۇنى مەرەكەسىمەن تۇسپا-تۇس كەلگەنىن ريزاشىلىقپەن اتاپ ءوتتى.
"سولتۇستىك-شىعىس اينالما جولى 2017 جىلى ەلباسىنىڭ تاپسىرماسى بويىنشا سالىنا باستاعان ەدى. جول حالىقارالىق ستاندارتتارعا سايكەس كەلەدى جانە ەكاتەرينبۋرگ-الماتى دالىزىنە ەنەدى. مۇندا جەتى كولىك ايرىعى بار. بۇل – ءبىرىنشى ساناتتاعى جول", – دەپ بىتكەن ىسكە جوعارى باعا بەردى ول.
مامانداردىڭ ەسەبىنە سۇيەنسەك, وبلىس ورتالىعىمەن كۇنىنە 22 مىڭنان استام اۆتوكولىك وتەدى ەكەن. ال جاڭادان سالىنعان بۇل جول بولسا, قاراعاندىنى اينالىپ ءوتىپ, قالانى ترانزيتتىك اۆتوموبيلدەر مەن اۋىر جۇك كولىكتەرىنەن بوساتۋعا مۇمكىندىك بەرەدى.
سولتۇستىك-شىعىس اينالما جولى ءتورت جولاقتى ەتىپ سالىنعان, اسفالتبەتوندى جابىنى بار. جول جابىنىنىڭ ءبىرىنشى جوندەۋگە دەيىنگى قىزمەت مەرزىمى 15 جىلعا تەڭ. قوزعالىس قاۋىپسىزدىگىن قامتاماسىز ەتۋ ءۇشىن جولاقتار اراسىندا يرەك بىلەۋ ورناتىلعان. جولدىڭ ەسەپتىك جىلدامدىعى ساعاتىنا 120 شاقىرىم بولادى.
اينالما جولداردى قايتا قۇرۋ اياسىندا جەتى جول ايرىعى, توعىز جول وتپەسى, سوقىر وزەنى ارقىلى وتەتىن كوپىر جانە دەمالىس ءۇشىن ەكى الاڭ سالىنعان. جوبا قاراعاندى, نۇر-سۇلتان, پاۆلودار جانە شىعىس قازاقستان وبلىستارى باعىتتارى بويىنشا كولىك ايرىقتارىن قاراستىرادى.
قاراعاندى وبلىسىنىڭ اكىمى جەڭىس قاسىمبەك سولتۇستىك-شىعىس اينالما جولىنىڭ قۇرىلىسىنا ءۇش مىڭنان استام جول جۇمىسشىلارى مەن 500 بىرلىك تەحنيكا جۇمىلدىرىلعانىن ءمالىم ەتتى.
"قۇرىلىسشىلاردىڭ 80 پايىزى وبلىس تۇرعىندارى بولدى. سولتۇستىك جانە شىعىس اينالما جولداردىڭ ءوڭىر ءۇشىن ستراتەگيالىق ماڭىزى زور, سەبەبى جوبالاردى ىسكە اسىرۋ قالا كوشەلەرىنە تۇسەتىن جۇكتەمەنى ايتارلىقتاي تومەندەتەدى, جولداردىڭ توزۋىن ازايتۋعا, اپاتتىلىقتىڭ تومەندەۋىنە جانە ەكولوگيالىق جاعدايدىڭ جاقسارۋىنا الىپ كەلەدى. سونداي-اق, وبلىس ورتالىعى مەن قازاقستاننىڭ وڭتۇستىك وڭىرلەرىن كولىك بايلانىسىمەن قامتاماسىز ەتەدى", – دەپ اتاپ ءوتتى ول.
جالپى, قاراعاندى وبلىسىندا جول قۇرىلىسى جوبالارى بويىنشا اۋقىمدى جۇمىستار قولعا الىنعان. مىسالى, وڭىردە جامبىل مەن الماتى جاققا قاراي باعىت العان بالقاش, بۋرىلبايتال جولدارىنىڭ قۇرىلىسى ىسكە اسىرىلىپ جاتىر, سونداي-اق, جەزقازعان - قىزىلوردا جولىن جوبالاۋدى اياقتاۋ جوسپاردا بار. بۇدان بولەك, بيىل قىزىلوردا - جەزقازعان جانە جەزقازعان - قاراعاندى جولدارىن جوبالاۋ باستالادى. قاراعاندىدان پاۆلودار باعىتىنداعى جول مەن قارقارالى باعىتىنداعى جولدى قايتا جاڭارتۋ جوسپاردا بار.
جالپى ۇزىندىعى 48,4 شاقىرىم بولاتىن سولتۇستىك-شىعىس اينالما جولىنىڭ قۇرىلىسى «نۇرلى جول» مەملەكەتتىك ينفراقۇرىلىمدىق دامۋ باعدارلاماسى بويىنشا «ورتالىق-وڭتۇستىك» ءدالىزىن قايتا جاڭارتۋ جوسپارىنا ەنگەنىن ايتا كەتكەن ءلازىم.
قاراعاندى وبلىسى
