بۇگىندە قىزىلوردا قالاسىندا 54 مەكتەپ بار. ونىڭ ىشىندە كۇردەلى جوندەۋدى قاجەت ەتەتىن عيماراتتار سارالانىپ, جوندەۋ جۇمىستارى كەزەڭ-كەزەڭىمەن جۇرگىزىلۋدە.
ءبىلىم سالاسىنداعى بيىلعى جاعىمدى جاڭالىقتىڭ ءبىرى ايماق ورتالىعىندا بارلىعى 8 مەكتەپكە جانە 2 بالاباقشاعا كۇردەلى جوندەۋ جۇمىستارى جۇرگىزىلۋدە. ونىڭ ىشىندە "جۇمىسپەن قامتۋ جول كارتاسى - 2020" باعدارلاماسى اياسىندا 4 مەكتەپ ياعني №23, 43, 112, 173 جانە 2 بالاباقشاعا كۇردەلى جوندەۋدەن وتسە, رەسپۋبليكالىق "اۋىل – ەل بەسىگى" باعدارلاماسى نەگىزىندە اقسۋات اۋىلدىق وكرۋگىندە ورنالاسقان №143 ورتا مەكتەبى جاڭعىرتىلۋدا. سونىمەن قاتار قالامىزداعى №1, 4, 176 مەكتەپتەردىڭ ەسىك-تەرەزەلەرى مەن شاتىرىن جاڭالاۋعا حالىقارالىق جوبالار ارقىلى قاراجات بولىنگەن.
قالا اكىمى الدىمەن ج.قيزاتوۆ اتىنداعى №23 مەكتەپتەگى كۇردەلى جوندەۋ جۇمىسىنىڭ بارىسىن كوردى. سالىنعانىنا 35 جىل بولعان ءبىلىم ورداسىنىڭ سىرتقى ارلەۋ جۇمىستارى, اۋىز سۋ, كارىز جۇيەسى مەن جىلۋ جۇيەسى قۇبىرلارى توزىپ, ەسىك-تەرەزەسى ەسكىرگەن. قالا باسشىسى جۇمىس ساپاسىنا ءمان بەرۋدى تاپسىرىپ, مەملەكەتتەن بولىنگەن ءار تيىننىڭ سۇراۋى بولاتىنىن ەسكەرتتى. مۇنان سوڭ شاھار باسشىسى ق.مۇحامەدجانوۆ اتىنداعى №1 مەكتەپ-گيمنازياسىندا حالىقارالىق جوبالار ارقىلى جۇرگىزىلىپ جاتقان جوندەۋ جۇمىستارىن كوردى. مەكتەپ باسشىلىعىنىڭ مەملەكەت قارجىسىنا يەك ارتىپ وتىرماي, جاڭعىرتۋ جۇمىستارىنا حالىقارالىق قورلاردان قارجى تارتۋ باستاماسىن وڭ باعالادى.
م.كوكەنوۆ كوشەسىندەگى جاياۋ جۇرگىنشىلەر جولىن "قاسيەت LTD" جشس جانە "اقپارات-قىزىلوردا" جشس سالىپ جاتىر. قالا باسشىسى قوس مەردىگەرگە وسىعان دەيىن تروتۋارلاردىڭ ساپاسىنا بايلانىستى ورىن العان ولقىلىقتاردىڭ قايتالانباۋىن ەسكەرتتى.
ودان كەيىن قالا اكىمى وسى تيتوۆ قىستاعىندا ورنالاسقان ءا.مولداعۇلوۆا اتىنداعى №173 مەكتەپتىڭ كۇردەلى جوندەۋ جۇمىستارىن تەكسەردى. مەكتەپ 44 جىلدان بەرى جوندەۋدەن وتپەگەن. عيماراتتىڭ سالىنعان ۋاقىتى مەن جاعدايىن ساراپتاي كەلە كۇردەلى جوندەۋگە "جۇمىسپەن قامتۋ جول كارتاسى - 2020" باعدارلاماسى اياسىندا قارجى بولىنگەن. مەردىگەر مەكەمە باسشىسى قۇرىلىس جۇمىستارى تامىز ايىندا اياقتالىپ, وقۋ ماۋسىمىنا تولىق دايىن بولاتىنىن جەتكىزدى.
"جۇمىسپەن قامتۋ جول كارتاسى - 2020" باعدارلاماسى اياسىندا كۇردەلى جوندەۋدەن ءوتىپ جاتقان ن.احمادەەۆا اتىنداعى №112 ورتا مەكتەپتە مەتالدى سايدينگ جابىندارى دۇرىس قويىلماعان, قالا باسشىسى مەردىگەرگە بۇل ولقىلىقتى تەز ارادا دۇرىستاۋدى تاپسىردى.
قالا اكىمى ا.توقماعامبەتوۆ كوشەسىنىڭ بويىنداعى كۆارتالارالىق جىلۋ جەلىلەرىن قايتا قۇرۋ جۇمىستارىن دا نازارعا الدى. بۇگىندە جاڭعىرتۋ جۇمىستارىنا جىلۋ شىعىمى از, زامان تالابىنا ساي وتاندىق ونىمدەر قولدانىلۋدا. شاھار باسشىسى مۇنداعى جۇمىستىڭ باياۋ جۇرگىزىلىپ جاتقانىن ايتىپ, مەردىگەرگە جانە جاۋاپتى سالا باسشىلارىنا "مەيلىنشە تەز ءارى ساپالى جۇمىس ىستەۋ كەرەك", - دەپ تاپسىرما جۇكتەدى.
ايتا كەتەيىك, بيىل قالا بويىنشا "جۇمىسپەن قامتۋ جول كارتاسى - 2020" باعدارلاماسى اياسىندا توزىعى جەتكەن 7 شاقىرىم جىلۋ قۇبىرلارىن اۋىستىرۋ جوسپارلانۋدا. اتالعان جوبا نەگىزىندە 200 جۋىق ازامات جۇمىسپەن قامتىلدى.
